ನವದೆಹಲಿ: ಪಾಕಿಸ್ತಾನ ಕ್ರಿಕೆಟ್ ತಂಡದ ಮಾಜಿ ನಾಯಕ, ಅನುಭವಿ ಆಲ್ರೌಂಡರ್ ಶೋಯೆಬ್ ಮಲಿಕ್ ಇತ್ತೀಚಿನ ದಿನಗಳಲ್ಲಿ ಒಂದಿಲ್ಲೊಂದು ವಿಚಾರಕ್ಕೆ ಹೆಚ್ಚು ಸದ್ದು ಮಾಡುತ್ತಿದ್ದಾರೆ. ಇದೀಗ ಹೊಸ ವಿಚಾರದಲ್ಲಿ ಅವರು ಮ್ಯಾಚ್ ಫಿಕ್ಸಿಂಗ್ ಮಾಡಿದ್ದಾರೆ ಎಂಬ ಆರೋಪ ಕೇಳಿ ಬಂದಿದ್ದು, ಸಾಮಾಜಿಕ ಜಾಲತಾಣದಲ್ಲಿ ಮಲಿಕ್ರನ್ನು ವ್ಯಾಪಕವಾಗಿ ಟ್ರೋಲ್ ಮಾಡಲಾಗುತ್ತಿದೆ.
ಹಾಲಿ ನಡೆಯುತ್ತಿರುವ ಬಾಂಗ್ಲಾದೇಶ ಪ್ರೀಮಿಯರ್ ಲೀಗ್ನಲ್ಲಿ ಈ ಘಟನೆ ನಡೆದಿದ್ದು, ಫಾರ್ಚೂನ್ ಬಾರಿಶಲ್ ತಂಡದ ಪರ ಆಡುತ್ತಿರುವ ಶೋಯೆಬ್ ಮಲಿಕ್ ಒಂದೇ ಓವರ್ನಲ್ಲಿ ಮೂರು ನೋಬಾಲ್ ಎಸೆದಿರುವುದು ಹಲವು ಅನುಮಾನಗಳಿಗೆ ಎಡೆ ಮಾಡಿಕೊಟ್ಟಿದೆ. ಈ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಅವರನ್ನು ನೆಟ್ಟಿಗರು ಟೀಕಿಸಿದ್ದು, ಸನಾ ಜಾವೇದ್ ಕಾಲ್ಗುಣ ಇರಬೇಕು ಎಂದು ವ್ಯಂಗ್ಯವಾಡಿದ್ದಾರೆ.
ಡೆತ್ ಓವರ್ನಲ್ಲಿ ಮಲಿಕ್ ಅವರನ್ನು ಕಣಕ್ಕಿಳಿಸಿದ ನಾಯಕ ಮುಶ್ಫಿಕರ್ ರಹಮಾನ್ ಲೆಕ್ಕ ತಲೆ ಕೆಳಗಾಗಿದ್ದು, ಒಂದು ಓವರ್ನಲ್ಲಿ ಮೂರು ನೋಬಾಲ್ ಒಳಗೊಂಡಂತೆ 18ರನ್ ನೀಡಿದ್ದಾರೆ. ಬ್ಯಾಟಿಂಗ್ನಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಾರೆ ಎಂದು ಭಾವಿಸಲಾಗಿತ್ತಾದರೂ 6 ಬಾಲ್ಗಳನ್ನು ಎದುರಿಸಿ 5 ರನ್ಗಳಿಸಲಷ್ಟೇ ಶೋಯೆಬ್ ಮಲಿಕ್ ಶಕ್ತರಾದರು.
ಇದನ್ನೂ ಓದಿ: ಲ್ಯಾಂಡಿಂಗ್ ವೇಳೆ ತಾಂತ್ರಿಕ ದೋಷ; ಸೇನಾ ವಿಮಾನ ಪತನ
20 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 187 ರನ್ಗಳಿಸಿದ ಫಾರ್ಚೂನ್ ಬಾರಿಶಲ್ ತಂಡ ಎದುರಾಳಿ ಖುಲ್ನಾ ಟೈಗರ್ಸ್ ವಿರುದ್ಧ ಸವಾಲಿನ ಮೊತ್ತವನ್ನು ರಕ್ಷಿಸಿಕೊಳ್ಳುವಲ್ಲಿ ವಿಫಲವಾಯಿತು. ಖುಲ್ನಾ ಟೈಗರ್ಸ್ ಅನಿಮಲ್ ಹಕ್ ಮತ್ತು ಇವಾನ್ ಲೂಯಿಸ್ ಸ್ಫೋಟಕ ಬ್ಯಾಟಿಂಗ್ ಫಲವಾಗಿ ಗುರಿಯನ್ನು 8 ಓವರ್ಗಳು ಬಾಕಿ ಇರುವಂತೆ ಗೆಲುವಿನ ದಡ ಸೇರಿತ್ತು.
ಇತ್ತ ಪಂದ್ಯದಲ್ಲಿ ಶೋಯೆಬ್ ಮಲಿಕ್ ಪ್ರದರ್ಶನವನ್ನು ಪ್ರಶ್ನಿಸಿರುವ ನೆಟ್ಟಿಗರು ಸನಾ ಜಾವೇದ್ ಕಾಲ್ಗುಣದ ಪ್ರಭಾವ ತುಂಬಾ ಚೆನ್ನಾಗಿ ಪರಿಣಮಿಸಿದೆ. ಒಂದೇ ಓವರ್ನಲ್ಲಿ ಬೇಕಂತಲೇ ಮೂರು ನೋಬಾಲ್ಗಳನ್ನು ಎಸೆದಿರುವುದನ್ನು ನೋಡಿದರೆ ಮ್ಯಾಚ್ ಫಿಕ್ಸಿಂಗ್ ಆದಂತೆ ಕಾಣುತ್ತಿದೆ. ಪಾಕಿಸ್ತಾನಿಗಳು ಮ್ಯಾಚ್ ಫಿಕ್ಸಿಂಗ್ ಮಾಡುವುದರಲ್ಲಿ ಹೆಸರುವಾಸಿಯಾಗಿದ್ದಾರೆ ಎಂದು ಹಲವರು ಕಮೆಂಟ್ನಲ್ಲಿ ಶೋಯೆಬ್ ಮಲಿಕ್ರನ್ನು ದೂಷಿಸಿದ್ದಾರೆ.