ವಿಜಯವಾಡ: ಅಮೆರಿಕದಲ್ಲಿ ವಾಸವಿರುವ ತೆಲುಗು ದಂಪತಿ ಎಚ್1-ಬಿ ವೀಸಾ ಕೊಡಿಸುವುದಾಗಿ ನಂಬಿಸಿ ಆಂಧ್ರ ಪ್ರದೇಶದ ವಿದ್ಯಾರ್ಥಿಗಳಿಗೆ ಬರೋಬ್ಬರಿ 10 ಕೋಟಿ ರೂಪಾಯಿ ವಂಚಿಸಿರುವ ಆರೋಪ ಕೇಳಿಬಂದಿದೆ.
ವಂಚಕ ದಂಪತಿಯನ್ನು ಮುತ್ಯಾಲಾ ಸುನೀಲ್ ಮತ್ತು ಪ್ರಣೀತಾ ಎಂದು ಗುರುತಿಸಲಾಗಿದೆ. ತಮ್ಮ ಕನ್ಸಲ್ಟೆನ್ಸಿಯಲ್ಲಿ ಎಚ್1-ಬಿ ಮತ್ತು ಎಫ್ 1 ವೀಸಾ ಒದಗಿಸುವುದಾಗಿ ಸುಮಾರು 30 ತೆಲುಗು ವಿದ್ಯಾರ್ಥಿಗಳಿಂದ ತಲಾ 25 ಸಾವಿರ ಡಾಲರ್ (18,45,137 ರೂಪಾಯಿ) ಸಂಗ್ರಹಿಸಿರುವುದಾಗಿ ತಿಳಿದುಬಂದಿದೆ.
ಹಣವನ್ನು ಪಡೆದ ಬಳಿಕ ಸುನೀಲ್ ತನ್ನ ತಂದೆ ಮುತ್ಯಾಲಾ ಸತ್ಯನಾರಾಯಣ ಬ್ಯಾಂಕ್ ಖಾತೆಗೆ ವರ್ಗಾಯಿಸಿದ್ದಾನೆ. ಅಲ್ಲದೆ, ಕೋಟ್ಯಾಂತರ ರೂಪಾಯಿ ಬೆಲೆ ಬಾಳುವ ಆಸ್ತಿಯನ್ನು ಸಹ ಸುನೀಲ್ ಡೆಪಾಸಿಟ್ ಮಾಡಿರುವುದು ಬೆಳಕಿಗೆ ಬಂದಿದೆ.
ಇದನ್ನೂ ಓದಿ: ಶೌಚಕ್ಕೆಂದು ಕಚೇರಿಯಿಂದ ಹೊರಹೋದ ಸರ್ಕಾರಿ ಮಹಿಳಾ ಉದ್ಯೋಗಿಯ ದುರಂತ ಸಾವು..!
ವೀಸಾ ಪಡೆಯಲು ಹಣ ನೀಡಿ ವಂಚನೆಗೊಳಗಾಗಿದ್ದೇವೆ ಎಂಬುದು ವಿದ್ಯಾರ್ಥಿಗಳ ಅರಿವಿಗೆ ಬರುತ್ತಿದ್ದಂತೆ ಅವರಿಗೆ ಶಾಕ್ ಆಗಿದೆ. ತಕ್ಷಣ ದಂಪತಿ ವಿರುದ್ಧ ಅಟ್ಲಾಂಟ ಹೋಮ್ಲ್ಯಾಂಡ್ ಸೆಕ್ಯುರಿಟಿಯಲ್ಲಿ ದೂರು ದಾಖಲಿಸಿದ್ದಾರೆ.
ಸದ್ಯ ಸುನೀಲ್ ಮತ್ತು ಪ್ರಣೀತಾ ನಾಪತ್ತೆಯಾಗಿದ್ದು, ಇಬ್ಬರು ಯೂರೋಪ್ಗೆ ಹೋಗಿ ತಲೆಮರೆಸಿಕೊಂಡಿರುವ ಸಂಶಯ ವ್ಯಕ್ತವಾಗಿದೆ. ವಿದ್ಯಾರ್ಥಿಗಳ ದೂರಿನ ಆಧಾರದ ಮೇಲೆ ಇಂಟರ್ಪೋಲ್ ಇಲಾಖೆ ದಂಪತಿಗೆ ಲುಕೌಟ್ ನೋಟಿಸ್ ನೀಡಿದೆ. ಇತ್ತ ಪಶ್ಚಿಮ ಗೋದಾವರಿ ಜಿಲ್ಲೆಯ ಸತ್ಯನಾರಾಯಣ ಸಹ ನಾಪತ್ತೆಯಾಗಿದ್ದಾರೆ.
ವಿದ್ಯಾರ್ಥಿಗಳಿಗೆ ಸಲಹೆ ನೀಡಿರುವ ಪೊಲೀಸರು ಯಾವುದೇ ಅಧಿಕೃತವಲ್ಲದ ಕನ್ಸಲ್ಟೆಂಟ್ಸ್ಗಳನ್ನು ನಂಬಬೇಡಿ ಎಂದು ಹೇಳಿದ್ದಾರೆ. (ಏಜೆನ್ಸೀಸ್)
ಹನಿಮೂನ್ ಪ್ರವಾಸಕ್ಕೆ 1 ರೂಪಾಯಿ ಖರ್ಚು ಮಾಡಿಲ್ವಂತೆ ಕಾಜಲ್ ದಂಪತಿ: ಐಷಾರಾಮಿ ಸೌಲಭ್ಯ ಫ್ರೀ ಸಿಕ್ಕಿದ್ಹೇಗೆ?