ನ್ಯೂಯಾರ್ಕ್: ಕರೊನಾ ವೈರಸ್ ಭೀತಿಯ ನಡುವೆ ಫ್ಲಶಿಂಗ್ ಮೆಡೋಸ್ನ ಬಯೋ-ಬಬಲ್ನಲ್ಲಿ ಸೋಮವಾರದಿಂದ ಯುಎಸ್ ಓಪನ್ ಟೆನಿಸ್ ಟೂರ್ನಿ ನಡೆಯಲಿದೆ. ಕರೊನಾ ಕಾಲದಲ್ಲಿ ನಡೆಯುತ್ತಿರುವ ಮೊದಲ ಗ್ರಾಂಡ್ ಸ್ಲಾಂ ಇದಾಗಿದ್ದು, ಸ್ಟಾರ್ ಆಟಗಾರರ ಕೊರತೆಯನ್ನೂ ಹೊಂದಿದೆ.
ವಿಶ್ವ ನಂ. 1 ಆಟಗಾರ ನೊವಾಕ್ ಜೋಕೊವಿಕ್ ಮತ್ತು ಆತಿಥೇಯ ಅಮೆರಿಕದ ತಾರೆ ಸೆರೇನಾ ವಿಲಿಯಮ್ಸ್ ಟೂರ್ನಿಯ ಇಬ್ಬರು ಪ್ರಮುಖ ಆಕರ್ಷಣೆಯಾಗಿದ್ದಾರೆ. ಕರೊನಾ ಗೆದ್ದು ಬಂದಿರುವ ಜೋಕೊವಿಕ್ 18ನೇ ಗ್ರಾಂಡ್ ಸ್ಲಾಂ ಪ್ರಶಸ್ತಿಯ ನಿರೀಕ್ಷೆಯಲ್ಲಿದ್ದರೆ, ಸೆರೇನಾ 24 ಗ್ರಾಂಡ್ ಸ್ಲಾಂ ಪ್ರಶಸ್ತಿ ಗೆಲುವಿನ ಐತಿಹಾಸಿಕ ಸಾಧನೆಯ ಹಂಬಲದಲ್ಲಿದ್ದಾರೆ.
ಸಾಮಾನ್ಯವಾಗಿ ವರ್ಷದ 4ನೇ ಹಾಗೂ ಅಂತಿಮ ಗ್ರಾಂಡ್ ಸ್ಲಾಂ ಟೂರ್ನಿಯಾಗಿರುತ್ತಿದ್ದ ಯುಎಸ್ ಓಪನ್ ಈ ಬಾರಿ ವರ್ಷದ ಗ್ರಾಂಡ್ ಸ್ಲಾಂ ಆಗಿದೆ. ವಿಂಬಲ್ಡನ್ ರದ್ದಾಗಿರುವುದು ಮತ್ತು ಫ್ರೆಂಚ್ ಓಪನ್ ಸೆಪ್ಟೆಂಬರ್-ಅಕ್ಟೋಬರ್ಗೆ ಮುಂದೂಡಿಕೆಯಾಗಿರುವುದು ಇದಕ್ಕೆ ಕಾರಣ.
ಇದನ್ನೂ ಓದಿ: ವಿರಾಟ್ ಕೊಹ್ಲಿಗೆ ಸವಾಲೆಸೆಯಲು ಸಜ್ಜಾದ 600 ವಿಕೆಟ್ ಸರದಾರ ಆಂಡರ್ಸನ್
ಹಿಂದೆ ಸರಿದ ಸ್ಟಾರ್ಗಳು
ವಿಶ್ವದಲ್ಲಿ ಅತಿಹೆಚ್ಚು ಕರೊನಾ ಪ್ರಕರಣಗಳಿರುವ ದೇಶ ಅಮೆರಿಕ. ಇದರಿಂದ ಸಹಜವಾಗಿಯೇ ಇಲ್ಲಿಗೆ ಆಗಮಿಸಲು ಕೆಲವು ಸ್ಟಾರ್ಗಳು ಹಿಂದೆ ಸರಿದಿದ್ದಾರೆ. ಇದರಲ್ಲಿ ಸ್ಪೇನ್ ದಿಗ್ಗಜ ರಾಫೆಲ್ ನಡಾಲ್, ವಿಶ್ವ ನಂ. 1 ಆಟಗಾತಿರ್ ಆಶ್ಲೆಗ್ ಬಾರ್ಟಿ ಪ್ರಮುಖರು. ಮಹಿಳಾ ಸಿಂಗಲ್ಸ್ನಲ್ಲಿ ಅಗ್ರ 8ರಲ್ಲಿ 6 ಆಟಗಾತಿರ್ಯರು ಮತ್ತು ಒಟ್ಟಾರೆ 6 ಗ್ರಾಂಡ್ ಸ್ಲಾಂ ಚಾಂಪಿಯನ್ಗಳು ಹಿಂದೆ ಸರಿದಿದ್ದಾರೆ. ಸ್ವಿಸ್ ದಿಗ್ಗಜ ರೋಜರ್ ಫೆಡರರ್ ಗಾಯದಿಂದಾಗಿ ಮತ್ತು ಮಹಿಳಾ ಸಿಂಗಲ್ಸ್ ಹಾಲಿ ಚಾಂಪಿಯನ್ ಬಿಯಾಂಕಾ ಆಂಡ್ರೆಸ್ಕು ಫಾರ್ಮ್ ಕೊರತೆಯಿಂದ ಪಾಲ್ಗೊಳ್ಳುತ್ತಿಲ್ಲ.
