ನವದೆಹಲಿ: ದೇಶಾದ್ಯಂತ ಯುವ ವಯಸ್ಸಿನವರನ್ನು ತನ್ನತ್ತ ಸೆಳೆದು ಕೆಲವೇ ದಿನಗಳಲ್ಲಿ ಪ್ರಖ್ಯಾತಿ ಗಳಿಸಿದ ಟಿಕ್ಟಾಕ್ ಆ್ಯಪ್ ಸೇರಿದಂತೆ ಚೀನಾದ 59 ಆ್ಯಪ್ಗಳನ್ನು ಭಾರತ ಸರ್ಕಾರ ಭದ್ರತಾ ದೃಷ್ಟಿಯಿಂದ ಬ್ಯಾನ್ ಮಾಡಿದೆ.
ಬ್ಯಾನ್ ಸಂಬಂಧ ಕೇಂದ್ರ ವಿದ್ಯುನ್ಮಾನ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ (ಎಂಇಐಟಿವೈ) ಸುಮಾರು 79 ಪ್ರಶ್ನೆಗಳನ್ನು ಪಟ್ಟಿ ಮಾಡಿ ಮೂರು ವಾರಗಳ ಒಳಗೆ ಉತ್ತರಿಸುವಂತೆ ಚೀನಾ ಆ್ಯಪ್ ಕಂಪನಿಗಳಿಗೆ ನೋಟಿಸ್ ಕಳುಹಿಸಿದೆ. ಇದರ ಪ್ರಕಾರ ಜುಲೈ 22ರೊಳಗೆ ಉತ್ತರಿಸದಿದ್ದರೆ, ದೇಶಾದ್ಯಂತ ಚೀನಾ ಆ್ಯಪ್ಗಳು ಶಾಶ್ವತವಾಗಿ ಬ್ಯಾನ್ ಆಗಲಿವೆ.
ಇದನ್ನೂ ಓದಿ: ಪತಿಯ ಅಗಲಿಕೆ ಬೆನ್ನಲ್ಲೇ ಪೋಷಕರು ಮಾಡಿದ ನಿರ್ಧಾರಕ್ಕೆ ಬೇಸತ್ತು ಗೃಹಿಣಿ ನೇಣಿಗೆ ಶರಣು
ಇನ್ನು ನಿಷೇಧಿತ ಆ್ಯಪ್ ಕಂಪನಿಗಳ ಉತ್ತರಗಳನ್ನು ನಂಬವುದಕ್ಕೂ ಮುನ್ನ ಅದಕ್ಕೆಂದೇ ರಚಿಸಲಾಗಿರುವ ವಿಶೇಷ ಸಮಿತಿಗೆ ಕಂಪನಿಗಳ ವರದಿಗಳನ್ನು ಕಳುಹಿಸಲಾಗುವುದು. ಪರೀಕ್ಷಿಸಿದ ಬಳಿಕ ನಿಷೇಧ ಸಡಿಲಗೊಳಿಸಬೇಕೇ? ಬೇಡವೇ? ಎಂದು ನಿರ್ಧರಿಸಲಾಗುವುದು.
ಇದೇ ವೇಳೆ ಟಿಕ್ಟಾಕ್ ತನ್ನ ಪಾರದರ್ಶಕ ವರದಿಯಲ್ಲಿ ನಮೂದಿಸಿರುವಂತೆ ತನ್ನ ವಿಷಯ ನೀತಿಗಳ ಉಲ್ಲಂಘನೆ ಆಧಾರದ ಮೇಲೆ 2019ರ ಕೊನೆಯ ಆರು ತಿಂಗಳಲ್ಲಿ ಸುಮಾರು 16 ಮಿಲಿಯನ್ ವಿಡಿಯೋಗಳನ್ನು ತೆಗೆದುಹಾಕಿರುವುದಾಗಿ ಹೇಳಿದೆ. ಅಲ್ಲದೆ, ಇದೇ ಸಮಯದಲ್ಲಿ ಜಾಗತಿಕವಾಗಿ ಸುಮಾರು 49 ಮಿಲಿಯನ್ ವಿಡಿಯೋಗಳನ್ನು ತೆಗೆದುಹಾಕಿರುವುದಾಗಿ ಟಿಕ್ಟಾಕ್ ತನ್ನ ವರದಿಯಲ್ಲಿ ಉಲ್ಲೇಖಿಸಿದೆ ಎಂದು ಕೆಲ ಮೂಲಗಳು ತಿಳಿಸಿವೆ.
