ಮುಂಬೈ: ರಾಜಮೌಳಿ ನಿರ್ದೇಶನದ ಆರ್ಆರ್ಆರ್ ಚಿತ್ರದ ಡಿಜಿಟಲ್ ಮತ್ತು ಸ್ಯಾಟಿಲೈಟ್ ಹಕ್ಕುಗಳನ್ನು ಜೀ ಸಂಸ್ಥೆಯು 325 ಕೋಟಿ ಕೊಟ್ಟು ಖರೀದಿಸಿದೆ ಎಂಬ ಸುದ್ದಿ ಕಳೆದ ವಾರವೇ ಕೇಳಿಬಂದಿತ್ತು. ಆದರೆ, ಈ ವಿಷಯವಾಗಿ ಜೀ ಸಂಸ್ಥೆಯಾಗಲೀ, ಚಿತ್ರತಂಡದವರಾಗಲೀ ಯಾವುದೇ ಅಧಿಕೃತ ಮಾಹಿತಿಯನ್ನು ಸಹ ನೀಡಿರಲಿಲ್ಲ. ಈಗ ಚಿತ್ರತಂಡದವರಿಂದಲೇ ಅಧಿಕೃತ ಮಾಹಿತಿ ಹೊರಬಿದ್ದಿದ್ದು, ಡಿಜಿಟಲ್ ಮತ್ತು ಸ್ಯಾಟಿಲೈಟ್ ಹಕ್ಕುಗಳನ್ನು ಜೀ ಸಂಸ್ಥೆ ಖರೀದಿಸಿರುವುದು ನಿಜ ಎಂದು ಒಪ್ಪಿಕೊಂಡಿದೆ. ಆದರೆ, ಈ ಡೀಲ್ ಎಷ್ಟು ಕೋಟಿ ರೂ.ಗಳಿಗೆ ಆಗಿದೆ ಎಂಬ ವಿಷಯವನ್ನು ಚಿತ್ರ ತಂಡ ಬಹಿರಂಗಪಡಿಸುವುದಕ್ಕೆ ಹೋಗಿಲ್ಲ.
ಇದನ್ನೂ ಓದಿ: ಎಂಜಿಎಂ ಖರೀದಿಸಲು ಒಪ್ಪಿದ ಅಮೇಜಾನ್ … ರೇಟ್ ಕೇಳಿದರೆ ಬೆಚ್ಚಿ ಬೀಳ್ತೀರಿ
ಆರ್ಆರ್ಆರ್ ಚಿತ್ರವು ಭಾರತದಲ್ಲಿ ಐದು ಭಾಷೆಗಳಲ್ಲಿ ಬಿಡುಗಡೆಯಾಗುತ್ತಿದ್ದು, ಐದೂ ಭಾಷೆಗಳ ಸ್ಯಾಟಿಲೈಟ್ ಮತ್ತು ಡಿಜಿಟಲ್ ಹಕ್ಕುಗಳನ್ನು ವಿವರವನ್ನು ಚಿತ್ರತಂಡ ಘೋಷಿಸಿದೆ. ಓಟಿಟಿ ವಿಷಯದಲ್ಲಿ ಹೇಳುವುದಾದರೆ, ಆರ್ಆರ್ಆರ್ ಚಿತ್ರದ ತೆಲುಗು, ತಮಿಳು, ಮಲಯಾಳಂ ಹಾಗೂ ಕನ್ನಡ ಚಿತ್ರಗಳು ಜೀ5ನಲ್ಲಿ ಸ್ಟ್ರೀಮ್ ಆಗಲಿದೆ. ಇನ್ನು, ಹಿಂದಿ ಅವತರಣಿಕೆಯು ನೆಟ್ಫ್ಲಿಕ್ಸ್ನಲ್ಲಿ ಸ್ಟ್ರೀಮ್ ಆಗಲಿದೆ. ಅದೇ ರೀತಿ, ಸ್ಯಾಟಿಲೈಟ್ ಹಕ್ಕುಗಳ ವಿಷಯದಲ್ಲೂ ಜೀ ಮತ್ತು ಸ್ಟಾರ್ ವಾಹಿನಿಗಳಲ್ಲಿ ಈ ಚಿತ್ರದ ಬೇರೆಬೇರೆ ಅವತರಣಿಕೆಗಳು ಪ್ರಸಾರವಾಗಲಿವೆ.
