ವುಹಾನ್: ಜಗತ್ತನ್ನೇ ಅಲ್ಲೋಲಕಲ್ಲೋಲ ಮಾಡಿದ ಮಹಾಮಾರಿ ಕರೊನಾ ನಿಜವಾಗಿ ಹುಟ್ಟಿದ್ದು ಹೇಗೆ ಎಂಬುದು ಶೀರ್ಘದಲ್ಲೇ ಬೆಳಕಿಗೆ ಬರಲಿದೆ. ಏಕೆಂದರೆ, ಕರೊನಾ ವೈರಸ್ ಮೊದಲು ಕಾಣಿಸಿಕೊಂಡ ಚೀನಾದ ವುಹಾನ್ನಲ್ಲಿ ತನಿಖೆ ನಡೆಸುತ್ತಿರುವ ಅಂತಾರಾಷ್ಟ್ರೀಯ ವಿಜ್ಞಾನಿಗಳ ತಂಡ ಸದ್ಯದಲ್ಲೇ ತನಿಖೆ ಪೂರೈಸಲಿದೆ ಎನ್ನಲಾಗಿದೆ.
ಇಡೀ ಜಗತ್ತಿಗೆ ಕರೊನಾ ಮಹಾಮಾರಿಯನ್ನು ಹರಡಿರುವ ಕೋವಿಡ್-19 ವೈರಾಣು, ಡಿಸೆಂಬರ್ 2019 ರಲ್ಲಿ ವುಹಾನ್ನಲ್ಲಿ ಜನಿಸಿದ್ದರ ಕಾರಣವನ್ನು 10 ಸ್ವತಂತ್ರ ವಿಜ್ನಾನಿಗಳ ತಂಡವು ಶೋಧಿಸುತ್ತಿದೆ. ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಾಯೋಜಕತ್ವದಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಈ ತಜ್ಞರ ತಂಡ ಜನವರಿ 14 ಕ್ಕೆ ವುಹಾನ್ಗೆ ತೆರಳಿತ್ತು. ಕರೊನಾ ವೈರಾಣು ಮೊದಲು ಹುಟ್ಟಿತು ಎನ್ನಲಾದ ವುಹಾನ್ನ ಸೀಫುಡ್ ಮಾರುಕಟ್ಟೆ ಸೇರಿದಂತೆ ಹಲವು ಸಂಶೋಧನಾ ಕೇಂದ್ರ, ಆಸ್ಪತ್ರೆಗಳಲ್ಲಿ ತಂಡ ಶೋಧ ಕಾರ್ಯ ನಡೆಸಿದೆ. ಸಾರ್ಸ್-ಕೋವ್-2 ವೈರಾಣುವಿನ ಪ್ರಾಣಿಮೂಲವನ್ನು ಕಂಡುಹಿಡಿದು, ಅದು ಮನುಷ್ಯರಿಗೆ ಹೇಗೆ ತಲುಪಿತು ಎಂಬುದನ್ನು ಅಧ್ಯಯನ ಮಾಡುತ್ತಿದೆ.
ಇದನ್ನೂ ಓದಿ: ಮೇಡ್ ಇನ್ ಇಂಡಿಯಾ ಕರೊನಾ ಲಸಿಕೆಗಾಗಿ 25 ದೇಶಗಳು ಕ್ಯೂನಲ್ಲಿವೆ
ತಂಡದ ಸದಸ್ಯರಾದ ನ್ಯೂಯಾರ್ಕ್ ಮೂಲದ ಪ್ರಾಣಿಶಾಸ್ತ್ರಜ್ಞ, ಪೀಟರ್ ಡಾಸ್ಜಾಕ್ , ತಮ್ಮ ತಂಡ ಚೀನಾದ ತಜ್ಞರೊಂದಿಗೆ ಕೆಲಸ ಮಾಡಿದ್ದು, “ಏನು ನಡೆಯಿತು ಎಂಬ ಬಗ್ಗೆ ಕೆಲವು ನಿಜವಾದ ಸುಳಿವುಗಳನ್ನು ಪತ್ತೆ ಹಚ್ಚಿದೆ” ಎಂದಿದ್ದಾರೆ. ತಾವು ಫೆಬ್ರವರಿ 10 ರಂದು ಚೀನಾದಿಂದ ಮರಳುವ ವೇಳೆಗೆ ಈ ಸುದೀರ್ಘ ತನಿಖೆಯ ಫಲಿತಾಂಶವು ಹೊರಬೀಳಲಿದೆ ಎಂದೂ ತಿಳಿಸಿದ್ದಾರೆ.
“ಏನಾಯಿತು ಎಂಬ ಬಗ್ಗೆ ಆಳವಾದ ಅರಿವು ಮೂಡಿಸುವುದಕ್ಕೆ ಈ ತನಿಖಾ ವರದಿ ನಾಂದಿ ಹಾಡಲಿದೆ. ಈ ಮುಂದೆ ಈ ರೀತಿಯ ಮಹಾಮಾರಿ ಹರಡದಂತೆ ಎಚ್ಚರ ವಹಿಸಲು ಸಹಾಯಕವಾಗಲಿದೆ” ಎಂದಿದ್ದಾರೆ. “ಇಂಥ ವೈರಾಣುಗಳು ಹೇಗೆ ಹುಟ್ಟುತ್ತವೆ ಎಂದು ಅರಿತುಕೊಳ್ಳುವುದು ನಮ್ಮ ಮೂಲ ಉದ್ದೇಶವಾಗಿದೆ. ಏಕೆಂದರೆ ಈ ರೀತಿಯ ಜಾಗತಿಕ ಆರ್ಥಿಕ ಸಂಕಟವನ್ನು ಮತ್ತು ಅಗಾಧ ಸಂಖ್ಯೆಯ ಸಾವುಗಳನ್ನು ಮತ್ತೆ ಅನುಭವಿಸುವುದು ತರವಲ್ಲ” ಎಂದು ಪೀಟರ್ ಡಾಸ್ಜಾಕ್ ಹೇಳಿದ್ದಾರೆ.(ಏಜೆನ್ಸೀಸ್)
ಅರ್ಧ ಕೋಟಿ ಭಾರತೀಯರಿಗೆ ತಲುಪಿದ ಕರೊನಾ ಲಸಿಕೆ ; ಉತ್ತರಪ್ರದೇಶದಲ್ಲಿ ಅತಿಹೆಚ್ಚು ಫಲಾನುಭವಿಗಳು
ಟೆಕ್ರಿ ಗಡಿಯಲ್ಲಿ ರೈತನ ಆತ್ಮಹತ್ಯೆ? 40 ಲಕ್ಷ ಟ್ರ್ಯಾಕರ್ ತಂದು ರ‍್ಯಾಲಿ ನಡೆಸುವುದು ಗುರಿ ಎಂದಿದ್ದಾರೆ ಟಿಕಾಯತ್