ಮುಂಬೈ: ಕಳೆದ ವಾರವಷ್ಟೇ ತಾಪ್ಸಿ ಪನ್ನು, ‘ಬ್ಲರ್’ ಎಂಬ ಚಿತ್ರದಲ್ಲಿ ನಟಿಸುವುದರ ಜತೆಗೆ, ಆ ಚಿತ್ರದ ಮೂಲಕ ನಿರ್ಮಾಪಕರಾಗುತ್ತಿರುವ ಸುದ್ದಿ ಹೊರಬಿದ್ದಿತ್ತು. ಅದಾಗಿ ಭಾನುವಾರ ಚಿತ್ರದ ಚಿತ್ರೀಕರಣ ಸಹ ನೈನತಾಲ್ನಲ್ಲಿ ಶುರುವಾಗಿದೆ. ಹೊಸ ಸುದ್ದಿಯೇನೆಂದರೆ, ಈ ಚಿತ್ರವು ಬರೀ ಹಿಂದಿಯಲ್ಲಷ್ಟೇ ಅಲ್ಲ, ಇನ್ನೂ ಬೇರೆಬೇರೆ ಭಾಷೆಗಳಲ್ಲೂ ನಿರ್ಮಾಣವಾಗುತ್ತಿದೆಯಂತೆ.
ಇದನ್ನೂ ಓದಿ: ಬಾಲಿವುಡ್ ಬ್ಯೂಟಿ ಅನುಷ್ಕಾ ಶರ್ಮಾ ಬಾಡಿಗಾರ್ಡ್ ಸಂಬಳ ಕೇಳಿದ್ರೆ ಬೆರಗಾಗುವುದು ಖಂಡಿತ!
‘ಬ್ಲರ್’ ಚಿತ್ರವು ಸ್ಪಾನಿಶ್ ಚಿತ್ರ ‘ಜೂಲಿಯಾಸ್ ಐಸ್’ನ ಹಿಂದಿ ರೀಮೇಕ್. ಕೆಲವು ವರ್ಷಗಳ ಹಿಂದ ಬಿಡುಗಡೆಯಾದ ಚಿತ್ರ ಸೂಪರ್ ಹಿಟ್ ಆಗಿತ್ತು. ಇದೀಗ ಅದು ಹಿಂದಿಯಲ್ಲಿ ತಯಾರಾಗುತ್ತಿದೆ. ವಿಶೇಷವೆಂದರೆ, ಬರೀ ಹಿಂದಿಯಷ್ಟೇ ಅಲ್ಲ, ‘ಜೂಲಿಯಾಸ್ ಐಸ್’ ಚಿತ್ರವು ಭಾರತದ ಬೇರೆಬೇರೆ ಭಾಷೆಗಳಲ್ಲೂ ರೀಮೇಕ್ ಆಗುತ್ತಿದ್ದು, ಈಗಾಗಲೇ ಮರಾಠಿ ಅವತರಣಿಕೆಯ ಚಿತ್ರೀಕರಣ ಸದ್ದಿಲ್ಲದೆ ಮುಗಿದೆಯಂತೆ.
‘ಜೂಲಿಯಾಸ್ ಐಸ್’ ಚಿತ್ರವು ಮರಾಠಿಯಲ್ಲಿ ‘ಅದೃಶ್ಯ’ ಎಂಬ ಹೆಸರಿನಲ್ಲಿ ರೀಮೇಕ್ ಆಗುತ್ತಿದ್ದು, ರಿತೇಶ್ ದೇಶ್ಮುಖ್ ಮತ್ತು ಮಂಜರಿ ಫಡ್ನಿಸ್ ಅಭಿನಯಿಸುತ್ತಿದ್ದಾರೆ. ಈ ಚಿತ್ರವನ್ನು ಹಿರಿಯ ಛಾಯಾಗ್ರಾಹಕ ಕಬೀರ್ ಲಾಲ್ ನಿರ್ದೇಶನ ಮಾಡುತ್ತಿದ್ದಾರೆ.
ಬರೀ ಮರಾಠಿಯಷ್ಟೇ ಅಲ್ಲ, ಈ ಚಿತ್ರವನ್ನು ಕಬೀರ್ ಲಾಲ್, ಬಂಗಾಲಿ, ತಮಿಳು ಮತ್ತು ತೆಲುಗು ಭಾಷೆಗಳಿಗೆ ತೆಗೆದುಕೊಂಡು ಹೋಗುತ್ತಿದ್ದಾರೆ. ಈ ಪೈಕಿ ಬಂಗಾಲಿ ಭಾಷೆಯಲ್ಲಿ ‘ಅಂತರದೃಷ್ಟಿ’ ಎಂಬ ಹೆಸರಿನಲ್ಲಿ ಚಿತ್ರ ಶುರುವಾಗಿದ್ದು, ಇದರಲ್ಲಿ ರಿತುಪರ್ಣ ಸೇನ್ಗುಪ್ತಾ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡರೆ, ರಿತೇಶ್ ಅತಿಥಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರಂತೆ.
ಇದನ್ನೂ ಓದಿ: ಮತ್ತೆ ಬರಲಿದ್ದಾನೆ ಭಜರಂಗಿ ಭಾಯ್ಜಾನ್..
ಇನ್ನು, ತಮಿಳಿನ ರೀಮೇಕ್ಗೆ ‘ಉನ್ ಪಾರ್ವಯಲಿಲ್’ ಚಿತ್ರದಲ್ಲಿ ಗಾಯತ್ರಿ ಶಂಕರ್ ನಟಿಸುತ್ತಿದ್ದರೆ, ತೆಲುಗಿನಲ್ಲಿ ‘ಅಗೋಚರ’ ಹೆಸರಿನಲ್ಲಿ ಚಿತ್ರ ರೀಮೇಕ್ ಆಗುತ್ತಿದ್ದು, ಅದರಲ್ಲಿ ಇಷಾ ಚಾವ್ಲಾ ನಟಿಸುತ್ತಿದ್ದಾರೆ. ಈ ಚಿತ್ರಗಳ ಚಿತ್ರೀಕರಣ ಸಹ ಇತ್ತೀಚೆಗೆ ಶುರುವಾಗಿದೆ ಎಂದು ಹೇಳಲಾಗುತ್ತಿದೆ. ಅಲ್ಲಿಗೆ, ‘ಜೂಲಿಯಾಸ್ ಐಸ್’ ಚಿತ್ರವು ಭಾರತದಲ್ಲಿ ಐದು ಭಾಷೆಗಳಲ್ಲಿ ನಿರ್ಮಾಣವಾಗುತ್ತಿದ್ದು, ಈ ಪೈಕಿ ಯಾವ ಚಿತ್ರ ಜನರಿಗೆ ಇಷ್ಟವಾಗುತ್ತದೆ ಎಂದು ಕಾದು ನೋಡಬೇಕಿದೆ.