ಬಾಲಿವುಡ್ನ ಹಿರಿಯ ಮತ್ತು ಜನಪ್ರಿಯ ನೃತ್ಯ ನಿರ್ದೇಶಕಿ ಸರೋಜ್ ಖಾನ್, ಇಂದು ಬೆಳಿಗ್ಗೆ ಅನಾರೋಗ್ಯದಿಂದ ನಿಧನರಾಗಿದ್ದಾರೆ. ಅವರ ಸಾವಿಗೆ ಭಾಷೆ ಮತ್ತು ಗಡಿಯ ಹಂಗಿಲ್ಲದೆ ಎಲ್ಲಾ ಸೆಲೆಬ್ರಿಟಿಗಳು ಸಹ ಕಂಬನಿ ಮಿಡಿದಿದ್ದಾರೆ.
ಇದನ್ನೂ ಓದಿ: ತಂದೆಯಿಲ್ಲದ ಮುಸ್ಲಿಂ ಯುವತಿ ಮದುವೆಗೆ ಸುದೀಪ್ ನೆರವು
ಬಾಲಿವುಡ್ನಲ್ಲಿ ದೊಡ್ಡ ಹೆಸರು ಮಾಡಿದ್ದ ಸರೋಜ್ ಅವರು ಕನ್ನಡ ಚಿತ್ರರಂಗದಲ್ಲೂ ಕೆಲಸ ಮಾಡಿದ್ದು ಎಲ್ಲರಿಗೂ ಗೊತ್ತೇ. ಕಳೆದ ವರ್ಷ ಬಿಡುಗಡೆಯಾದ ಮುರಳೀಕೃಷ್ಣ ನಿರ್ದೇಶನದ ‘ಗರ’ ಚಿತ್ರದ ಹಾಡಿಗೆ ಮುಂಬೈನಿಂದ ಬಂದು ಸರೋಜ್ ಅವರು ನೃತ್ಯ ನಿರ್ದೇಶನ ಮಾಡಿಸಿದ್ದರು. ಈ ಸಂದರ್ಭದಲ್ಲಿ ಅದೇ ಅವರು ನೃತ್ಯ ನಿರ್ದೇಶಿಸಿರುವ ಮೊದಲ ಕನ್ನಡ ಚಿತ್ರ ಎಂದು ಹೇಳಲಾಗಿತ್ತು.
ಆದರೆ, 30 ವರ್ಷಗಳ ಮುನ್ನವೇ ಸರೋಜ್ ಖಾನ್ ಅವರು ಕನ್ನಡದ ಚಿತ್ರವೊಂದಕ್ಕೆ ನೃತ್ಯ ನಿರ್ದೇಶನ ಮಾಡಿದ್ದರು ಎಂಬುದು ಬಹಳಷ್ಟು ಜನರಿಗೆ ಗೊತ್ತಿರಲಿಕ್ಕಿಲ್ಲ. ಹೌದು, 34 ವರ್ಷಗಳ ಹಿಂದೆ ಬಿಡುಗಡೆಯಾದ ‘ಆಫ್ರಿಕಾದಲ್ಲಿ ಶೀಲಾ’ ಚಿತ್ರಕ್ಕೆ ಸರೋಜ್ ಖಾನ್ ನೃತ್ಯ ಸಂಯೋಜನೆ ಮಾಡಿದ್ದರು. ಅವರನ್ನು ಕನ್ನಡ ಚಿತ್ರರಂಗಕ್ಕೆ ಮೊದಲು ಪರಿಚಯಿಸಿದ್ದು ಹಿರಿಯ ನಟ-ನಿರ್ದೇಶಕ ದ್ವಾರಕೀಶ್.
