ನವದೆಹಲಿ: ಎಸ್ಬಿಐ ಕ್ರೆಡಿಟ್ ಕಾರ್ಡ್ ಇರುವವರು ಇನ್ನುಮುಂದೆ ಗೂಗಲ್ ಪೇ ಮೂಲಕವೂ ಹಣ ಪಾವತಿಸಬಹುದು. ಇಂಥದ್ದೊಂದು ಸೌಲಭ್ಯಕ್ಕಾಗಿ ಈಗ ಎಸ್ಬಿಐ ಕಾರ್ಡ್ ಮತ್ತು ಗೂಗಲ್ ಪೇ ಮಧ್ಯೆ ಒಪ್ಪಂದ ಏರ್ಪಟ್ಟಿದೆ.
ಎಸ್ಬಿಐ ಕ್ರೆಡಿಟ್ ಕಾರ್ಡ್ ಹೋಲ್ಡರ್ಸ್ ಇದೀಗ ಗೂಗಲ್ ಪೇ ಮೂಲಕ ಮೂರು ರೀತಿಯಲ್ಲಿ ಹಣ ಪಾವತಿಸಬಹುದು. ಪಾಯಿಂಟ್ ಆಫ್ ಸೇಲ್ ಕೇಂದ್ರಗಳಲ್ಲಿ ಎನ್ಎಫ್ಸಿ ಮೂಲಕ ಟ್ಯಾಪ್ ಆ್ಯಂಡ್ ಪೇ ಅಥವಾ ಭಾರತ್ ಕ್ಯೂಆರ್ ಕೋಡ್ ಸ್ಕ್ಯಾನ್ ಅಥವಾ ಆನ್ಲೈನ್ ಮೂಲಕವೂ ಪೇ ಮಾಡಬಹುದು. ಇದಕ್ಕಾಗಿ ಕಾರ್ಡ್ ಬಳಕೆದಾರರು ಗೂಗಲ್ ಪೇನಲ್ಲಿ ಒನ್ ಟೈಮ್ ರಿಜಿಸ್ಟ್ರೇಷನ್ ಮಾಡಿಕೊಳ್ಳುವುದು ಅಗತ್ಯ.
ದೇಶದಲ್ಲಿ ಸ್ಮಾರ್ಟ್ಫೋನ್ ಬಳಕೆ ಹೆಚ್ಚಿರುವುದರಿಂದ ಹಾಗೂ ಸುರಕ್ಷಿತ ಮತ್ತು ಡಿಜಿಟಲ್ ಪೇಮೆಂಟ್ಗೆ ಉತ್ತೇಜನ ಕೊಡುವ ನಿಟ್ಟಿನಲ್ಲಿ ನಮ್ಮ ದೊಡ್ಡ ಗ್ರಾಹಕ ಬಳಗಕ್ಕೆ ಈ ಅವಕಾಶ ಒದಗಿಸಲಾಗಿದೆ ಎಂದು ಎಸ್ಬಿಐ ಕಾರ್ಡ್ ಸಿಇಒ ಮತ್ತು ಎಂಡಿ ಅಶ್ವಿನ್ ಕುಮಾರ್ ತಿವಾರಿ ಹೇಳಿದ್ದಾರೆ. (ಏಜೆನ್ಸೀಸ್)