ಮುಂಬೈ: ಸಮಾರಂಭವೊಂದರಲ್ಲಿ ಪಾಲ್ಗೊಂಡಿದ್ದ ಬಾಲಿವುಡ್ ನಟ ಸುನೀಲ್ ಶೆಟ್ಟಿಯವರು, ಸೆಲ್ಫೀ ತೆಗೆದುಕೊಳ್ಳಲು ತುಂಬ ಸಮೀಪ ಬಂದ ಅಭಿಮಾನಿಗಳಿಂದ ಕಿರಿಕಿರಿಗೆ ಒಳಗಾಗಿದ್ದಾರೆ.
ಅದು ಶಾಲೆಯೊಂದರಲ್ಲಿ ನಡೆಯುತ್ತಿದ್ದ ಸಮಾರಂಭ. ನಟ ಸುನೀಲ್ ಶೆಟ್ಟಿ ಕೂಡ ಅದರಲ್ಲಿ ಭಾಗವಹಿಸಿದ್ದರು. ಅವರನ್ನು ನೋಡುತ್ತಿದ್ದಂತೆ ಕೆಲವು ಅಭಿಮಾನಿಗಳು ಬಂದು ಸೆಲ್ಫೀ ತೆಗೆದುಕೊಳ್ಳಲು ಮುಂದಾದರು. ಅದರಲ್ಲೊಬ್ಬ ಯುವಕ ಸುನೀಲ್ ಶೆಟ್ಟಿ ಕುಳಿತುಕೊಂಡಿದ್ದ ಆಸನದ ಹಿಂದೆ ಹೋಗಿ ನಿಂತ. ತುಂಬ ಹತ್ತಿರದಿಂದ ಬಾಗಿ ಅವರ ತೋಳನ್ನು ಹಿಡಿದ. ತಕ್ಷಣವೇ ಕಿರಿಕಿರಿಗೆ ಒಳಗಾದ ಸುನೀಲ್ ಶೆಟ್ಟಿ, ಕೈತೆಗೆಯುವಂತೆ ಹೇಳಿದರು.
ಆ ಯುವಕ ಕೈತೆಗೆದ. ಅಷ್ಟರಲ್ಲಿಯೇ ಸುನೀಲ್ ಶೆಟ್ಟಿ ಜತೆಗಿದ್ದ ಅವರ ಸಹಚರರು ಅವನನ್ನು ಆಚೆಗೆ ಕಳಿಸಿದರು. ಅದಾದ ಬಳಿಕ ಇನ್ನೋರ್ವರು ಸ್ವಲ್ಪ ವಯಸ್ಸಾದವರು ಬಂದು ಸುನೀಲ್ ಶೆಟ್ಟಿಯವರ ಪಕ್ಕ, ಸನಿಹದಲ್ಲೇ ಮೊಣಕಾಲೂರಿ ಕುಳಿತು ಸೆಲ್ಫೀ ತೆಗೆದುಕೊಳ್ಳಲು ಯತ್ನಿಸಿದರು. ಅವರ ಬಳಿ ಕೂಡ ಸುನೀಲ್ ಶೆಟ್ಟಿ, ಸ್ವಲ್ಪ ದೂರ ಹೋಗಿ ಎಂದು ಹೇಳಿದ್ದನ್ನು ವಿಡಿಯೋದಲ್ಲಿ ನೋಡಬಹುದು. ಅವರನ್ನೂ ಸಹ ಆಚೆ ಕಳಿಸಲಾಯಿತು.
ಇನ್ಸ್ಟಾಗ್ರಾಂನಲ್ಲಿ ಈ ವಿಡಿಯೋ ವೈರಲ್ ಆಗಿದೆ. ಕೆಲವರು ಸುನೀಲ್ ಶೆಟ್ಟಿ ನಡೆಯನ್ನು ಖಂಡಿಸಿದ್ದಾರೆ. ಆದರೆ ಇನ್ನೂ ಕೆಲವರು ಬೆಂಬಲಿಸಿದ್ದಾರೆ. ಯುವಕ ತೋಳು ಮುಟ್ಟಿದ್ದು ಏನು ತಪ್ಪು? ಅಷ್ಟು ಓವರ್ ಆಗಿ ಯಾಕೆ ಪ್ರತಿಕ್ರಿಯೆ ತೋರಬೇಕಿತ್ತು ಎಂದು ಒಂದಷ್ಟು ಕಾಮೆಂಟ್ಗಳು ವ್ಯಕ್ತವಾಗಿದೆ.
ಆದರೆ ಮತ್ತೊಂದಷ್ಟು ಜನರು, ತಪ್ಪಿಲ್ಲ. ಅಪರಿಚಿತರು ಮುಟ್ಟಿದರೆ ನಾವಾದರೂ ಸಹಿಸಿಕೊಳ್ಳುತ್ತೀವಾ? ಸುನೀಲ್ ಶೆಟ್ಟಿ ಸೆಲೆಬ್ರಿಟಿ ಎಂಬ ಕಾರಣಕ್ಕೆ ಅವರು ಹಾಗೆ ಮಾಡಿದ್ದು ತಪ್ಪು ಹೇಗಾಗುತ್ತದೆ ಎಂದು ಪ್ರಶ್ನಿಸಿದ್ದಾರೆ.
ಒಟ್ಟಿನಲ್ಲಿ ಸುನೀಲ್ ಶೆಟ್ಟಿ ಅಭಿಮಾನಿಗಳೊಂದಿಗೆ ವರ್ತಿಸಿದ ರೀತಿಗೆ ಪರ-ವಿರೋಧಗಳು ವ್ಯಕ್ತವಾಗುತ್ತಿವೆ. (ಏಜೆನ್ಸೀಸ್)