ಹುಬ್ಬಳ್ಳಿ: ಜನಸ್ನೇಹಿಯಾಗುವ ಉದ್ದೇಶದಿಂದ ಹುಬ್ಬಳ್ಳಿ- ಧಾರವಾಡ ಪೊಲೀಸ್ ಕಮಿಷನರೇಟ್ ಘಟಕವು ಹಲವು ಕ್ರಮಗಳನ್ನು ಕೈಗೊಂಡಿದೆ. ಇದರಲ್ಲಿ ವೆಬ್ಸೈಟ್ ಒಂದು ಪ್ರಮುಖ ಸಂಗತಿಯಾಗಿದೆ. ಆದರೆ, ಈ ವೆಬ್ಸೈಟ್ ಸದ್ಯ ನಾಪತ್ತೆಯಾಗಿದೆ. ಹುಡುಕಿಕೊಡಿ ಎಂದು ಸಾರ್ವಜನಿಕರೇ ಪೊಲೀಸರಿಗೆ ದೂರು ಕೊಡಬೇಕಾದ ಪರಿಸ್ಥಿತಿ ತಲೆದೋರಿದೆ.
ಕಳೆದ ಎರಡು ತಿಂಗಳಿಂದ ಈ ವೆಬ್ಸೈಟ್ ಕಾರ್ಯನಿರ್ವಹಣೆ ಸ್ಥಗಿತಗೊಂಡಿದೆ. ಹು-ಧಾ ಕಮಿಷನರೇಟ್ ಘಟಕ ಹಲವು ವರ್ಷಗಳಿಂದ www.hublidharwadpolice.com ಹೆಸರಿನ ವೆಬ್ಸೈಟ್ ಹೊಂದಿದೆ. ಇದರಲ್ಲಿ ಅವಳಿ ನಗರದ ಅಪರಾಧ, ಕಾನೂನು ಸುವ್ಯವಸ್ಥೆಯ ಮಾಹಿತಿ, ಎಲ್ಲ ಪೊಲೀಸ್ ಠಾಣೆಗಳ ವಿಳಾಸ, ದೂರವಾಣಿ ಸಂಖ್ಯೆ, ಅಧಿಕಾರಿಗಳ ಮೊಬೈಲ್ಫೋನ್ ಸಂಖ್ಯೆ ಲಭ್ಯವಾಗುತ್ತಿತ್ತು. ಹಿಂದಿನ ಮೂರು ವರ್ಷಗಳ ಅಪರಾಧ, ಅಪಘಾತ, ಕಳ್ಳತನ, ದೊಂಬಿ, ಕೊಲೆ, ಮತ್ತಿತರ ಅಂಕಿ ಅಂಶಗಳು ಕೂಡ ಇದರಲ್ಲಿದ್ದವು.
ಡಿಜಿಟಲ್ ಇಂಡಿಯಾ ಕಲ್ಪನೆಯಲ್ಲಿ ವಿವಿಧ ಇಲಾಖೆಗಳು ಅಪ್ಡೇಟ್ ಆಗುತ್ತಿರುವ ಸಂದರ್ಭದಲ್ಲಿ, ಹು-ಧಾ ಕಮಿಷನರೇಟ್ ಮಾತ್ರ ಇದ್ದ ಒಂದು ವೆಬ್ಸೈಟ್ ಅನ್ನೂ ಬಂದ್ ಮಾಡಿದೆ. ಇನ್ನಾದರೂ ವೆಬ್ಸೈಟ್ಗೆ ಮರುಜೀವ ನೀಡಬೇಕು. ಈ ಮೂಲಕ ಜನಸ್ನೇಹಿಯಾಗಬೇಕು ಎಂಬುದು ಸಾರ್ವಜನಿಕರ ಆಗ್ರಹವಾಗಿದೆ.