ಬಹುಮಾನ ಮೊತ್ತ ಕಡಿತ
ಟೂರ್ನಿಗಳಲ್ಲಿ ವರ್ಷದಿಂದ ವರ್ಷಕ್ಕೆ ಬಹುಮಾನ ಮೊತ್ತ ಏರಿಕೆಯಾಗುವುದು ಸಾಮಾನ್ಯ. ಆದರೆ ಈ ಬಾರಿ ಕರೊನಾದಿಂದ ಉಂಟಾಗಿರುವ ಆರ್ಥಿಕ ಬಿಕ್ಕಟ್ಟಿನಿಂದಾಗಿ ಟೂರ್ನಿಯ ಬಹುಮಾನ ಮೊತ್ತವನ್ನು ಕಳೆದ ವರ್ಷಕ್ಕಿಂತ ಶೇ. 6.7ರಷ್ಟು ಕಡಿತಗೊಳಿಸಲಾಗಿದೆ. ಕಳೆದ ವರ್ಷ ಒಟ್ಟು 416 ಕೋಟಿ ರೂ. ಬಹುಮಾನ ವಿತರಣೆಯಾಗಿದ್ದರೆ, ಈ ಬಾರಿಯ ಒಟ್ಟು ಬಹುಮಾನ 390 ಕೋಟಿ ರೂಪಾಯಿ. ಸಿಂಗಲ್ಸ್ ವಿಭಾಗದ ವಿಜೇತರು ಕಳೆದ ವರ್ಷಕ್ಕಿಂತ ಶೇ. 22ರಷ್ಟು ಕಡಿಮೆ ಅಂದರೆ 21.93 ಕೋಟಿ ರೂ. ಬಹುಮಾನ ಪಡೆಯಲಿದ್ದಾರೆ. ಆದರೆ ಮೊದಲ ಸುತ್ತಿನಲ್ಲಿ ನಿರ್ಗಮಿಸುವ ಆಟಗಾರರಿಗೆ ನಿಡುವ ಬಹುಮಾನ ಮೊತ್ತವನ್ನು ಅಲ್ಪ ಏರಿಕೆ ಮಾಡಲಾಗಿದೆ.
ಖಾಲಿ ಕ್ರೀಡಾಂಗಣದಲ್ಲಿ ಪಂದ್ಯಗಳು
ಫುಟ್ಬಾಲ್, ಕ್ರಿಕೆಟ್ ಮತ್ತಿತರ ಕ್ರೀಡೆಗಳಂತೆ ಟೆನಿಸ್ ಕೂಡ ವೈರಸ್ ಭೀತಿಯಿಂದಾಗಿ ಪ್ರೇಕ್ಷಕರನ್ನು ದೂರವಿಟ್ಟು ಖಾಲಿ ಕ್ರೀಡಾಂಗಣದಲ್ಲಿ ಪಂದ್ಯ ಆಯೋಜಿಸುತ್ತಿದೆ. ಟೂರ್ನಿ ನಡೆಯಲಿರುವ ಯುಎಸ್ ನ್ಯಾಷನಲ್ ಟೆನಿಸ್ ಸೆಂಟರ್ ಕೆಲ ತಿಂಗಳ ಹಿಂದೆ ಕೋವಿಡ್-19 ಚಿಕಿತ್ಸಾ ಆಸ್ಪತ್ರೆಯಾಗಿತ್ತು. ಟೂರ್ನಿಗೆ ಮುನ್ನ ಎಲ್ಲ ಆಟಗಾರರನ್ನು ಕರೊನಾ ಪರೀಕ್ಷೆಗೆ ಒಳಪಡಿಸಲಾಗಿದೆ. ಬಯೋ-ಬಬಲ್ ನಿಯಮ ಉಲ್ಲಂಘಿಸುವ ಆಟಗಾರರು ಟೂರ್ನಿಯಿಂದಲೇ ಹೊರಬೀಳಲಿದ್ದಾರೆ.
ಭಾರತೀಯರೂ ಭಾಗಿ
ಕರೊನಾ ಭೀತಿಯಿಂದ ಸಾನಿಯಾ ಮಿರ್ಜಾ ಟೂರ್ನಿಯಿಂದ ಹಿಂದೆ ಸರಿದಿದ್ದಾರೆ. ಆದರೆ ಪುರುಷರ ವಿಭಾಗದಲ್ಲಿ ಭಾರತೀಯರು ಕಣಕ್ಕಿಳಿಯುತ್ತಿದ್ದಾರೆ. ಸಿಂಗಲ್ಸ್ನಲ್ಲಿ ಸುಮಿತ್ ನಗಾಲ್ ಮತ್ತು ಡಬಲ್ಸ್ನಲ್ಲಿ ರೋಹನ್ ಬೋಪಣ್ಣ ಮತ್ತು ದಿವಿಜ್ ಶರಣ್ ಆಡಲಿದ್ದಾರೆ.
ಪಂದ್ಯಗಳು ಆರಂಭ: ರಾತ್ರಿ 8.30
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್ ಸೆಲೆಕ್ಟ್ 1, 2.
ಕರೊನಾ ಭೀತಿಯ ನಡುವೆ ಶೂಟಿಂಗ್ಗೆ ಹಾಜರಾಗಿ ಟೀಕೆ ಎದುರಿಸಿದ ಕ್ರಿಸ್ ಗೇಲ್!