ಮುಂಬೈ: ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಶನಿವಾರ ಬೆಳಗ್ಗೆ ಕೇಂದ್ರ ಬಜೆಟ್ 2020 ಮಂಡಿಸುತ್ತಿರುವ ವೇಳೆ ಷೇರುಪೇಟೆ ಸೂಚ್ಯಂಕಗಳಾದ ಸೆನ್ಸೆಕ್ಸ್(ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್) ಮತ್ತು ನಿಫ್ಟಿ (ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್) ಎಚ್ಚರಿಕೆಯ ವಹಿವಾಟು ಮುಂದುವರಿಸಿವೆ.
ಬೆಳಗ್ಗಿನ ಸೆಷನ್ನಲ್ಲಿ 450ಕ್ಕೂ ಹೆಚ್ಚು ಅಂಶಗಳ ಚೇತರಿಕೆ ದಾಖಲಿಸಿದ ಸೆನ್ಸೆಕ್ಸ್ ಬಳಿಕ 30.84 ಅಂಶ(0.09%) ಏರಿಕೆಯೊಂದಿಗೆ 40,754.33 ಅಂಶದಲ್ಲಿ 11.30ರ ವೇಳೆಗೆ ವಹಿವಾಟು ಮುಂದುವರಿಸಿತ್ತು. ಇದೇ ರೀತಿ, ನಿಫ್ಟಿ 10.35 ಅಂಶ ಏರಿಕೆ ದಾಖಲಿಸಿದ್ದು, 11,972.45ರಲ್ಲಿ ವಹಿವಾಟು ನಡೆಸಿತ್ತು.
ಮುಂಗಡ ಪತ್ರ ಮಂಡಿಸುವ ಮುನ್ನ ಸೆನ್ಸೆಕ್ಸ್ 150 ಅಂಶ ಏರಿಕೆಯೊಂದಿಗೆ ವಹಿವಾಟು ನಡೆಸುತ್ತಿತ್ತು. ಬಜೆಟ್ ಮಂಡನೆ ಆರಂಭಿಸುತ್ತಿದ್ದಂತೆ ಭಾರತದ ಆರ್ಥಿಕತೆ ಬಲಿಷ್ಠವಾಗಿದೆ ಎಂದು ಹೇಳುತ್ತಿದ್ದಂತೆ ಮಾರುಕಟ್ಟೆ ಚೇತರಿಕೆ ತೋರಿ ಮುನ್ನುಗ್ಗಿದೆಯಾದರೂ ಎಚ್ಚರಿಕೆಯ ವಹಿವಾಟು ಮುಂದುವರಿಸಿದೆ.
ಸೆನ್ಸೆಕ್ಸ್ ಪಟ್ಟಿಯಲ್ಲಿ ಮಾರುತಿ, ಎಚ್ಯುಎಲ್, ಬಜಾಜ್ ಫೈನಾನ್ಸ್, ಅಲ್ಟ್ರಾಟೆಕ್ ಸಿಮೆಂಟ್, ಟಿಸಿಎಸ್, ಏಷ್ಯನ್ ಪೇಂಟ್ಸ್, ಬಜಾಜ್ ಆಟೋ ಷೇರುಗಳು ಏರಿಕೆ ದಾಖಲಿಸಿದ್ದರೆ, ಪವರ್ಗ್ರಿಡ್, ಎನ್ಟಿಪಿಸಿ, ಟೆಕ್ಮಹೀಂದ್ರಾ, ಟಾಟಾ ಸ್ಟೀಲ್, ಒಎನ್ಜಿಸಿ ಷೇರುಗಳು ನಷ್ಟ ಅನುಭವಿಸಿವೆ. (ಏಜೆನ್ಸೀಸ್)