ಮುಂಬೈ: ಮೆಟ್ರೋ ರೈಲಿನಲ್ಲಿ ಡ್ಯಾನ್ಸ್ ಮಾಡುವ ವಿಡಿಯೋಗಳು ಆಗಾಗ ವೈರಲ್ ಆಗುತ್ತಲೇ ಇರುತ್ತೆ. ಅದ್ರಲ್ಲೂ ಮೊನ್ನೆಯಷ್ಟೆ ಯುವತಿಯೊಬ್ಬರು ಜವಾನ್ ಸಿನಿಮಾದ ಸೀನ್ ಒಂದನ್ನ ಮೆಟ್ರೋನಲ್ಲಿ ಮಾಡಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿತ್ತು.
ಇದೀಗ ವ್ಯಕ್ತಿಯೊಬ್ಬ ಮುಂಬೈನ ಲೋಕಲ್ ಮೆಟ್ರೋ ಟ್ರೈನ್ನಲ್ಲಿ ಸಲ್ಮಾನ್ ಖಾನ್ ರೀತಿಯೇ ಉಡುಪು ಧರಿಸಿ, ಹೆಜ್ಜೆ ಹಾಕಿರುವ ವಿಡಿಯೋ ವೈರಲ್ ಆಗಿದೆ. ಎಕ್ಸ್(ಟ್ವಿಟ್ಟರ್ನಲ್ಲಿ) ಈ ವಿಡಿಯೋವನ್ನ ಪೋಸ್ಟ್ ಮಾಡಲಾಗಿದ್ದು, ಈ ವ್ಯಕ್ತಿ ನೇರಳೆ ಬಣ್ಣದ ಟೀ ಶರ್ಟ್ ಮತ್ತು ಕಪ್ಪು ಪ್ಯಾಂಟ್ ಧರಿಸಿ, ಚಲಿಸುತ್ತಿರುವ ರೈಲಿನೊಳಗೆ ಉತ್ಸಾಹದಿಂದ ನೃತ್ಯ ಮಾಡಿದ್ದಾನೆ.
ಹೀಗೆ ಡ್ಯಾನ್ಸ್ ಮಾಡುತ್ತಿದ್ದ ವ್ಯಕ್ತಿಯನ್ನ ಕಂಡು ಸುತ್ತಲೂ ನೆರೆದಿದ್ದ ಜನರು ಹರ್ಷೋದ್ಗಾರದಿಂದ ಚಪ್ಪಾಳೆ ತಟ್ಟಿ ಆತನನ್ನು ಪ್ರೋತ್ಸಾಹಿಸಿದ್ದಾರೆ.
ಆದರೆ, ಸೆಂಟ್ರಲ್ ರೈಲ್ವೇ ಈ ವಿಡಿಯೋವನ್ನು ಗಂಭೀರವನ್ನು ಪರಿಗಣಿಸಿದ್ದು, ರೈಲುಗಳಲ್ಲಿ ಇಂತಹ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳದಂತೆ ಪ್ರಯಾಣಿಕರಿಗೆ ಸಂದೇಶ ನೀಡಿದೆ.
ಇಂತಹ ನಡವಳಿಕೆಯು ಸಹ-ಪ್ರಯಾಣಿಕರಿಗೆ ತೊಂದರೆಯನ್ನುಂಟುಮಾಡುತ್ತದೆ ಹಾಗಾಗಿ ರೈಲು ಪ್ರಯಾಣದ ಸಮಯದಲ್ಲಿ ಯಾರೂ ಇಂತಹ ಡ್ಯಾನ್ಸ್ ಅಥವಾ ರೀಲ್ಸ್ ಮೇಕಿಂಗ್ಗೆ ಪ್ರೋತ್ಸಾಹಿಸ ಬಾರದೆಂದು ತನ್ನ ಅಧಿಕೃತ ಖಾತೆಯಿಂದ ಮಾಡಲಾಗಿರುವ ಎಕ್ಸ್ ಪೋಸ್ಟ್ನಲ್ಲಿ ತಿಳಿಸಿದೆ.
ಮುಂಬೈ ಲೋಕಲ್ ಟ್ರೈನ್‌ಗಳಲ್ಲಿ ಜನರು ನೃತ್ಯ ಮಾಡುತ್ತಿರುವ ವಿಡಿಯೋಗಳು ವೈರಲ್ ಆಗುತ್ತಿರುವುದು ಇದೇ ಮೊದಲಲ್ಲ. ಮಹಿಳೆಯೊಬ್ಬರು ಬೆಲ್ಲಿ ಡ್ಯಾನ್ಸ್ ಮಾಡುತ್ತಿರುವ ವಿಡಿಯೋ ಇತ್ತೀಚೆಷ್ಟೆ ವೈರಲ್ ಆಗಿತ್ತು