ಬೆಂಗಳೂರು: ದಕ್ಷಿಣ ಭಾರತದಲ್ಲಿ ಸಂಚಲನ ಉಂಟುಮಾಡಿರುವ ನ್ಯಾಷನಲ್ ಕ್ರಷ್ ಎಂದೇ ಕರೆಸಿಕೊಳ್ಳುವ ಕನ್ನಡತಿ ನಟಿ ರಶ್ಮಿಕಾ ಮಂದಣ್ಣ ಬಾಲಿವುಡ್ನತ್ತ ಮುಖ ಮಾಡಿರುವುದು ಗೊತ್ತಿರುವ ವಿಚಾರವೇ. ಇತ್ತೀಚೆಗಷ್ಟೇ ಬಾಲಿವುಡ್ನ ಟಾಪ್ ರ್ಯಾಪರ್ ಬಾದ್ಷಾ ಅವರ ಹಾಡಿನಲ್ಲಿ ರಶ್ಮಿಕಾ ಹೆಜ್ಜೆ ಹಾಕಿ ಬಂದಿರುವುದೂ ದೊಡ್ಡ ಸುದ್ದಿಯಾಗಿತ್ತು. ಇದೀಗ ಅದೇ ಹಾಡು ಯೂಟ್ಯೂಬ್ನಲ್ಲಿ ಬಿಡುಗಡೆ ಆಗಿದೆ. ಹೌದು, ಇಲ್ಲಿಯವರೆಗೂ ಸಿನಿಮಾಗಳ ಮೂಲಕ ಮೋಡಿ ಮಾಡಿದ್ದ ರಶ್ಮಿಕಾ, ಮೊದಲ ಬಾರಿಗೆ ಮ್ಯೂಸಿಕ್ ಜಗತ್ತಿಗೆ ಪದಾರ್ಪಣೆ ಮಾಡಿದ್ದಾರೆ. ‘ಟಾಪ್ ಟಕ್ಕರ್’ ಶೀರ್ಷಿಕೆಯ ಹಾಡಿಗೆ ಬಾದ್ಷಾ ಧ್ವನಿ ನೀಡಿದ್ದು, ರಶ್ಮಿಕಾ ಮೈ ಚಳಿ ಬಿಟ್ಟು ಕುಣಿದಿದ್ದಾರೆ.
ಬಹುಕೋಟಿ ರೂಪಾಯಿ ವೆಚ್ಚದಲ್ಲಿ ಸಿದ್ಧವಾಗಿರುವ ಈ ಹಾಡಿಗೆ ಬಾಲಿವುಡ್ನ ಖ್ಯಾತ ಚಿತ್ರ ನಿರ್ಮಾಣ ಸಂಸ್ಥೆ ಯಶ್ರಾಜ್ ಫಿಲಂಸ್ ಬಂಡವಾಳ ಹಾಕಿದೆ. ಈ ಹಾಡಿನ ಸಲುವಾಗಿ ಚಂಡಿಗಢದಲ್ಲಿ ಕಲರ್ಫುಲ್ ಸೆಟ್ ಹಾಕಿ ಅದ್ಧೂರಿ ವೆಚ್ಚದಲ್ಲಿಯೇ ಹಾಡಿನ ಚಿತ್ರೀಕರಣ ಮಾಡಲಾಗಿದೆ. ಅಂದಹಾಗೆ, ಇಳಯರಾಜಾ ಪುತ್ರ ಯುವನ್ ಶಂಕರ್ ರಾಜಾ ಸಂಗೀತ ನೀಡಿರುವ ಈ ಹಾಡಿಗೆ ರ್ಯಾಪರ್ ಬಾದ್ಷಾ, ಉಚಾನ್ ಅಮೀತ್, ಜೋನಿತಾ ಗಾಂಧಿ ಧ್ವನಿ ನೀಡಿದ್ದಾರೆ. ‘ಟಾಪ್ ಟಕ್ಕರ್’ ಹಾಡಿಗೆ ಬಾದ್ಷಾ ಸಾಹಿತ್ಯ ಬರೆದಿದ್ದಾರೆ. ಅಮರ್ಪ್ರೀತ್ ಛಾಬ್ರಾ ನಿರ್ದೇಶನದ ಈ ಹಾಡಿಗೆ ರಿಚ್ಚಿ ಬರ್ಟನ್ ನೃತ್ಯ ನಿರ್ದೇಶನ ಮಾಡಿದ್ದಾರೆ.