ಬೆಂಗಳೂರು: ಟಿ.ಎನ್. ಸೀತಾರಾಂ ಅವರು ಕನ್ನಡ ಕಿರುತೆರೆಯ ಡಾ. ರಾಜಕುಮಾರ್ ಎಂದರೆ ತಪ್ಪಿಲ್ಲ. ರಾಜಕುಮಾರ್ ಅವರು ಹೇಗೆ ಒಂದು ದೊಡ್ಡ ಪ್ರೇಕ್ಷಕರ ವಲಯವನ್ನು ಸಿನಿಮಾದತ್ತ ಸೆಳೆದರೋ, ಸೀತಾರಾಂ ಸಹ ಕಿರುತೆರೆಯತ್ತ ಜನರನ್ನು ಸೆಳೆದರು ಎಂದು ನಿರ್ದೇಶಕ ಪಿ. ಶೇಷಾದ್ರಿ ಹೇಳಿದ್ದಾರೆ.
ಇದನ್ನೂ ಓದಿ: ಬ್ರಹ್ಮಾಸ್ತ್ರ ಬಿಡ್ತಾರಾ? ಕರ್ಣ ಆಗ್ತಾರಾ? ಯಶ್ ಮುಂದಿದೆ ಎರಡು ಆಯ್ಕೆಗಳು
ಕನ್ನಡ ಕಿರುತೆರೆಯ ಅತ್ಯಂತ ಜನಪ್ರಿಯ ಧಾರಾವಾಹಿಯಾದ ‘ಮಾಯಾಮೃಗ’ದ ಮುಂದುವರೆದ ಭಾಗ ಪ್ರಸಾರವಾಗುವುದಕ್ಕೆ ಸಜ್ಜಾಗಿದೆ. ಈ ಹೊಸ ಧಾರಾವಾಹಿಯು ಸಿರಿ ಕನ್ನಡ ಚಾನಲ್ನಲ್ಲಿ ಅಕ್ಟೋಬರ್ 31ರಿಂದ ಪ್ರತಿ ರಾತ್ರಿ 9ಕ್ಕೆ ಪ್ರಸಾರ ಕಾಣಲಿದೆ. ಈ ಸಂದರ್ಭದಲ್ಲಿ ‘ಮತ್ತೆ ಮಾಯಾಮೃಗ’ ತಂಡದವರು ಇತ್ತೀಚೆಗೆ ಧಾರಾವಾಹಿಯ ಬಗ್ಗೆ ಪ್ರಚಾರ ಮಾಡಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಪಿ. ಶೇಷಾದ್ರಿ, ’25 ವರ್ಷಗಳ ಹಿಂದೆ ಪ್ರಸಾರವಾದ ‘ಮಾಯಾಮೃಗ’ದ ಮುಂದುವರೆದ ಭಾಗ ಇದು. ಆ ಧಾರಾವಾಹಿಗೆ ಆಗಿನ ಕಾಲಕ್ಕೆ ದೊಡ್ಡ ಮನ್ನಣೆ ಸಿಕ್ಕಿತ್ತು. ಬರೀ ಧಾರಾವಾಹಿಗಷ್ಟೇ ಅಲ್ಲ, ಅದಕ್ಕೆ ಕೆಲಸ ಮಾಡಿದ ನಮಗೂ ಸಿಕ್ಕಿತ್ತು. ಈ ಧಾರಾವಾಹಿಗೆ ಪ್ರೇಪಕ್ಷಕರ ದೊಡ್ಡ ವೃಂದ ಉಂಟಾಗಲು ಕಾರಣ ಟಿ.ಎನ್. ಸೀತಾರಾಂ. ರಾಜಕುಮಾರ್ ಅವರು ಹೇಗೆ ಒಂದು ದೊಡ್ಡ ಪ್ರೇಕ್ಷಕರ ವಲಯವನ್ನು ಸಿನಿಮಾದತ್ತ ಸೆಳೆದರೋ, ಸೀತಾರಾಂ ಸಹ ಕಿರುತೆರೆಯತ್ತ ಜನರನ್ನು ಸೆಳೆದರು’ ಎಂದರು.
ಈಗ ಧಾರಾವಾಹಿ ಮಾಡುವುದು ಬಡವರ ಮಕ್ಕಳು, ಶ್ರೀಮಂತರ ಮಕ್ಕಳ ಜತೆಗೆ ರನ್ನಿಂಗ್ ರೇಸ್ ಮಾಡಿದಂತೆ ಎನ್ನುವ ಅವರು, ‘ಆಗ ಪೈಪೋಟಿಗೆ ಮೂರು ಧಾರಾವಾಹಿಗಳಿದ್ದವು. ಈಗ 50 ಧಾರಾವಾಹಿಗಳಿವೆ. ದೊಡ್ಡ ಬಜೆಟ್ನ ಧಾರಾವಾಹಿಗಳ ಜತೆಗೆ ಪೈಪೋಟಿ ನಡೆಸುವುದು ಸುಲಭದ ಮಾತಲ್ಲ. ಇದೊಂಥರಾ ಬಡವರ ಮಕ್ಕಳು, ಶ್ರೀಮಂತರ ಮಕ್ಕಳ ಜತೆಗೆ ರನ್ನಿಂಗ್ ರೇಸ್ ಮಾಡಿದಂತೆ. 5000 ವಷರ್ಗಳಿಂದ ‘ಮಾಯಾಮೃಗ’ ಯಾರಿಗೂ ಸಿಕ್ಕಿಲ್ಲ. ನಮಗೂ ಸಿಕ್ಕಿಲ್ಲ. ನಿಮಗೂ ಸಿಗುವುದಿಲ್ಲ. ಆದರೂ ಅದನ್ನು ಹಿಡಿಯಲು ಓಡುತ್ತಿರುತ್ತೇವೆ. ಇದು ಈ ಧಾರಾವಾಹಿಯ ಆಶಯ ಸಹ ಹೌದು’ ಎಂದರು.
ಇದನ್ನೂ ಓದಿ: ‘ಗಂಧದ ಗುಡಿ’ಯಲ್ಲಿ ಮಿಂದೆದ್ದ ಅಭಿಮಾನಿಗಳು; ಇಂದು ಎಲ್ಲಾ ಪ್ರದರ್ಶನಗಳು ಫುಲ್
‘ಮತ್ತೆ ಮಾಯಾಮೃಗ’ ಧಾರಾವಾಹಿಯನ್ನು ಟಿ.ಎನ್. ಸೀತಾರಾಂ, ಪಿ. ಶೇಷಾದ್ರಿ ಮತ್ತು ನಾಗೇಂದ್ರ ಶಾನ್ ಜಂಟಿಯಾಗಿ ನಿರ್ದೇಶನ ಮಾಡುತ್ತಿದ್ದಾರೆ. ಈ ಧಾರಾವಾಹಿಯಲ್ಲಿ ಲಕ್ಷ್ಮೀ ಚಂದ್ರಶೇಖರ್, ಮಾಳವಿಕಾ, ಎಂ.ಡಿ. ಪಲ್ಲವಿ, ದೀಪಶ್ರೀ ಮುಂತಾದವರು ನಟಿಸುತ್ತಿದ್ದಾರೆ.