ಮಂಡ್ಯ: 2019-20ನೇ ಸಾಲಿನ ಎಸ್ಎಸ್ಎಲ್ಸಿ ಪರೀಕ್ಷೆಯಲ್ಲಿ 625ಕ್ಕೆ 625 ಅಂಕ ಪಡೆಯುವ ಮೂಲಕ ರಾಜ್ಯಕ್ಕೆ ಮೊದಲ ಸ್ಥಾನ ಪಡೆದ ಮಂಡ್ಯ ತಾಲೂಕಿನ ಮಾರದೇವನಹಳ್ಳಿಯ ಶ್ರೀ ಸತ್ಯಸಾಯಿ ಸರಸ್ವತಿ ಇಂಗ್ಲಿಷ್ ಮೀಡಿಯಂ ಬಾಯ್ಸ್ ಹೈಸ್ಕೂಲ್‌ನ ವಿದ್ಯಾರ್ಥಿ ಎಂ.ಪಿ. ಧೀರಜ್ ರೆಡ್ಡಿ ಐಎಎಸ್ ಪಾಸ್ ಮಾಡುವ ಕನಸನ್ನು ಬೆನ್ನತ್ತಿದ್ದಾರೆ.
ಧೀರಜ್ ರೆಡ್ಡಿ ಮೂಲತಃ ಕೋಲಾರ ಜಿಲ್ಲೆಯ ಬಂಗಾರಪೇಟೆ ತಾಲೂಕಿನ ಕ್ಯಾಸಂಬಳ್ಳಿ ಗ್ರಾಮದವರು. ಎಂ.ಪ್ರಭಾಕರ್ ರೆಡ್ಡಿ ಮತ್ತು ಕೆ.ಸಿ.ಮಂಜುಳಾ ದಂಪತಿಯ ದ್ವಿತೀಯ ಪುತ್ರರಾದ ಇವರು ಓದಿನ ಜತೆಗೆ ಕ್ರೀಡೆಯಲ್ಲೂ ಮುಂದು. ಫುಟ್ಬಾಲ್ ಆಟಗಾರ ಕೂಡ ಹೌದು.
ಇದನ್ನೂ ಓದಿರಿ ಎಸ್ಎಸ್ಎಲ್ಸಿ ರಿಸಲ್ಟ್ ಪ್ರಕಟ: ಶೇ.71.80 ಫಲಿತಾಂಶ, 6 ಮಂದಿ ರಾಜ್ಯಕ್ಕೆ ಟಾಪರ್
ಧೀರಜ್ ರೆಡ್ಡಿಯ ತಂದೆ ಮತ್ತು ತಾಯಿ ಇಬ್ಬರೂ ಶಿಕ್ಷಕರು. 1ರಿಂದ 8ನೇ ತರಗತಿವರೆಗೂ ಕ್ಯಾಸಂಬಳ್ಳಿ ಗ್ರಾಮದಲ್ಲೇ ಓದಿದ ಧೀರಜ್, 9 ಮತ್ತು 10ನೇ ತರಗತಿ ವಿದ್ಯಾಭ್ಯಾಸಕ್ಕಾಗಿ ಮಂಡ್ಯದ ಮಾರದೇವನಹಳ್ಳಿಯ ವಸತಿ ಶಾಲೆಗೆ ಬಂದರು. ಈ ಶಿಕ್ಷಣ ಸಂಸ್ಥೆ ಚಿಕ್ಕಬಳ್ಳಾಪುರ ಜಿಲ್ಲೆಯ ಮುದ್ದೇನಹಳ್ಳಿಯ ಶ್ರೀ ಸತ್ಯಸಾಯಿ ಸೇವಾ ಟ್ರಸ್ಟ್ ನದ್ದು.
ಎಸ್ಎಸ್ಎಲ್ಸಿ ಪರೀಕ್ಷೆಯಲ್ಲಿ ಟಾಪರ್ ಆಗಿ ಹೊರಹೊಮ್ಮಿದ ಸಂತಸದ ಕ್ಷಣದಲ್ಲಿ ವಿಜಯವಾಣಿ ಜತೆ ಮಾತನಾಡಿದ ಧೀರಜ್, ಸಾಧನೆಯ ರಹಸ್ಯ ಬಿಚ್ಚಿಟ್ಟರು. ‘ನಾನು ತರಗತಿ ಹೊರತಾಗಿ ಪತ್ರಿನಿತ್ಯ 2ರಿಂ4 ತಾಸು ಓದುತ್ತಿದ್ದೆ. ಕರೊನಾ ಆತಂಕದಲ್ಲಿ ಪರೀಕ್ಷೆ ಮುಂದೂಡಿಕೆ ಆಯ್ತು. ಮತ್ತಷ್ಟು ಅಭ್ಯಾಸ ಮಾಡಿ ಮನನ ಮಾಡಿಕೊಂಡೆ. ಲಾಕ್ಡೌನ್ ವೇಳೆ ಊರಿಗೆ ಹೋಗದೆ ಶಾಲೆಯಲ್ಲೇ ಉಳಿದಕೊಂಡಿದ್ದೆ. ಶಿಕ್ಷಕರೂ ನಮ್ಮೊಂದಿಗೆ ಇದ್ದರು. ಲಾಕ್ಡೌನ್ ಅನ್ನೇ ಓದಿಗೆ ಸದುಪಯೋಗ ಮಾಡಿಕೊಂಡದ್ದೇ ನನಗೆ ವರವಾಯ್ತು’ ಎಂದು ಹೇಳಿದರು.
ಇದನ್ನೂ ಓದಿರಿ ಸರ್ಕಾರಿ ಶಾಲೆಯ ಸನ್ನಿಧಿ ಎಸ್ಎಸ್ಎಲ್ಸಿ ಟಾಪರ್
‘ಪರೀಕ್ಷೆಯನ್ನು ವಿಸಿಫಾರಂ ಕೇಂದ್ರದಲ್ಲಿ ಬರೆದೆ. ಭಾಷಾ ವಿಷಯಗಳಲ್ಲಿ ಒಂದೊಂದು ಅಂಕ ಕಡಿಮೆ ಆಗಬಹುದು ಅಂದುಕೊಂಡಿದ್ದೆ. ಆದರೆ, ಸಂಪೂರ್ಣ ಅಂಕ ಬರುವ ಮೂಲಕ ಮೊದಲ ಸ್ಥಾನ ಸಿಕ್ಕಿದ್ದು ತುಂಬಾ ಖುಷಿಯಾಗುತ್ತಿದೆ’ ಎಂದರು.
ಈ ಬಾರಿ ಎಸ್ಎಸ್ಎಲ್ಸಿ ಪರೀಕ್ಷೆಯಲ್ಲಿ ಒಟ್ಟು 6 ಮಕ್ಕಳು ಮೊದಲ ಸ್ಥಾನ ಪಡೆದಿದ್ದು, ಈ ಪೈಕಿ ಧೀರಜ್ ರೆಡ್ಡಿ ಕೂಡ ಒಬ್ಬರು.