ನವದೆಹಲಿ: ಬಸ್ನಲ್ಲಿ ಮಹಿಳಾ ಕಂಡಕ್ಟರ್ಗಳು ಕಾಣಸಿಗುವುದು ವಿಶೇಷವೇನಲ್ಲ. ಆದರೆ ಬಸ್ನಲ್ಲಿ ಮಹಿಳೆಯೇ ಚಾಲಕಿಯಾಗಿದ್ದರೆ, ಆಕೆ ಸುಂದರಿಯೂ ಆಗಿದ್ದರೆ ಹಾಗೂ ಪ್ರಯಾಣಿಕರೆಲ್ಲ ನೀವೆಷ್ಟು ಚೆಂದ ಎಂದು ಹೊಗಳಿಯೂ ಹೋದರೆ ಹೇಗಿರಬಹುದು? ಎಂಬುದಕ್ಕೆ ಇಲ್ಲೊಂದು ನಿದರ್ಶನವಿದೆ. ಹೌದು.. ಇಲ್ಲೊಂದು ಕಡೆ ಬಸ್ಗೆ ಸುಂದರಿಯೊಬ್ಬಳೇ ಚಾಲಕಿ. ಮಾತ್ರವಲ್ಲ ಬಸ್ ಡ್ರೈವರ್ ಆಗಬೇಕು ಎಂಬುದು ಈಕೆಯ ಕನಸಾಗಿದ್ದು, ಅದನ್ನು ನನಸು ಕೂಡ ಮಾಡಿಕೊಂಡಿದ್ದಾರೆ. ಆದರೆ ಬಸ್ ಹತ್ತಿದ ಅನೇಕ ಪ್ರಯಾಣಿಕರು ಈಕೆಯ ಸೌಂದರ್ಯವನ್ನು ಹೊಗಳಿ ಹೋಗುವುದು ಮಾತ್ರ ಇವರಿಗೆ ಇರಿಸುಮುರಿಸು ಉಂಟಾಗಿಸುತ್ತಿದೆ ಎಂದು ಹೇಳಿಕೊಂಡಿದ್ದಾರೆ.
ಇಂಗ್ಲೆಂಡ್ನ ಎಸೆಕ್ಸ್ ಎಂಬಲ್ಲಿನ ಜೋಡಿ ಲೀ ಫಾಕ್ಸ್ ಎಂಬ 24ರ ಈ ಮಹಿಳೆ ತನ್ನ 21ನೇ ವಯಸ್ಸಿನಲ್ಲೇ ಬಸ್ ಡ್ರೈವರ್ ಆಗಬೇಕು ಎಂಬ ಕನಸನ್ನು ಈಡೇರಿಸಿಕೊಂಡಿದ್ದು, ಅಂದಿನಿಂದಲೇ ಬಸ್ ಚಾಲಕಿ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಬಸ್ ಹಿಂದೆ ಕಾಣಿಸಿದ್ದ ಜಾಹೀರಾತೊಂದನ್ನು ನೋಡಿ ಅರ್ಜಿ ಸಲ್ಲಿಸಿದ್ದ ಈಕೆ ಕೊನೆಗೂ ಆ ಕೆಲಸವನ್ನು ಗಿಟ್ಟಿಸಿಕೊಂಡಿದ್ದಾಗಿ ಹೇಳಿದ್ದಾರೆ.
ಬಸ್ ಡ್ರೈವರ್ ಕೆಲಸವನ್ನು ಸಂತೋಷದಿಂದಲೇ ಮಾಡುತ್ತಿರುವುದಾಗಿ ಹೇಳಿರುವ ಈಕೆ, ತನ್ನ ನಿವೃತ್ತಿವರೆಗೂ ಎಂದರೆ 40ನೇ ವಯಸ್ಸಿನವರೆಗೂ ಇದೇ ಕೆಲಸದಲ್ಲಿ ಮುಂದುವರಿಯುವುದಾಗಿಯೂ ಹೇಳಿಕೊಂಡಿದ್ದಾರೆ. ಆದರೆ ಬಸ್ನಲ್ಲಿ ಪ್ರಯಾಣಿಸುವವರಲ್ಲಿ ಅದರಲ್ಲೂ ಪುರುಷ ಪ್ರಯಾಣಿಕರಲ್ಲಿ ಹಲವರು ಈಕೆಯ ಸೌಂದರ್ಯದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿಯೇ ಹೋಗುತ್ತಾರಂತೆ. ಕೆಲವರು ನಾನು ನನ್ನ ಜೀವನದಲ್ಲೇ ಇಷ್ಟು ಚೆಂದದ ಬಸ್ ಡ್ರೈವರನ್ನು ನೋಡಿಲ್ಲ ಎಂದರೆ, ಇನ್ನು ಕೆಲವರು ನೀವು ಎಷ್ಟು ಚೆಂದ ಇದ್ದೀರೆಂದರೆ ಬಸ್ ಡ್ರೈವರ್ ಆಗಿರಬಾರದಿತ್ತು ಎಂಬುದಾಗಿಯೂ ಹೇಳುತ್ತಾರಂತೆ. ಏನೇ ಆದರೂ ನಾನು ಬಸ್ ಡ್ರೈವರ್ ಆಗಿಯೇ ಮುಂದುವರಿಯುವುದಾಗಿ ಈಕೆ ಹೇಳಿದ್ದಾರೆ. (ಏಜೆನ್ಸೀಸ್)