ಬೆಂಗಳೂರು: ರಾಜ್ಯ ರಾಜಧಾನಿಯಲ್ಲೇ ಫೋಟೋ ಸ್ಟುಡಿಯೋ ನಡೆಸಿಕೊಂಡಿದ್ದ ಖದೀಮನೊಬ್ಬ ಮಾಡಲಿಂಗ್ ಕ್ಷೇತ್ರದಲ್ಲಿ ನೌಕರಿ ಕೊಡಿಸುವುದಾಗಿ ಆಮಿಷವೊಡ್ಡಿ ದೇಶದ ಯುವತಿಯರನ್ನು ಅರಬ್ ದೇಶಗಳಿಗೆ ಕಳ್ಳ ಸಾಗಣೆ ಮಾಡುತ್ತಿದ್ದ ದಂಧೆಯನ್ನು ಸಿಸಿಬಿ ಪೊಲೀಸರು ಭೇದಿಸಿದ್ದಾರೆ.
ಮಾನವ ಕಳ್ಳ ಸಾಗಾಣಿಕೆ ಆರೋಪಿ ಕೊಪ್ಪಳ ಜಿಲ್ಲೆ ಅಲವಾಂಡಿ ಮೂಲದ ಬಸವರಾಜ್ ಶಂಕರಪ್ಪ ಕಳಸದ್ (43) ನನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ. ಸಿನಿಮಾ ರಂಗದಲ್ಲಿ ಕೆಲಸ ಮಾಡುತ್ತಿದ್ದ ಸಹ ಕಲಾವಿದರನ್ನೇ ಟಾರ್ಗೆಟ್ ಮಾಡುತ್ತಿದ್ದ ಆರೋಪಿ, ಕಡಿಮೆ ಹಣಕ್ಕೆ ದುಡಿಯುತ್ತಿರುವ ನಿಮಗೆ ವಿದೇಶದಲ್ಲಿ ಕೈತುಂಬ ವೇತನ ಕೊಡಿಸುತ್ತೇನೆ. ನನಗೆ ಅಂತಾರಾಷ್ಟ್ರೀಯ ಮಟ್ಟದ ಮಾಡಲಿಂಗ್ ಕ್ಷೇತ್ರದಲ್ಲಿ ಬಹಳ ಮಂದಿಯ ಪರಿಚಯವಿದೆ, ವಿದೇಶದಲ್ಲಿ ಕೆಲಸ ಕೊಡಿಸುವೆ ಎಂದೆಲ್ಲ ಪುಸಲಾಯಿಸಿ ಯುವತಿಯರನ್ನು ವಿದೇಶಕ್ಕೆ ಸಾಗಾಟ ಮಾಡಿಸುತ್ತಿದ್ದ. ಅಲ್ಲಿಗೆ ಹೋದ ಮೇಲೆ ಅವರನ್ನು ಡಾನ್ಸ್ ಬಾರ್ಗಳಲ್ಲಿ ಡಾನ್ಸರ್ ಕೆಲಸಕ್ಕೆ ಬಲವಂತವಾಗಿ ದೂಡುತ್ತಿದ್ದ. ಒಬ್ಬ ಯುವತಿಯನ್ನು ವಿದೇಶಕ್ಕೆ ಕಳುಹಿಸಿದರೆ 20 ಸಾವಿರ ರೂ. ಕಮಿಷನ್ ದೊರೆಯುತ್ತಿತ್ತು.
