ಪಾಟನಾ: ಬಿಹಾರ ದಲ್ಲಿ ಸಾಮಾಜಿಕ ಗುಂಪುಗಳನ್ನು ರಾಜ್ಯ ಸರ್ಕಾರವು ಎಣಿಸುತ್ತಿದ್ದು ತೃತೀಯ ಲಿಂಗಿಗಳನ್ನು ಪ್ರತ್ಯೇಕ ಜಾತಿ ಎಂದು ಪರಿಗಣಿಸಿದ್ದು ಈಗ ಹೊಸ ವಿವಾದಕ್ಕೆ ಕಾರಣವಾಗಿದೆ.
ಏನಿದು ಬಿಹಾರ ದ ತೃತೀಯ ಲಿಂಗಿಗಳ ಜಾತಿ ವಿವಾದ?
ಬಿಹಾರದ ಜಾತಿಗಳನ್ನು ಈಗ ಕೋಡ್‌ಗಳ ಆಧಾರದ ಮೇಲೆ, ಸಂಖ್ಯೆಗಳ ರೂಪದಲ್ಲಿ ಗುರುತಿಸಲಾಗುವುದು. ಅದಕ್ಕಾಗಿ ಏಪ್ರಿಲ್ 15ರಿಂದ ಮೇ 15ರವರೆಗೆ ಒಂದು ತಿಂಗಳ ಅವಧಿಯಲ್ಲಿ ಎರಡನೇ ಹಂತದ ಜಾತಿ ಆಧಾರಿತ ಎಣಿಕೆಗೆ ಬಳಸಲು ಪ್ರತಿ ಜಾತಿಗೆ ಸಂಖ್ಯಾ ಸಂಕೇತವನ್ನು ನೀಡಲಾಗಿದೆ.
ಉದಾಹರಣೆಗೆ, ಮೈಥಿಲ್, ಕನ್ಯಾಕುಬ್ ಮತ್ತು ಇತರ ಬ್ರಾಹ್ಮಣರ ಉಪ-ವರ್ಗಗಳನ್ನು ಬ್ರಾಹ್ಮಣ ಎಂಬ ಏಕೈಕ ಸಾಮಾಜಿಕ ಘಟಕವಾಗಿ ವಿಲೀನಗೊಳಿಸಲಾಗಿದೆ. ಇದು 126 ರಂತೆ ಜಾತಿ ಕೋಡ್ ಅನ್ನು ಹೊಂದಿರುತ್ತದೆ. ಅದರ ಉಪ-ವರ್ಗಗಳ ಪ್ರತ್ಯೇಕ ಎಣಿಕೆಯನ್ನು ಮಾಡಲಾಗುವುದಿಲ್ಲ.
ಅದೇ ರೀತಿ, ರಜಪೂತರ ಜಾತಿ ಸಂಹಿತೆ 169, ಭೂಮಿಹಾರ್ 142, ಕಾಯಸ್ಥ 21 ಮತ್ತು ‘ತೃತೀಯ ಲಿಂಗಿ’ ಸದಸ್ಯರಿಗೆ 22. ಹೀಗೆ ಒಟ್ಟು 215 ಕೋಡ್‌ಗಳನ್ನು ವಿವಿಧ ಜಾತಿಗಳಿಗೆ ನಿಗದಿಪಡಿಸಲಾಗಿದೆ. ತೃತೀಯ ಲಿಂಗಿಗಳನ್ನು ಪ್ರತ್ಯೇಕ ಜಾತಿ ಎಂದೂ ಪರಿಗಣಿಸಲಾಗಿದೆ.
ಖಡಕ್ ಪ್ರತಿಕ್ರಿಯೆ ಹೀಗಿದೆ!
ಇದೀಗ ನಡೆಯುತ್ತಿರುವ ಕಸರತ್ತಿನಲ್ಲಿ ತೃತೀಯ ಲಿಂಗವನ್ನು ಪ್ರತ್ಯೇಕ ಜಾತಿ ಎಂದು ಪರಿಗಣಿಸುವ ರಾಜ್ಯ ಸರ್ಕಾರದ ಕ್ರಮವನ್ನು ‘ಅಪರಾಧ” ಎಂದು ಬಿಹಾರ ಮೂಲದ ಎನ್‌ಜಿಒ ದೋಸ್ತಾನಸಾಫರ್‌ನ ಸಂಸ್ಥಾಪಕ ಕಾರ್ಯದರ್ಶಿ ರೇಷ್ಮಾ ಪ್ರಸಾದ್ ಹೇಳಿದ್ದಾರೆ. “ಲಿಂಗವನ್ನು ಜಾತಿ ಎಂದು ಗುರುತಿಸುವುದು ಹೇಗೆ? ಮನುಷ್ಯನಿಗೆ, ಅವನು/ಅವಳು ಎಂಬ ಜಾತಿ ಇದೆಯೆ? ಇಲ್ಲ ಎಂದಾದರೆ ‘ತೃತೀಯ ಲಿಂಗವನ್ನು’ ಅನ್ನು ಹೇಗೆ ಜಾತಿ ಎಂದು ಪರಿಗಣಿಸಬಹುದು? ಟ್ರಾನ್ಸ್ ಜೆಂಡರ್ ಸಮುದಾಯಕ್ಕೆ ಸೇರಿದವರು ಯಾವುದೇ ಜಾತಿಯವರಾಗಿರಬಹುದು” ಎಂದು ಅವರು ಆಕ್ರೋಶ ಹೊರ ಹಾಕಿದ್ದಾರೆ
ಈ ಕ್ರಮವು ತೃತೀಯಲಿಂಗಿಗಳ ತಾರತಮ್ಯವನ್ನು ತಡೆಗಟ್ಟುವ ಕುರಿತು ಮಾತನಾಡುವ ‘ಟ್ರಾನ್ಸ್ ಜೆಂಡರ್ ಜನರ ಹಕ್ಕುಗಳ ರಕ್ಷಣೆ ಮಾಡುತ್ತಿಲ್ಲ ಎಂದು ರೇಷ್ಮಾ ಪ್ರಸಾದ್ ಹೇಳಿದ್ದಾರೆ.
“ವ್ಯಕ್ತಿಯ ಲಿಂಗ ಗುರುತನ್ನು ಜಾತಿ ಎಂದು ಪರಿಗಣಿಸದಂತೆ ರಾಜ್ಯ ಸರ್ಕಾರದ ಸಮಾಜ ಕಲ್ಯಾಣ ಇಲಾಖೆ ಈ ವಿಷಯದಲ್ಲಿ ಮಧ್ಯಪ್ರವೇಶಿಸಬೇಕು. ಈ ನಿಟ್ಟಿನಲ್ಲಿ ನಾನು ಖಂಡಿತವಾಗಿಯೂ ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರಿಗೆ ಪತ್ರ ಬರೆದು ಈ ವಿಚಾರದಲ್ಲಿ ತಕ್ಷಣ ಮಧ್ಯಪ್ರವೇಶಿಸುವಂತೆ ಕೋರುತ್ತೇನೆ. ಲಿಂಗಾಯತ ಸಮುದಾಯಕ್ಕೆ ಸೇರಿದ ಜನರಿಗೆ ಇದು ಸಂಪೂರ್ಣ ಅನ್ಯಾಯವಾಗಿದೆ” ಎಂದಿದ್ದಾರೆ. (ಏಜೆನ್ಸೀಸ್)