ವಿಡಿಯೋಗಳನ್ನು ತೆಗೆದುಹಾಕುವಂತಹ ಅಥವಾ ಬಳಕೆದಾರರ ಮಾಹಿತಿಯ ಯಾವುದೇ ವಿನಂತಿಗಳನ್ನು ಚೀನಾದಿಂದ ಸ್ವೀಕರಿಸಿಲ್ಲ. ಒಂದು ವೇಳೆ ಕೇಳಿದರೆ ಅವರ ವಿನಂತಿಯನ್ನು ಪುರಷ್ಕರಿಸುವುದೂ ಇಲ್ಲ ಎಂದು ಕಂಪನಿ ತನ್ನ ವರದಿಯಲ್ಲಿ ತಿಳಿಸಿದೆ. ಅಲ್ಲದೆ, ಟಿಕ್ಟಾಕ್ ಮರುಸ್ಥಾಪಿಸುವಂತೆ ಸಾಕಷ್ಟು ಮನವಿಗಳು ಬರುತ್ತಿರುವುದಾಗಿ ಟಿಕ್ಟಾಕ್ ಹೇಳಿಕೊಂಡಿದೆ.
ಇದನ್ನೂ ಓದಿ: ಒಡಿಶಾ ಬ್ಯೂಟಿ ಬಗ್ಗೆ ಟ್ವೀಟ್ ಮಾಡಿದ್ದಕ್ಕೇ ಕಿಡಿಕಾರಿದ ನೆಟ್ಟಿಗರಿಗೆ ತಿರುಗೇಟು ನೀಡಿದ ಆರ್ಜಿವಿ!
ಇನ್ನು ಈ ತಿಂಗಳ ಆರಂಭದಲ್ಲಿ ಪ್ರಧಾನಿ ಮೋದಿ ನೇತೃತ್ವದ ಮೋದಿ ಸರ್ಕಾರ ಚೀನಾ 59 ಆ್ಯಪ್ಗಳ ಮೇಲೆ ನಿರ್ಬಂಧ ಹೇರಿತು. ಲಡಾಖ್ ಗಡಿಯಲ್ಲಿ ಭಾರತ ಮತ್ತು ಚೀನಾ ನಡುವಿನ ಸಂಘರ್ಷ ತಾರಕಕ್ಕೇರಿದ ಬೆನ್ನಲ್ಲೇ ದೇಶಾದ್ಯಂತ ಚೀನಾ ವಿರೋಧಿ ಅಲೆ ಕೇಳಿಬಂದಿತು. ಚೀನಾ ವಸ್ತುಗಳ ಬಹಿಷ್ಕಾರದ ಬಗ್ಗೆಯೂ ಮಾತುಗಳು ಕೇಳಿಬಂದಿತು. ಇದರ ಬೆನ್ನಲ್ಲೇ ಸರ್ಕಾರ ಆ್ಯಪ್ಗಳನ್ನು ಬ್ಯಾನ್ ಮಾಡಿ ಚೀನಾಗೆ ಕಠಿಣ ಸಂದೇಶ ರವಾನಿಸಿತು.
ಇದರ ಬೆನ್ನಲ್ಲೇ ಸ್ಪಷ್ಟನೆ ನೀಡಿದ್ದ ಟಿಕ್ಟಾಕ್, ಭಾರತದ ಕಾನೂನಿಗೆ ಅನುಗುಣವಾಗಿ ಕಂಪನಿಯೂ ಡೇಟಾ ಗೌಪ್ಯತೆ ಹಾಗೂ ಭದ್ರತೆಯನ್ನು ಅನುಸರಿಸುತ್ತಲೇ ಇದೆ ಎಂದು ಹೇಳಿಕೆ ನೀಡಿತು. ಅಲ್ಲದೆ, ಟಿಕ್ಟಾಕ್ ಮರುಸ್ಥಾಪಿಸುವ ಬಗ್ಗೆ ಕೇಂದ್ರ ಸರ್ಕಾರದೊಂದಿಗೆ ನಿರಂತರ ಸಂಪರ್ಕದಲ್ಲಿ ಇರುವುದಾಗಿಯೂ ಟಿಕ್ಟಾಕ್ ಹೇಳಿಕೊಂಡಿತು. (ಏಜೆನ್ಸೀಸ್)