ನವದೆಹಲಿ: ಸ್ಪೈಸ್ ಜೆಟ್ ವಿಮಾನದ ಓರ್ವ ಪೈಲಟ್ ಮೇಲೆ 10 ಜನರ ಗುಂಪೊಂದು ಮಾರಣಾಂತಿಕ ಹಲ್ಲೆ ಮಾಡಿದೆ. ದಕ್ಷಿಣ ದೆಹಲಿಯ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಬಳಿಯ ಫ್ಲೈ ಓವರ್ ಮೇಲೆ ಮಧ್ಯರಾತ್ರಿ ಘಟನೆ ನಡೆದಿದೆ.
ಪೈಲಟ್ ಯುವರಾಜ್ ತಿವಾಟಿಯಾ ಕಾರಿನಲ್ಲಿ ತೆರಳುತ್ತಿದ್ದಾಗ 10 ಜನರ ಗುಂಪೊಂದು ಅಡ್ಡಬಂದಿದೆ. ಪೈಲಟ್ಗೆ ಗನ್ ತೋರಿಸಿ, ಕಾರಿನ ಗ್ಲಾಸ್ಗಳನ್ನೆಲ್ಲ ಪುಡಿಪುಡಿ ಮಾಡಿದ್ದಾರೆ. ಪಿಸ್ತೂಲ್ ಹಿಡಿಕೆಯಿಂದ ಯುವರಾಜ್ ತಲೆಗೆ ಬಲವಾಗಿ ಏಟು ಕೊಟ್ಟಿದ್ದಾರೆ. ಬಳಿಕ ಅವರ ಬಳಿ ಇದ್ದ ಮೊಬೈಲ್ ಮತ್ತಿತರ ವಸ್ತುಗಳು ಮತ್ತು 34,000 ರೂಪಾಯಿಯನ್ನು ಎಗರಿಸಿ ಪರಾರಿಯಾಗಿದ್ದಾರೆ. ಹೋಗುವಾಗ ಪೈಲಟ್ಗೆ ಚಾಕುವಿನಿಂದ ಇರಿದು ಹೋಗಿದ್ದಾರೆ.
ಕಿಟಕಿ ಗ್ಲಾಸುಗಳೆಲ್ಲ ಪುಡಿಪುಡಿಯಾಗಿದ್ದಲ್ಲದೆ, ಸೀಟ್ ಮೇಲೆ ರಕ್ತದ ಕಲೆಗಳು ಕಾಣುವ ಫೋಟೋಗಳು ಎಲ್ಲೆಡೆ ವೈರಲ್ ಆಗಿವೆ. ಇತ್ತೀಚಿನ ದಿನಗಳಲ್ಲಿ ದೆಹಲಿ ಐಐಟಿ ಬಳಿ ಇಂಥ ಲೂಟಿ ಪ್ರಕರಣಗಳು ಹಲವು ನಡೆದಿವೆ ಎಂದು ಸ್ಥಳೀಯರು ತಿಳಿಸಿದ್ದಾರೆ. ಇದನ್ನೂ ಓದಿ: ಯುಎಸ್ನಲ್ಲಿ ಜನಾಂಗೀಯ ದ್ವೇಷದ ವಿರುದ್ಧ ರೊಚ್ಚಿಗೆದ್ದ ಪ್ರತಿಭಟನಾಕಾರರಿಗೆ ಅಧ್ಯಕ್ಷ ಟ್ರಂಪ್ ಪುತ್ರಿಯ ಬೆಂಬಲ
ಯುವರಾಜ್ ತಿವಾಟಿಯಾ ಅವರು ಸ್ಪೈಸ್ ಜೆಟ್ ಫ್ಲೈಟ್ ಕ್ಯಾಪ್ಟನ್. ಮಧ್ಯರಾತ್ರಿ 1 ಗಂಟೆಗೆ ತಮ್ಮ ಮನೆಯಿಂದ ಕಚೇರಿಯ ಕಾರಿನಲ್ಲಿ ಏರ್ಪೋರ್ಟ್ಗೆ ತೆರಳುತ್ತಿದ್ದರು.
ಐಐಟಿ ಬಳಿಯ ಫ್ಲೈಓವರ್ನಲ್ಲಿ ತೆರಳುತ್ತಿದ್ದಾಗ, ಐದು ಬೈಕ್ಗಳಲ್ಲಿ ಬಂದ 10 ದರೋಡೆಕೋರರು, ಕಾರನ್ನು ಅಡ್ಡಗಟ್ಟಿ ಕೃತ್ಯ ನಡೆಸಿದ್ದಾರೆ. ಈ ಗುಂಪು ಅಲ್ಲಿಂದ ತೆರಳುತ್ತಿದ್ದಂತೆ ಪೈಲಟ್ ಪೊಲೀಸರಿಗೆ ಕರೆ ಮಾಡಿದ್ದಾರೆ. ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಯುವರಾಜ್ ಅವರನ್ನು ರಕ್ಷಣೆ ಮಾಡಿ, ಪ್ರಕರಣ ದಾಖಲಿಸಿಕೊಂಡಿದ್ದಾರೆ. (ಏಜೆನ್ಸೀಸ್)
ಪುಟ್ಟ ಮಗು ಹೇಳಿದಂತೆ ಕೇಳುವುದು ಈ ಆನೆ; ಮುದ್ದುಕ್ಕಿಸುವ ಈ ಟಿಕ್ಟಾಕ್ ವಿಡಿಯೋ ಎಲ್ಲಿಯದು ಗೊತ್ತಾ?