ವಿಶಾಖಪಟ್ಟಣ: ಕೆಕೆಆರ್ ವಿರುದ್ಧದ ಪಂದ್ಯದಲ್ಲಿ ಭಾರಿ ರನ್ ಬಿಟ್ಟುಕೊಟ್ಟು 106 ರನ್ಗಳಿಂದ ಶರಣಾದ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಮುಖ್ಯ ಕೋಚ್ ರಿಕಿ ಪಾಂಟಿಂಗ್, ತನ್ನ ತಂಡದ ಬೌಲಿಂಗ್ ನಿರ್ವಹಣೆಯ ಬಗ್ಗೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
“ಏನಾಯಿತು ಎಂದು ಹೇಳುವುದೇ ಈಗ ಕಠಿಣವೆನಿಸುತ್ತಿದೆ. ಪಂದ್ಯದ ಮೊದಲ ಇನಿಂಗ್ಸ್ ನಮಗೆ ಸಾಕಷ್ಟು ಮುಜುಗರ ತಂದಿತು. ಅಷ್ಟೊಂದು ರನ್ ಬಿಟ್ಟುಕೊಟ್ಟಿದ್ದು ನಿರಾಶಾದಾಯಕ. 17 ವೈಡ್ ಎಸೆದೆವು. ನಮ್ಮ 20 ಓವರ್ ಮುಗಿಸಲು 2 ಗಂಟೆ ಬೇಕಾಯಿತು. ಇದರಿಂದಾಗಿ ಓವರ್ರೇಟ್ನಲ್ಲಿ 2 ಓವರ್ ಹಿಂದುಳಿದೆವು. ಇದರಿಂದಾಗಿ ಕೊನೇ 2 ಓವರ್ ವೇಳೆ ಸರ್ಕಲ್ ಹೊರಗೆ 4 ಫೀಲ್ಡರ್ಗಳಷ್ಟೇ ಇರಬೇಕಾಯಿತು’ ಎಂದು ಪಾಂಟಿಂಗ್ ಹೇಳಿದ್ದಾರೆ.
ಕೆಕೆಆರ್ ತಂಡದ 273 ರನ್ ಸವಾಲಿಗೆ ಪ್ರತಿಯಾಗಿ ಡೆಲ್ಲಿ 17.2 ಓವರ್ಗಳಲ್ಲಿ 166 ರನ್ಗಳಿಗೆ ಸರ್ವಪತನ ಕಂಡಿತು. ಮಿಚೆಲ್ ಸ್ಟಾರ್ಕ್ (25ಕ್ಕೆ 2), ವೈಭವ್ ಅರೋರ (27ಕ್ಕೆ 3) ಬಿಗಿ ದಾಳಿ ಎದುರು ಡೆಲ್ಲಿ 33 ರನ್ಗಳಿಗೆ 4 ವಿಕೆಟ್ ಕಳೆದುಕೊಂಡು ಸೋಲಿನ ಸುಳಿಗೆ ಸಿಲುಕಿತು. ಬಳಿಕ ನಾಯಕ ರಿಷಭ್ ಪಂತ್ (55) ಮತ್ತು ಟ್ರಿಸ್ಟಾನ್ ಸ್ಟಬ್ಸ್ (54) ಬಿರುಸಿನ ಅರ್ಧಶತಕ ಬಾರಿಸಿದರೂ, ಸೋಲಿನ ಅಂತರ ತಗ್ಗಿಸಲಷ್ಟೇ ಶಕ್ತರಾದರು. ಭಾರಿ ಸೋಲಿನಿಂದ ಡೆಲ್ಲಿ ರನ್ರೇಟ್ಗೆ ಭಾರಿ ಹೊಡೆತ ಬಿದ್ದಿದ್ದು, ಅಂಕಪಟ್ಟಿಯಲ್ಲಿ 9ನೇ ಸ್ಥಾನಕ್ಕೆ ಕುಸಿದಿದೆ.
*ಕ್ರಿಕೆಟ್ನಲ್ಲಿ ಬ್ಯಾಟಿಂಗ್ ಪ್ರಮುಖವಾದುದು. ಹೀಗಾಗಿ ನಾನು ಬ್ಯಾಟಿಂಗ್ನಲ್ಲಿ ಹೆಚ್ಚಿನ ಕೊಡುಗೆ ನೀಡಲು ಬಯಸಿರುವೆ. ಜತೆಗೆ ಬೌಲಿಂಗ್ಅನ್ನೂ ಆನಂದಿಸುತ್ತಿರುವೆ. ತಂಡಕ್ಕಾಗಿ ಆಡುವುದಷ್ಟೇ ನನ್ನ ಕೆಲಸ.
|ಸುನೀಲ್ ನಾರಾಯಣ್, ಪಂದ್ಯಶ್ರೇಷ್ಠ
2: ಕೆಕೆಆರ್ ತಂಡ ಐಪಿಎಲ್ನಲ್ಲಿ 2 ಬಾರಿ 100ಕ್ಕೂ ಅಧಿಕ ರನ್ಗಳಿಂದ ಗೆದ್ದ ಮುಂಬೈ ಸಾಧನೆ ಸರಿಗಟ್ಟಿತು. ಆರ್ಸಿಬಿ 4 ಬಾರಿ ಗೆದ್ದಿರುವುದು ದಾಖಲೆಯಾಗಿದೆ.
*21: ಕೆಕೆಆರ್ ತಂಡ ಐಪಿಎಲ್ನಲ್ಲಿ 21ನೇ ಬಾರಿ 200 ಪ್ಲಸ್ ಮೊತ್ತ ಪೇರಿಸಿತು. ಸಿಎಸ್ಕೆ (29), ಆರ್ಸಿಬಿ (24), ಮುಂಬೈ (23) ಮೊದಲ 3 ಸ್ಥಾನದಲ್ಲಿವೆ.
IPL 2024: ಶಶಾಂಕ್ ಶೈನಿಂಗ್; ಗುಜರಾತ್ ಎದುರು ಪಂಜಾಬ್ಗೆ ರೋಚಕ ಜಯ