ಚೆನ್ನೈ: ರಮ್ಮಿ ಮತ್ತು ಪೋಕರ್ನಂಥ ಆನ್ಲೈನ್ ಜೂಜಾಟಗಳಲ್ಲಿ ತೊಡಗಿದವರಿಗೆ ಎರಡು ವರ್ಷದವರೆಗಿನ ಜೈಲು ಶಿಕ್ಷೆ ವಿಧಿಸುವ ಕಾನೂನು ತರಲು ತಮಿಳುನಾಡು ಸರ್ಕಾರ ಮುಂದಾಗಿದೆ. ಕಂಪ್ಯೂಟರ್ ಅಥವಾ ಮೊಬೈಲ್ ಫೋನ್ ಬಳಸಿ ಜೂಜು ಅಥವಾ ಬೆಟ್ಟಿಂಗ್ ಉಳ್ಳ ಆನ್ಲೈನ್ ಗೇಮ್ಸ್ ಆಡುವುದನ್ನು ನಿಷೇಧಿಸುವುದಕ್ಕೆ ವಿವಿಧ ಕಾನೂನುಗಳಿಗೆ ತಿದ್ದುಪಡಿ ತರುವ ವಿಧೇಯಕವನ್ನು ರಾಜ್ಯ ವಿಧಾನಸಭೆಯಲ್ಲಿ ಗುರುವಾರ ಮಂಡಿಸಲಾಗಿದೆ.
ಈ ತಿದ್ದುಪಡಿ ವಿಧೇಯಕವು ಅಂಗೀಕೃತವಾದಲ್ಲಿ ಆನ್ಲೈನ್ ಮಾಧ್ಯಮದಲ್ಲಿ ವೇಗರ್ ಅಥವಾ ಬೆಟ್ ಹೊಂದಿರುವ ಯಾವುದೇ ಆಟಗಳನ್ನು ಆಡುವುದು ಅಪರಾಧವಾಗಲಿದೆ. ಈ ರೀತಿಯ ಜೂಜಾಟಗಳನ್ನು ಆಯೋಜಿಸುವುದು ಕೂಡ ಅಪರಾಧವಾಗಲಿದ್ದು, ಯಾವುದಾದರೂ ಕಂಪೆನಿಯು ಈ ಕೃತ್ಯದಲ್ಲಿ ತೊಡಗಿದಲ್ಲಿ ಕಂಪೆನಿ ಮಾಲೀಕರೊಂದಿಗೆ ಜವಾಬ್ದಾರಿಯುತ ಹುದ್ದೆಗಳಲ್ಲಿ ಕಾರ್ಯನಿರ್ವಹಿಸುವ ಸಿಬ್ಬಂದಿ ಕೂಡ ಶಿಕ್ಷೆಗೆ ಗುರಿಯಾಗಲಿದ್ದಾರೆ. ತಪ್ಪಿತಸ್ಥರಿಗೆ ಎರಡು ವರ್ಷದವರೆಗಿನ ಜೈಲು ಶಿಕ್ಷೆ ಅಥವಾ ಹತ್ತು ಸಾವಿರ ರೂಪಾಯಿವರೆಗಿನ ದಂಡ ಅಥವಾ ಈ ಎರಡೂ ಶಿಕ್ಷೆಗಳನ್ನು ವಿಧಿಸುವ ಪ್ರಸ್ತಾವನೆ ವಿಧೇಯಕದಲ್ಲಿದೆ.
ಇದನ್ನೂ ಓದಿ: ಒಂದೇ ಗಂಟೆಯಲ್ಲಿ ₹365 ಕೋಟಿ ದುಡಿಯುವ ಆಸೆಯೆ? ಹಾಗಿದ್ದರೆ ಇಲ್ಲಿದೆ ನಿಮಗೊಂದು ಚಾಲೆಂಜ್!
“ಇತ್ತೀಚೆಗೆ ರಮ್ಮಿ, ಪೋಕರ್ ಇತ್ಯಾದಿ ಆಟಗಳನ್ನು ಕಂಪ್ಯೂಟರ್ ಅಥವಾ ಮೊಬೈಲ್ ಫೋನ್ ಬಳಸಿ ದುಡ್ಡಿಗಾಗಿ ಇಲ್ಲ ಇತರ ಸ್ಟೇಕ್ಸ್ಗಾಗಿ ಆಡುತ್ತಿರುವುದು ಹೆಚ್ಚಿದೆ. ಇದರಿಂದ ಮುಗ್ಧ ಜನರು ವಂಚನೆಗೊಳಗಾಗಿದ್ದು, ಆತ್ಮಹತ್ಯೆಯ ಘಟನೆಗಳು ಕೂಡ ವರದಿಯಾಗಿವೆ. ಆದ್ದರಿಂದ ಆನ್ಲೈನ್ ಜೂಜಾಟದ ದುಷ್ಪರಿಣಾಮಗಳಿಂದ ಜನರನ್ನು ಕಾಪಾಡಲು ಕಾನೂನು ಅವಶ್ಯಕವಾಗಿದೆ” ಎಂದು ವಿಧೇಯಕದ ಆಶಯಗಳಲ್ಲಿ ವಿವರಿಸಲಾಗಿದೆ.
ಈ ಮುನ್ನ ತಮಿಳುನಾಡು ರಾಜ್ಯ ಸರ್ಕಾರವು 2020ರ ನವೆಂಬರ್ ತಿಂಗಳಲ್ಲಿ ಆನ್ಲೈನ್ ಜೂಜನ್ನು ನಿಷೇಧಿಸಿ ಸುಗ್ರೀವಾಜ್ನೆ ಜಾರಿಗೊಳಿಸಿತ್ತು. ಅದರ ಸ್ಥಾನದಲ್ಲಿ, ತಮಿಳುನಾಡು ಗೇಮಿಂಗ್ ಆ್ಯಕ್ಟ್ – 1930, ಚೆನ್ನೈ ಸಿಟಿ ಪೊಲೀಸ್ ಆ್ಯಕ್ಟ್ -1888 ಮತ್ತು ತಮಿಳುನಾಡು ಜಿಲ್ಲಾ ಪೊಲೀಸ್ ಕಾಯ್ದೆ – 1859 ಇವುಗಳಿಗೆ ಕೆಲವು ಬದಲಾವಣೆಗಳನ್ನು ಮಾಡಿ ಕಾನೂನು ಜಾರಿಗೊಳಿಸಲು ಈ ಮೂಲಕ ಸರ್ಕಾರ ಮುಂದಾಗಿದೆ.(ಏಜೆನ್ಸೀಸ್)
ಕರೊನಾ ಲಸಿಕೆ ಪಡೆಯಲು ಆರೋಗ್ಯ ಸಿಬ್ಬಂದಿ ಹಿಂದೇಟು: ಕಾರಣ ಕೇಳಿದ್ರೆ ಶಾಕ್ ಆಗ್ತೀರಾ!
ಅತ್ತ ಅಮೆರಿಕದಲ್ಲಿ ಟೆಕ್ಕಿ ಪತಿ ವಾಸ: ಇತ್ತ ಮಗಳ ಜತೆ ಮಹಿಳೆ ನೇಣಿಗೆ ಶರಣಾಗಿದ್ದೇಕೆ?