ಮುಂಬೈ: ಕರೋನಾ ವೈರಸ್ ಆತಂಕ ಜಾಗತಿಕ ಅರ್ಥ ವ್ಯವಸ್ಥೆಯನ್ನು ತಲ್ಲಣಗೊಳಿಸಿದ್ದು, ಅದರ ಪರಿಣಾಮ ಷೇರುಪೇಟೆ ಹೂಡಿಕೆದಾರರು ರಕ್ತಕಣ್ಣೀರು ಸುರಿಸತೊಡಗಿದ್ದಾರೆ. ಭಾರತೀಯ ಷೇರುಪೇಟೆಯಲ್ಲಿ ಶುಕ್ರವಾರ ಬೆಳಗ್ಗೆ ಆರಂಭಿಕ ವಹಿವಾಟಿನಲ್ಲೇ ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್ (ಬಿಎಸ್ಇ) ಸೂಚ್ಯಂಕ ಸೆನ್ಸೆಕ್ಸ್ 3,000 ಅಂಶ ಕುಸಿತ ಕಂಡಿತು. ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ (ಎನ್ಎಸ್ಇ) ಸೂಚ್ಯಂಕ ನಿಫ್ಟಿ 960 ಅಂಶ ಕುಸಿದು ಹೂಡಿಕೆದಾರರಲ್ಲಿ ಆತಂಕ, ಕಳವಳ ಮೂಡಿಸಿತು.
ಸೆನ್ಸೆಕ್ಸ್ 3,000 ಅಂಶ ಏಕಾಕಿಯಾಗಿ ಕುಸಿದು 30,229.20 ತಲುಪಿದ ಕೂಡಲೇ ಬಿಎಸ್ಇ 45 ನಿಮಿಷಗಳ ಕಾಲ ವಹಿವಾಟನ್ನು ಸ್ಥಗಿತಗೊಳಿಸಿತು. ಇದೇ ವೇಳೆ ನಿಫ್ಟಿ 960 ಅಂಶ ಕುಸಿದು8,860.20 ತಲುಪಿತ್ತು. ಎನ್ಎಸ್ಇ ಕೂಡ 45 ನಿಮಿಷಗಳ ಕಾಲ ವಹಿವಾಟು ಸ್ಥಗಿತಗೊಳಿಸಿದೆ. ಸತತ ಮೂರನೇ ದಿನ ಸೆನ್ಸೆಕ್ಸ್ ಭಾರಿ ಅಂಶಗಳ ಕುಸಿತವನ್ನು ದಾಖಲಿಸುತ್ತಿದ್ದು, ಹೂಡಿಕೆದಾರರಲ್ಲಿ ಭಯ ಹೆಚ್ಚಿಸಿದೆ. ಆದಾಗ್ಯೂ, ಕೆಲವೇ ಹೊತ್ತಿನಲ್ಲಿ ಎರಡೂ ಕೇಂದ್ರಗಳಲ್ಲಿ ಮತ್ತೆ ವಹಿವಾಟು ಆರಂಭವಾಗಲಿದೆ.
ಈ ರೀತಿ ಕುಸಿತದ ಸನ್ನಿವೇಶ ಭಾರತೀಯ ಷೇರುಪೇಟೆಯಲ್ಲಷ್ಟೇ ಅಲ್ಲ, ಅಮೆರಿಕ ಮತ್ತು ಇತರೆ ದೇಶಗಳ ಷೇರುಪೇಟೆಗಳನ್ನೂ ಬಾಧಿಸಿದೆ. ಲೆವೆಲ್ -1 ಸರ್ಕ್ಯೂಟ್ ಬ್ರೇಕರ್ ಅಮೆರಿಕದ ಮಾರುಕಟ್ಟೆಯಲ್ಲಿ ಒಂದು ವಾರದಲ್ಲಿ ಎರಡು ಸಲ ದಾಖಲಾಗಿದೆ. ಡೌ ಜೋನ್ಸ್ ಪ್ರಸ್ತುತ 1,696.31 ಅಂಶ ಕುಸಿದು 21,856.91ರಲ್ಲಿ ವಹಿವಾಟು ನಡೆಸಿದೆ. ಇದು ಹಿಂದಿನ ದಿನದ ಕೊನೆಯ ಅಂಶಕ್ಕಿಂತ ಶೇಕಡ 7.02 ಇಳಿಕೆಯಾಗಿದೆ. ಇದೇ ವೇಳೆ ಎಸ್ಆ್ಯಂಡ್ ಪಿ500 ಕೂಡ 192.33 ಅಂಶ ಕುಸಿದು 2,549.05ರಲ್ಲಿ ವಹಿವಾಟು ನಡೆಸಿದೆ. (ಏಜೆನ್ಸೀಸ್)