ಇದನ್ನೂ ಓದಿರಿ ಆಸ್ಪತ್ರೆಗಳ ನಿರ್ಲಕ್ಷ್ಯಕ್ಕೆ ಮತ್ತೊಂದು ಬಲಿ, ಚಿಕಿತ್ಸೆ ಸಿಗದೆ 7 ತಿಂಗಳ ಮಗು ಸಾವು
ಬಸವರಾಜ್ ಶಂಕರಪ್ಪ ಕಳಸದ್ನ ಮೋಸದ ಜಾಲಕ್ಕೆ ಸಿಲುಕಿದ್ದ ಕರ್ನಾಟಕ, ಆಂಧ್ರಪ್ರದೇಶ, ಕೇರಳ, ತೆಲಂಗಾಣ, ತಮಿಳುನಾಡಿನ 9 ಯುವತಿಯರನ್ನು ರಕ್ಷಣೆ ಮಾಡಿ ವಿದೇಶದಿಂದ ಭಾರತಕ್ಕೆ ಕರೆತಂದು ಅವರ ಹುಟ್ಟೂರಿಗೆ ಬಿಡಲಾಗಿದೆ ಎಂದು ಸಿಸಿಬಿ ಅಧಿಕಾರಿಗಳು ತಿಳಿಸಿದ್ದಾರೆ.
ಮಾಡೆಲಿಂಗ್ ಆಗುವ ಆಸೆಯಲ್ಲಿ ಹೋದ ಯುವತಿಯರು ಅನಿವಾರ್ಯವಾಗಿ ಫುಜೈರಾ ಮತ್ತು ಯುಎಇನಲ್ಲಿ ಡಾನ್ಸ್ ಬಾರ್ನಲ್ಲಿ ಕೆಲಸ ಮಾಡುತ್ತಿದ್ದರು. ಅಲ್ಲದೆ, ಯುವತಿಯರ ವೀಸಾವನ್ನು ಡಾನ್ಸ್ ಬಾರ್ ಮಾಲೀಕ ಕಸಿದುಕೊಂಡಿದ್ದ. ವಿಶ್ವದೆಲ್ಲೆಡೆ ಕೋವಿಡ್ ಸೋಂಕು ವ್ಯಾಪಿಸಿದಾಗ ಯುವತಿಯರು ಉದ್ಯೋಗ ಕಳೆದುಕೊಂಡಿದ್ದರು. ವಾಪಸ್ ಸ್ವದೇಶಕ್ಕೆ ಹೋಗಬೇಕೆಂದು ಚಡಪಡಿಸುತ್ತಿದ್ದರೂ ವೀಸಾ ಕೈಸೇರಲೇ ಇಲ್ಲ. ದಿಕ್ಕು ತೋಚದ ಯುವತಿಯರು, ರಾಷ್ಟ್ರೀಯ ಮಹಿಳಾ ಆಯೋಗಕ್ಕೆ ಇ-ಮೇಲ್ ಮೂಲಕ ಪತ್ರ ರವಾಹಿಸಿದ್ದರು. ಎಚ್ಚೆತ್ತ ರಾಷ್ಟ್ರೀಯ ಮಹಿಳಾ ಆಯೋಗದ ಅಧ್ಯಕ್ಷೆ ರೇಖಾ ಶರ್ಮಾ ಅವರು, ಬೆಂಗಳೂರು ಮೂಲದ ವ್ಯಕ್ತಿ ಅರಬ್ ದೇಶಗಳಿಗೆ ಮಾನವ ಕಳ್ಳ ಸಾಗಾಣೆಕೆ ದಂಧೆಯಲ್ಲಿ ತೊಡಗಿರುವ ಕುರಿತು ರಾಜ್ಯ ಪೊಲೀಸ್ ಮಹಾನಿರ್ದೇಶಕ ಪ್ರವಿಣ್ ಸೂದ್ಗೆ ಪತ್ರ ಬರೆದಿದ್ದರು.
ಇದನ್ನೂ ಓದಿರಿ ಲೇಡೀಸ್ ಜತೆ ಸೆಕ್ಸ್ ಜಾಬ್! ಕೆಲಸಕ್ಕೆ ಸೇರಿದ ಟೆಕ್ಕಿ ಕಥೆ ಏನಾಯ್ತು?
