ನೀಲಿತಾರೆಗೆ ಹಣ ನೀಡಿದ ಪ್ರಕರಣ: ಡೊನಾಲ್ಡ್​ ಟ್ರಂಪ್​ಗೆ ಎದುರಾಯ್ತು ಸಂಕಷ್ಟ, ಪ್ರತಿಭಟನೆಗೆ ಕರೆ

ನ್ಯೂಯಾರ್ಕ್​: ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಅವರಿಗೆ ಬಂಧನ ಭೀತಿ ಕಾಡುತ್ತಿದ್ದು, ಪ್ರತಿಭಟನೆ ಮಾಡುವಂತೆ ತನ್ನ ಬೆಂಬಲಿಗರಿಗೆ ಟ್ರಂಪ್​ ಕರೆ ನೀಡಿದ್ದಾರೆ.

2016ರ ಚುನಾವಣೆಗೂ ಮುನ್ನ ಯಾವುದನ್ನೂ ಬಹಿರಂಗಪಡಿಸದಂತೆ ನೀಲಿತಾರೆಯ ಬಾಯಿ ಮುಚ್ಚಿಸಲು ಹಣ ನೀಡಿರುವ ಆರೋಪಕ್ಕೆ ಸಂಬಂಧಿಸಿದಂತೆ ಟ್ರಂಪ್​ಗೆ ಬಂಧನ ಭೀತಿ ಕಾಡುತ್ತಿದೆ.

ಮ್ಯಾನಹಟ್ಟನ್​ ಡಿಸ್ಟ್ರಿಕ್ಟ್​ ಅಟಾರ್ನಿ ಆಫೀಸ್​ನಿಂದ ಸೋರಿಕೆಯಾದ ವರದಿನ್ನು ಉಲ್ಲೇಖಿಸಿ ಶನಿವಾರ ಬೆಳಗ್ಗೆ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿರುವ ಟ್ರಂಪ್​, ಮುಂದಿನ ಮಂಗಳವಾರ ನಾನು ಬಂಧನವಾಗುವ ಸಾಧ್ಯತೆ ಇದೆ. ದೇಶದಲ್ಲಿ ಮತ್ತೆ ಪ್ರತಿಭಟನೆ ಮರುಕಳಿಸಿದೆ ಎನ್ನುವ ಮೂಲಕ ತನ್ನ ಬೆಂಬಲಿಗರಿಗೆ ಪ್ರತಿಭಟನೆಗೆ ಕರೆ ನೀಡಿದ್ದಾರೆ.

2016ರ ಚುನಾವಣೆಗೂ ಮುನ್ನ ನೀಲಿತಾರೆ ಸ್ಟಾರ್ಮಿ ಡೇನಿಯಲ್ಸ್​ (ನಿಜವಾದ ಹೆಸರು ಸ್ಟೆಫೇನಿ ಕ್ಲಿಪ್ಫೋರ್ಡ್​)ಗೆ 1,30,000 ಡಾಲರ್​ ನೀಡಿರುವ ಆರೋಪ ಟ್ರಂಪ್​ ಮೇಲಿದೆ. ವರ್ಷಗಳ ಕಾಲ ಡೇನಿಯಲ್ಸ್​ ಜೊತೆ ಟ್ರಂಪ್​ ಸಂಬಂಧ ಹೊಂದಿದ್ದರು ಎಂದು ಹೇಳಲಾಗಿದ್ದು, ಇಬ್ಬರ ನಡುವಿನ ಸಂಬಂಧವನ್ನು ಬಹಿರಂಗಪಡಿಸದಂತೆ ಬಾಯಿ ಮುಚ್ಚಿಸಲು ಹಣ ನೀಡಿದ್ದರು ಎಂಬುದು ತನಿಖೆಯಲ್ಲಿ ತಿಳಿದುಬಂದಿದೆ.

ಇದನ್ನೂ ಓದಿ: ಚಿನ್ನದ ದರ ರೂ. 60 ಸಾವಿರಕ್ಕೆ? ಬೆಲೆಬಾಳುವ ಲೋಹಗಳ ಬೆಲೆ ಏರಿಕೆಯ ಸಾಧ್ಯತೆ

ಈ ಪ್ರಕರಣದಲ್ಲಿ ಟ್ರಂಪ್ ವಿರುದ್ಧ ಆರೋಪ ಹೊರಿಸಬೇಕೆ ಎಂದು ಸದ್ಯ ಪ್ರಾಸಿಕ್ಯೂಟರ್‌ಗಳು ಚಿಂತನೆ ನಡೆಸುತ್ತಿದ್ದಾರೆ. ಒಂದು ವೇಳೆ ಮ್ಯಾನ್‌ಹ್ಯಾಟನ್ ಜಿಲ್ಲಾ ವಕೀಲರು, ಟ್ರಂಪ್‌ ಅವರ ವಿರುದ್ಧ ದೋಷಾರೋಪಣೆ ಮಾಡಿದರೆ, 76 ವರ್ಷ ವಯಸ್ಸಿನ ಟ್ರಂಪ್​ ಅಪರಾಧದ ಆರೋಪ ಹೊತ್ತ ಅಮೆರಿಕದ ಮೊದಲ ಮಾಜಿ ಅಧ್ಯಕ್ಷರಾಗುತ್ತಾರೆ.

ಈ ಬಗ್ಗೆ ಟ್ರಂಪ್ ಅವರ ವಕೀಲರು ಶುಕ್ರವಾರ ಸಂಜೆಯೇ ಸಿಎನ್‌ಬಿಸಿ ಮಾಧ್ಯಮಕ್ಕೆ ಪ್ರತಿಕ್ರಿಯಿಸಿ, ಮ್ಯಾನ್‌ಹ್ಯಾಟನ್ ಗ್ರ್ಯಾಂಡ್ ಜ್ಯೂರಿಯು ಟ್ರಂಪ್​ ವಿರುದ್ಧ ದೋಷಾರೋಪಣೆ ಹೊರಿಸಿದರೆ, ಟ್ರಂಪ್​ ಅವರು ಕ್ರಿಮಿನಲ್ ಆರೋಪಗಳನ್ನು ಎದುರಿಸಲಿದ್ದಾರೆ ಎಂದು ತಿಳಿಸಿದ್ದಾರೆ.

ಇನ್ನೊಂದೆಡೆ ನೀಲಿತಾರೆ ಡೇನಿಯಲ್ಸ್ ಜೊತೆಗಿನ ಸಂಬಂಧವನ್ನು ಡೊನಾಲ್ಡ್​ ಟ್ರಂಪ್ ನಿರಾಕರಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/hiriyur-mla-purnima-srinivas-is-expected-to-join-the-congress/

https://www.vijayavani.net/health-department-to-implement-esma-against-health-workers/

https://www.vijayavani.net/munirathna-announce-controversial-character-urigowda-nanjegowda-movie/