ವಿಶೇಷವೆಂದರೆ, ಆರ್ಆರ್ಆರ್ ಚಿತ್ರವು ಒಟ್ಟಾರೆ 10ಕ್ಕೂ ಹೆಚ್ಚು ಭಾಷೆಗಳಲ್ಲಿ ಬಿಡುಗಡೆಯಾಗುತ್ತಿದೆ. ಭಾರತದಲ್ಲಿ ತೆಲುಗು, ತಮಿಳು, ಕನ್ನಡ, ಹಿಂದಿ ಮತ್ತು ಮಲಯಾಳಂ ಭಾಷೆಗಳಲ್ಲಿ ಬಿಡುಗಡೆಯಾಗುವುದರ ಜತೆಗೆ ಇಂಗ್ಲೀಷ್, ಪೋರ್ಚುಗೀಸ್, ಕೊರಿಯನ್, ಟರ್ಕಿಶ್ ಮತ್ತು ಸ್ಪಾನಿಶ್ ಭಾಷೆಗಳಿಗೂ ಚಿತ್ರ ಡಬ್ ಆಗುತ್ತಿದ್ದು, ಈ ಫಾರಿನ್ ಭಾಷೆಗಳ ಓಟಿಟಿ ಹಕ್ಕುಗಳನ್ನು ನೆಟ್ಫ್ಲಿಕ್ಸ್ ಈಗಾಗಲೇ ಖರೀದಿಸಿದೆ.
ಇದನ್ನೂ ಓದಿ: ಚಿತ್ರನಟ ಸಂಜಯ್ ದತ್ಗೆ ಸಿಕ್ಕಿತು ದುಬೈನ ಗೋಲ್ಡನ್ ವೀಸಾ- ಟ್ವಿಟರ್ನಲ್ಲಿ ಮಾಹಿತಿ
ಸದ್ಯಕ್ಕೆ 10 ಭಾಷೆಗಳ ಘೋಷಣೆ ಮಾತ್ರ ಆಗಿದೆ. ಮುಂದಿನ ದಿನಗಳಲ್ಲಿ ಇನ್ನೂ ಎರಡು ಭಾಷೆಗಳಿಗೆ ಡಬ್ ಆಗುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ. ರಾಜಮೌಳಿ ನಿರ್ದೇಶನದ ಬಾಹುಬಲಿ 2 ಚಿತ್ರವು ರಷ್ಯನ್ ಮತ್ತು ಜಾಪನೀಸ್ ಭಾಷೆಗಳಿಗೂ ಡಬ್ ಆಗಿ, ಬಿಡುಗಡೆಯಾಗಿತ್ತು. ಚಿತ್ರ ಅಲ್ಲಿ ಸೂಪರ್ ಹಿಟ್ ಆದ ಕಾರಣ, ರಾಜಮೌಳಿ ನಿರ್ದೇಶನದ ಈ ಚಿತ್ರಕ್ಕೂ ಬೇಡಿಕೆ ಬರುತ್ತಿದ್ದು, ಸದ್ಯದಲ್ಲೇ ಆರ್ಆರ್ಆರ್ ಸಹ ರಷ್ಯನ್ ಮತ್ತು ಜಾಪನೀಸ್ ಭಾಷೆಗಳಿಗೂ ಡಬ್ ಆಗಲಿದೆ ಎಂದು ಹೇಳಲಾಗುತ್ತಿದೆ.