ಹೈದರಾಬಾದ್: ಕರೊನಾ ವೈರಸ್ ಲಾಕ್ಡೌನ್ ಸಮಯದಲ್ಲಿ ಇಂಧನ ಇಲಾಖೆ ಕಳುಹಿಸಿರುವ ವಿದ್ಯುತ್ ಬಿಲ್ ನೋಡಿ ತೆಲಂಗಾಣ ರೈತನೋರ್ವ ಕಂಗಾಲಾಗಿರುವ ಘಟನೆ ನಡೆದಿದೆ.
ಒಂದಲ್ಲ ಎರಡಲ್ಲ ಬರೋಬ್ಬರಿ 7 ಲಕ್ಷ ರೂ. ವಿದ್ಯುತ್ ಬಿಲ್ ಅನ್ನು ತಾಂತ್ರಿಕ ದೋಷದಿಂದ ತೆಲಂಗಾಣದ ಕಾಮರೆಡ್ಡಿ ಜಿಲ್ಲೆಯ ಇರ್ಸೋಜಿವಾಡಿ ಗ್ರಾಮದ ಸಣ್ಣ ರೈತನಿಗೆ ಕಳುಹಿಸಲಾಗಿದೆ. ವಿದ್ಯುತ್ ಬಿಲ್ ಸ್ವೀಕರಿಸುತ್ತಿದ್ದಂತೆ ರೈತ ಜಿ. ಶ್ರೀನಿವಾಸ್ ಶಾಕ್ಗೆ ಒಳಗಾದ ಪ್ರಸಂಗ ಜರುಗಿದೆ. ಇದನ್ನೂ ಓದಿ: VIDEO| ಸಿಲಿಕಾನ್ ಸಿಟಿಗೆ ಕಾದಿದೆಯಾ ಮಹಾ ಗಂಡಾಂತರ…?!
ಮಾರ್ಚ್ನಿಂದ ಮೇ ವರೆಗಿನ ವಿದ್ಯುತ್ ಬಿಲ್ ಅನ್ನು ಕಳುಹಿಸಲಾಗಿತ್ತು. ಆದರೆ, ರೈತನ ಮನೆಯಲ್ಲಿರುವುದು ಮೂರು ಬಲ್ಬ್, ಟಿವಿ ಹಾಗೂ ಎರಡು ಫ್ಯಾನ್ ಮಾತ್ರ. ಸಾಮಾನ್ಯವಾಗಿ ತಿಂಗಳಿಗೆ 500 ರೂ. ಬರುತ್ತಿದ್ದ ಬಿಲ್ ಇದೀಗ 7,29,417 ರೂ. ಬಂದಿರುವುದು ಸಹಜವಾಗಿಯೇ ಆತಂಕಕ್ಕೆ ಕಾರಣವಾಗಿದೆ.
ಫೆಬ್ರವರಿಯಲ್ಲಿ 415 ರೂ. ಪಾವತಿಸಿದ್ದ ಶ್ರೀನಿವಾಸ್ ಬಾಕಿ ಮೊತ್ತವನ್ನು ಉಳಿಸಿಕೊಂಡಿದ್ದರು. ಮಾರ್ಚ್, ಏಪ್ರಿಲ್ ಮತ್ತು ಮೇ ತಿಂಗಳ ಲಾಕ್ಡೌನ್ ಹಿನ್ನೆಲೆಯಲ್ಲಿ ಹಣ ಪಾವತಿಸಲು ಸಾಧ್ಯವಾಗಿರಲಿಲ್ಲ. ಮೀಟರ್ ರೀಡಿಂಗ್ ನೋಡದೇ ಬಿಲ್ ಮಾಡಿರುವುದು ಈ ಗೊಂದಲಕ್ಕೆ ಕಾರಣವಾಗಿದೆ. ಇದನ್ನೂ ಓದಿ: ಮಧ್ಯರಾತ್ರಿ ಪತ್ನಿಯನ್ನು ಕೊಂದು ಪೊಲೀಸ್ ಠಾಣೆಗೆ ಬಂದ ಭೂಪ!
ತಾಂತ್ರಿಕ ದೋಷದಿಂದ ಹೀಗಾಗಿದ್ದು, ಸರಿಪಡಿಸಿ ಹೊಸ ಬಿಲ್ ನೀಡುವುದಾಗಿ ಅಲ್ಲಿನ ಸಹಾಯಕ ಇಂಜಿನಿಯರ್ ಭರವಸೆ ನೀಡಿರುವುದರಿಂದ ರೈತ ನಿಟ್ಟುಸಿರು ಬಿಟ್ಟಿದ್ದಾನೆ. (ಏಜೆನ್ಸೀಸ್)
ಕರೊನಾಗೆ ಸಜ್ಜಾಗಿದೆ ಲಸಿಕೆ; ಬಿಡುಗಡೆಗೆ ಅಡ್ಡಿಯಾಗಿರುವ ಆತಂಕವಾದರೂ ಏನು?