ಮೆಲ್ಬೋರ್ನ್: ವಿಶ್ವ ನಂ.1 ಆಟಗಾರ ಸೆರ್ಬಿಯಾದ ನೊವಾಕ್ ಜೋಕೊವಿಕ್ ವರ್ಷದ ಮೊದಲ ಗ್ರಾಂಡ್ ಸ್ಲಾಂ ಆಸ್ಟ್ರೆಲಿಯನ್ ಓಪನ್ ಟೆನಿಸ್ ಟೂರ್ನಿಯ ಮೊದಲ ಸುತ್ತಿನಲ್ಲಿ ಪೈಪೋಟಿಯುತ ಗೆಲುವು ದಾಖಲಿಸಿದ್ದಾರೆ. ಇಟಲಿಯ ಜನ್ನಿಕ್ ಸಿನ್ನರ್, ರಷ್ಯಾದ ಆಂಡ್ರೆ ರುಬ್ಲೆವ್, ಅಮೆರಿಕದ ಟೇಲರ್ ಫ್ರಿಟ್ಜ್ ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಶುಭಾರಂಭ ಮಾಡಿದ್ದಾರೆ. ಮಹಿಳೆಯರ ವಿಭಾಗದಲ್ಲಿ ಬೆಲಾರಸ್ನ ಅರಿನಾ ಸಬಲೆಂಕಾ, ಗ್ರೀಸ್ ಮರಿಯಾ ಸಕ್ಕರಿ, ಮಾಜಿ ಚಾಂಪಿಯನ್ ಕರೋಲಿನಾ ವೊಜ್ನಿಯಾಕಿ, ಜೆಕ್ ಗಣರಾಜ್ಯದ ಬ್ರೆಂಡಾ ಫ್ರುಹ್ವಿಟೋರ್ವಾ ಎರಡನೇ ಸುತ್ತಿಗೆ ಪ್ರವೇಶಿಸಿದ್ದಾರೆ.
ಮೆಲ್ಬೋರ್ನ್ ಪಾರ್ಕ್ನಲ್ಲಿ ಭಾನುವಾರ ಆರಂಭಗೊಂಡ ಟೂರ್ನಿಯ ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಹಾಲಿ ಚಾಂಪಿಯನ್ ನೊವಾಕ್ ಜೋಕೊವಿಕ್ಗೆ ಆರಂಭಿಕ ಸುತ್ತಿನಲ್ಲಿ ಸುಲಭ ಗೆಲುವು ದಕ್ಕಲಿಲ್ಲ. ಕ್ರೊವೇಷಿಯಾದ ಡಿನೊ ಪ್ರಿಜ್ಮಿಕ್ ಎದುರು 6-2, 6-7, 6-3,6-4 ಸೆಟ್ಗಳಿಂದ ಗೆಲುವು ದಾಖಲಿಸಿದರು. ಆದರೆ, ಅಗ್ರ ಶ್ರೇಯಾಂಕಿತ ಜೋಕೊವಿಕ್, 18 ವರ್ಷದ ಪ್ರಿಜ್ಮಿಕ್ ಎದುರು ಗೆಲುವಿಗಾಗಿ 4 ಗಂಟೆ 1 ನಿಮಿಷಗಳ ಕಠಿಣ ಹೋರಾಟ ನಡೆಸಿದರು.
4ನೇ ಶ್ರೇಯಾಂಕಿತ ಜನ್ನಿಕ್ ಸಿನ್ನರ್ 6-4, 7-5, 6-3 ರಿಂದ ನೆದರ್ಲೆಂಡ್ನ ಬೊಟಿಕ್ ವ್ಯಾನ್ ಡಿ ರಂಡ್ಸ$್ಕಲ್ಪ್ ಎದುರು ಜಯದ ಸಂಭ್ರಮ ಕಂಡರು. ಕಳೆದ ವರ್ಷ ನವೆಂಬರ್ ಜೋಕೋ ಎದುರು 2 ಬಾರಿ ಜಯಿಸಿದ್ದ ಸಿನ್ನರ್ ಇಟಲಿ ತಂಡದ ಡೇವಿಸ್ ಕಪ್ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು.
ಸಕ್ಕರಿ, ಗಾರ್ಸಿಯಾಗೆ ಗೆಲುವಿನಾರಂಭ: ಮಹಿಳೆಯರ ವಿಭಾಗದಲ್ಲಿ 8ನೇ ಶ್ರೇಯಾಂಕಿತೆ ಮರಿಯಾ ಸಕ್ಕರಿ 6-4,6-1 ರಿಂದ ಜಪಾನ್ನ ನವೊ ಹಿಬಿನೊ ಎದುರು ಗೆಲವು ದಾಖಲಿಸಿದರು. ಕಳೆದ ವರ್ಷದ ಆಸ್ಟ್ರೆಲಿಯನ್ ಓಪನ್ ಬಳಿಕ ಸಕ್ಕರಿಯ ಮೊದಲ ಗ್ರಾಂಡ್ ಸ್ಲಾಂ ಗೆಲುವು ಇದಾಗಿದೆ. ತಾಯ್ತನದ ಬಿಡುವಿನ ಬಳಿಕ ಮೊದಲ ಬಾರಿ ಆಸ್ಟ್ರೆಲಿಯನ್ ಓಪನ್ನಲ್ಲಿ ಕಣಕ್ಕಿಳಿದಿರುವ 2018ರ ಚಾಂಪಿಯನ್ ಕರೋಲಿನಾ ವೊಜ್ನಿಯಾಕಿ 6-2, 2-6 ರಿಂದ ಮುನ್ನಡೆ ಸಾಧಿಸಿದಾಗ, ಎದುರಾಳಿ ಮಗಡ ಲಿನೆಟ್ ಗಾಯದಿಂದ ನಿವೃತ್ತಿಗೊಂಡರು. ಹಾಲಿ ಚಾಂಪಿಯನ್ ಅರಿನಾ ಸಬಲೆಂಕಾ 6-0,6-1 ರಿಂದ ಅರ್ಹತಾ ಸುತ್ತಿನ ಆಟಗಾರ್ತಿ ಜರ್ಮನಿಯ ಎಲಾ ಸೀಡೆಲ್ ವಿರುದ್ಧ ಸುಲಭ ಗೆಲುವು ಒಲಿಸಿಕೊಂಡರು.