ಮಥುರಾ: ಮಥುರಾ ಜಂಕ್ಷನ್ನಲ್ಲಿ ಮಂಗಳವಾರ ನಡೆದಿದ್ದ ಎಲಕ್ಟ್ರಿಕ್ ಮಲ್ಟಿಪಲ್ ಯೂನಿಟ್ (EMU) ಅವಘಡಕ್ಕೆ ಸಂಬಂಧಿಸಿದಂತೆ ತನಿಖೆ ವೇಳೆ ಸ್ಪೋಟಕ ವಿಚಾರ ಒಂದು ಹೊರಬಿದಿದ್ದು, ಈ ಸಂಬಂಧ ಐವರು ಅಧಿಕಾರಿಗಳನ್ನು ಅಮಾನತುಗೊಳಿಸಲಾಗಿದೆ.
ಸಿಬ್ಬಂದಿಯ ಅಜಾಗರೂಕತೆಯಿಂದಾಗಿ ರೈಲು ಫ್ಲಾಟ್ಫಾರ್ಮ್ ಏರಿ ಹೋಗಿರುವುದು ತನಿಖೆ ವೇಳೆ ಬೆಳಕಿಗೆ ಬಂದಿದೆ. ಘಟನೆಗೆ ಸಂಬಂಧಿಸಿದ ಫೋಟೋ ಹಾಗೂ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ವಿಡಿಯೋದಲ್ಲೇನಿದೆ ?
ವೈರಲ್ ಆಗಿರುವ ವಿಡಿಯೋದಲ್ಲಿ ರೈಲು ಮಥುರಾ ಜಂಕ್ಷನ್ ತಲುಪಿದ ಬಳಿಕ ಲೋಕೋಪೈಲಟ್ ರೈಲನ್ನು ಎಲೆಕ್ಟ್ರಿಕ್ ಹೆಲ್ಪರ್ ಸಿಬ್ಬಂದಿಯ ನಿಗಾಕ್ಕೆ ಬಿಟ್ಟು ಕೆಳಗಿಳಿಯುವುದು ಕಂಡುಬರುತ್ತದೆ. ಸಚಿನ್ ಎಂಬ ಸಿಬ್ಬಂದಿ ಎಲೆಕ್ಟ್ರಿಕ್ ಹೆಲ್ಪರ್ ಸಿಬ್ಬಂದಿ ರೈಲಿನ ಕ್ಯಾಬಿನ್ ಪ್ರವೇಶಿಸುವ ವೇಳೆ ಫೋನ್ ಬಳಸುತ್ತಾ ಬರುತ್ತಿರುವುದು ಕಂಡು ಬರುತ್ತದೆ.
ಇದನ್ನೂ ಓದಿ: ಫುಟ್ಬಾಲ್ ಪಂದ್ಯದ ವೇಳೆ ಮೈದಾನಕ್ಕೆ ಬಡಿದ ಸಿಡಿಲು; ಇಬ್ಬರು ಸಾವು, ಮೂವರು ಚಿಂತಾಜನಕ
ಬಳಿಕ ಆ ಸಿಬ್ಬಂದಿ ತನ್ನ ಬ್ಯಾಗನ್ನು ರೈಲಿನ ಇಂಜಿನ್ ಹ್ಯಾಂಡಲ್ಗೆ ನೇತು ಹಾಕಿ ಮೊಬೈಲ್ನಲ್ಲಿ ವಿಡಿಯೋ ನೋಡುವುದನ್ನು ಮುಂದುವರೆಸುತ್ತಾನೆ. ಬ್ಯಾಗ್ನ ಬಾರ್ಕಕೆ ರೈಲಿನ ಇಂಜಿನ್ ಹ್ಯಾಂಡಲ್ ಮುಂದಕ್ಕೆ ಜರುಗಿದ್ದು, ಏಕಾಏಕಿ ವೇಗವಾಗಿ ಚಲಿಸಲು ಶುರುವಾಗಿದ್ದು, ಮುಂದೆ ಇದ್ದ ತಡೆಗೋಡೆಗೆ ಡಿಕ್ಕಿ ಹೊಡೆದು ಫ್ಲಾಟ್ಫಾರ್ಮ್ ಏರಿ ನಿಂತಿದೆ. ಘಟನೆಯಲ್ಲಿ ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ.
ಈ ಕುರಿತು ಪ್ರತಿಕ್ರಿಯಿಸಿರುವ ವಿಭಾಗೀಯ ರೈಲ್ವೆ ವ್ಯವಸ್ಥಾಪಕ ತೇಜ್ಪ್ರಕಾಶ್ ಅಗರ್ವಾಲ್, ಸಿಬ್ಬಂದಿಯ ನಿರ್ಲಕ್ಷ್ಯದಿಂದಾಗಿ ಈ ಅವಘಡ ಸಂಭವಿಸಿದ್ದು, ಇಂಜಿನ್ ಕೋಚ್ನಲ್ಲಿ ಅಳವಡಿಸಿದ್ದ ಸಿಸಿಟಿವಿ ಕ್ಯಾಮರಾದಲ್ಲಿ ಸಂಪೂರ್ಣ ಘಟನೆ ಸೆರೆಯಾಗಿದೆ. ಈ ಸಂಬಂಧ ಐವರನ್ನು ಅಮಾನತು ಮಾಡಲಾಗಿದ್ದು, ಉನ್ನತ ಮಟ್ಟದ ತನಿಖೆಗೆ ಆದೇಶಿಸಲಾಗಿದೆ ಎಂದು ತಿಳಿಸಿದ್ದಾರೆ.