ಪ್ರಕರಣದ ತನಿಖೆಯನ್ನು ಜಂಟಿ ಪೊಲೀಸ್ ಆಯುಕ್ತ(ಅಪರಾಧ) ಸಂದೀಪ್ ಪಾಟೀಲ್ಗೆ ಪ್ರವಿಣ್ ಸೂದ್ ವಹಿಸಿದ್ದರು. ಸಿಸಿಬಿ ವಿಶೇಷ ತಂಡ ತನಿಖೆ ಕೈಗೊಂಡು ಸಂತ್ರಸ್ತ ಯುವತಿಯರ ವಿಚಾರಣೆ ನಡೆಸಿದಾಗ ಬಸವರಾಜ್ ಹೆಸರು ಮತ್ತು ನಂದಿನಿ ಲೇಔಟ್ನಲ್ಲಿ ಪೋಟೋ ಸ್ಟುಡಿಯೋ ನಡೆಸುತ್ತಿದ್ದ ಬಗ್ಗೆ ಸುಳಿವು ಸಿಕ್ಕಿತ್ತು. ಸಿಸಿಬಿ ಪೊಲೀಸರು ನಂದಿನಿ ಲೇಔಟ್ಗೆ ಹೋದಾಗ ಬಸವರಾಜ್ ಒಂದು ವರ್ಷದ ಹಿಂದೆಯೇ ಸ್ಟುಡಿಯೋ ಖಾಲಿ ಮಾಡಿರುವುದು ಗೊತ್ತಾಯ್ತು. ಅಲ್ಲದೆ ಆರೋಪಿಯು ಈ ಮೊದಲು ಸ್ಟುಡಿಯೋ ಕಟ್ಟಡದ ಟೆರೆಸ್ ಮೇಲೆ ಯುವತಿಯರನ್ನು ಕರೆದೊಯ್ದು ಪೋಟೋ ತೆಗೆಯುತ್ತಿದ್ದ ಎಂಬ ಮಾಹಿತಿ ಸಿಕ್ಕಿದೆ.
ಬಳಿಕ ದುಬೈಗೆ ವಿಮಾನ ಟಿಕೆಟ್ ಮತ್ತು ವೀಸಾ ಮಾಡಿಸಿಕೊಳ್ಳುವ ವ್ಯಕ್ತಿಗಳ ಮಾಹಿತಿ ಕಲೆ ಹಾಕಿದಾಗ ಬಸವರಾಜ್ ಸುಳಿವು ಲಭ್ಯವಾಯಿತು. ಹೊಸ ನಂಬರ್ ಜಾಡು ಹಿಡಿದು ಹೊರಟ ಸಿಸಿಬಿ ಪೊಲೀಸರಿಗೆ ಆರೋಪಿ ಬಸವರಾಜ್, ಬೆಂಗಳೂರು, ಚೆನ್ನೈ ಮತ್ತು ದೆಹಲಿಯಲ್ಲಿ ಮದ್ರಾಸ್ ಕ್ಯಾಸ್ಟಿಂಗ್ಸ್ ಇಂಟರ್ನ್ಯಾಷನಲ್ ಈವೆಂಟ್ ಸಂಸ್ಥೆ ಮಾಲೀಕ ಎಂಬುದು ಗೊತ್ತಾಯ್ತು. ಅಲ್ಲದೆ ದೇಶದ ವಿವಿಧ ರಾಜ್ಯಗಳಲ್ಲಿ ಆರೋಪಿ ಬಸವರಾಜ್ಗೆ ಸಂಪರ್ಕವಿದ್ದು, ಮಾನವ ಕಳ್ಳ ಸಾಗಣೆ ದಂಧೆಯಲ್ಲಿ ಮತ್ತಷ್ಟು ಮಂದಿ ಕೈ ಜೋಡಿಸಿರುವ ಬಗ್ಗೆ ಮಾಹಿತಿ ಇದೆ. ಆರೋಪಿಗಳ ಬಂಧನಕ್ಕೆ ಬಲೆಬೀಸಲಾಗಿದೆ ಎಂದು ಪೊಲೀಸ್ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.
‘ಅಪ್ಪ.. ಯಾವ ಕಾಲೇಜಿಗೆ ಸೇರಿಸುತ್ತಿದ್ದೆ?’ ಎಂದ ಮಗ ಬಾರದ ಲೋಕಕ್ಕೆ ಸೇರಿಯೇಬಿಟ್ಟ!