‘ಆಫ್ರಿಕಾದಲ್ಲಿ ಶೀಲಾ’ ಏಕಕಾಲಕ್ಕೆ ಕನ್ನಡ ಮತ್ತು ಹಿಂದಿಯಲ್ಲಿ ನಿರ್ಮಾಣವಾದ ಚಿತ್ರ. ಕನ್ನಡದಲ್ಲಿ ಚಿತ್ರದ ಹೆಸರು ‘ಆಫ್ರಿಕಾದಲ್ಲಿ ಶೀಲಾ’ ಎಂದಿದ್ದರೆ, ಹಿಂದಿಯಲ್ಲಿ ಚಿತ್ರಕ್ಕೆ ‘ಶೀಲಾ’ ಎಂಬ ಹೆಸರು ಇಡಲಾಗಿತ್ತು. ಈ ಚಿತ್ರದಲ್ಲಿ ಬಾಲಿವುಡ್ನ ಹಲವು ಕಲಾವಿದರು ಮತ್ತು ತಂತ್ರಜ್ಱರು ಕೆಲಸ ಮಾಡಿದ್ದರು. ಪ್ರಮುಖವಾಗಿ ಬಾಲಿವುಡ್ನ ಜನಪ್ರಿಯ ಸಂಗೀತ ನಿರ್ದೇಶಕ ಬಪ್ಪಿ ಲಹರಿ, ಈ ಚಿತ್ರಕ್ಕೆ ಸಂಗೀತ ಸಂಯೋಜಿಸಿದ್ದರು. ಇನ್ನು ಸರೋಜ್ ಖಾನ್ ನೃತ್ಯ ನಿರ್ದೇಶನ ಮಾಡಿದ್ದರು. ಖ್ಯಾತ ನೃತ್ಯ ನಿರ್ದೇಶಕ ಅಹ್ಮದ್ ಖಾನ್, ಈ ಚಿತ್ರಕ್ಕೆ ಸರೋಜ್ ಅವರಿಗೆ ಅಸಿಸ್ಟ್ ಮಾಡಿದ್ದರು. ಅವರಿಬ್ಬರ ಹೆಸರುಗಳನ್ನು ಚಿತ್ರದ ಟೈಟಲ್ ಕಾರ್ಡ್ನಲ್ಲಿ ನೋಡಬಹುದು. ಇದಲ್ಲದೆ ಬಾಲಿವುಡ್ ನಟಿಯರಾದ ಸಾಹಿಲಾ ಚಡ್ಡಾ, ರಂಜಿತಾ ಮುಂತಾದವರು ನಟಿಸಿದ್ದರು.
ಇದನ್ನೂ ಓದಿ: ಓಟಿಟಿ ವೇದಿಕೆಯತ್ತ ಪ್ರಿಯಾಂಕಾ ಉಪೇಂದ್ರ ‘ಸೇಂಟ್ ಮಾರ್ಕ್ಸ್ ರಸ್ತೆ’
ಅದಕ್ಕೂ ಮುನ್ನ ಹಿಂದಿಯ ಹಲವು ಚಿತ್ರಗಳಿಗೆ ನೃತ್ಯ ನಿರ್ದೇಶಿಸಿದ್ದ ಸರೋಜ್ ಖಾನ್ ಅವರು, ‘ಆಫ್ರಿಕಾದಲ್ಲಿ ಶೀಲಾ’ ಬಿಡುಗಡೆಯಾಗಿ ಎರಡು ವರ್ಷಗಳ ನಂತರ ‘ತೇಜಾಬ್’ ಚಿತ್ರಕ್ಕೆ ನೃತ್ಯ ನಿರ್ದೇಶನ ಮಾಡಿದರು. ಈ ಚಿತ್ರದ ‘ಏಕ್ ದೋ ತೀನ್’ ಹಾಡು ಜನಪ್ರಿಯವಾಗಿ, ಮುಂದಿನ ಎರಡು ದಶಕಗಳ ಕಾಲ ಸರೋಜ್ ಅವರು ಬಾಲಿವುಡ್ನ ಬೇಡಿಕೆಯ ನೃತ್ಯ ನಿರ್ದೇಶಿಕಿಯಾದರು. ಹಾಗಾಗಿ ‘ಆಫ್ರಿಕಾದಲ್ಲಿ ಶೀಲಾ’ ನಂತರ ಸರೋಜ್ ಅವರು ಕಳೆದ ವರ್ಷದ ತನಕ ಯಾವುದೇ ಕನ್ನಡ ಚಿತ್ರಕ್ಕೂ ಕೆಲಸ ಮಾಡಿರಲಿಲ್ಲ ಎಂಬುದು ಗಮನಾರ್ಹ.