ಜಿಲ್ಲಾ ಪೊಲೀಸ್ ವೆಬ್ಸೈಟ್ಗೆ ಜೀವಕಳೆ
ಧಾರವಾಡ ಜಿಲ್ಲಾ ಪೊಲೀಸ್ ಘಟಕ ಜ. 26ರ ಗಣರಾಜ್ಯೋತ್ಸವದಂದು ನೂತನ ವೆಬ್ಸೈಟ್ https://dharwadpolice.karnataka.gov.in ಲೋಕಾರ್ಪಣೆಗೊಳಿಸಿದೆ. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಪಿ. ಕೃಷ್ಣಕಾಂತ ನೇತೃತ್ವದ ತಂಡ ಹೊಸ ವೆಬ್ಸೈಟ್ಗೆ ಜೀವಕಳೆ ತಂದಿದೆ. ಜನಸ್ನೇಹಿ, ನಾಗರಿಕ ಕೇಂದ್ರಿತ ಸೇವೆಗಳನ್ನು ಒಳಗೊಂಡ ಸಮಗ್ರ ಮಾಹಿತಿಯನ್ನು ವೆಬ್ಸೈಟ್ ಮೂಲಕ ನೀಡುತ್ತಿದೆ. ತನ್ಮೂಲಕ ಪೊಲೀಸ್ ಐಟಿ ತಂತ್ರಾಂಶವನ್ನು ಕಾರ್ಯಗತಗೊಳಿಸುವಲ್ಲಿ ಧಾರವಾಡ ಜಿಲ್ಲೆ ರಾಜ್ಯದಲ್ಲೇ 2ನೇ ಸ್ಥಾನ ಪಡೆದಿದೆ.
ತಪ್ಪಿತು ಆನ್ಲೈನ್ ದೂರು ಸಲ್ಲಿಸುವ ಅವಕಾಶ: ಈ ವೆಬ್ಸೈಟ್ನ ಪ್ರಮುಖ ಅನುಕೂಲ ಏನೆಂದರೆ, ಇದರ ಮೂಲಕವೂ ದೂರು ಸಲ್ಲಿಸುವ ಅವಕಾಶವು ಸಾರ್ವಜನಿಕರಿಗೆ ಇತ್ತು.
ಎಫ್ಬಿ ಅಕೌಂಟ್ ಸಕ್ರಿಯ
ಕಮಿಷನರೇಟ್ ಘಟಕದ ಫೇಸ್ಬುಕ್ ಅಕೌಂಟ್ (Hubballi Dharawad city Police) ಸಕ್ರಿಯವಾಗಿದೆ. ಘಟಕದ ಮಾಹಿತಿಗಳನ್ನು ಜನರಿಗೆ ತಲುಪಿಸುತ್ತಿದೆ. ಈವರೆಗೆ 38,264 ಫಾಲೋವರ್ಗಳನ್ನು ಹೊಂದಿದೆ. ಈ ಹಿಂದೆ ಪಾಂಡುರಂಗ ರಾಣೆ ಆಯುಕ್ತರಾಗಿದ್ದಾಗ ಅಪರಾಧ ತಡೆ ಕುರಿತು ಕರಪತ್ರ, ಕಾರ್ಟೂನ್ ಮೂಲಕ ಜಾಗೃತಿ ಮೂಡಿಸುತ್ತಿದ್ದರು.
ವೆಬ್ಸೈಟ್ನಲ್ಲಿ ಕೆಲ ಮಹತ್ವದ ಬದಲಾವಣೆಗಳನ್ನು ಮಾಡಲಾಗುತ್ತಿದೆ. ಮೂರು ದಿನಗಳಲ್ಲಿ ವೆಬ್ಸೈಟ್ ಸಾರ್ವಜನಿಕರಿಗೆ ಲಭ್ಯವಾಗಲಿದೆ. ಕಮಿಷನರೇಟ್ ಘಟಕದಿಂದಲೇ ನಿರ್ವಹಣೆ ಮಾಡಲಾಗುವುದು.
| ಲಾಬುರಾಮ ಹು-ಧಾ ಪೊಲೀಸ್ ಆಯುಕ್ತ