ಪಟನಾ: ಭಾರತದಲ್ಲಿನ ಪ್ರಖ್ಯಾತ ಚಾಯ್ವಾಲಾಗಳ ಬಗ್ಗೆ ನಾವು ಕೇಳಿದ್ದೇವೆ. ಅಲ್ಲದೆ, ಪ್ರತಿಯೊಬ್ಬ ಚಹಾ ಪ್ರೇಮಿಗೂ ಓರ್ವ ಫೇವರಿಟ್ ಚಾಯ್ವಾಲಾ ಇದ್ದೇ ಇರುತ್ತಾನೆ. ಇದೀಗ ಈ ಪಟ್ಟಿಗೆ ಮತ್ತೊಬ್ಬರು ಸೇರಿದ್ದಾರೆ. ಆದರೆ, ಇವರು ಚಾಯ್ವಾಲಾ ಅಲ್ಲ ಚಾಯ್ವಾಲಿ. ಈ ಖ್ಯಾತ ಚಾಯ್ವಾಲಿ ಹರಿಯಾಣ ಮೂಲದವರಾಗಿದ್ದು, ಬಿ.ಟೆಕ್ ವಿದ್ಯಾರ್ಥಿನಿ ಎಂಬುದೇ ವಿಶೇಷ.
ವಿದ್ಯಾರ್ಥಿನಿಯ ಹೆಸರು ವರ್ತಿಕಾ ಸಿಂಗ್. ಈಕೆ ಬಿಹಾರದಲ್ಲಿ ಬಿ.ಟೆಕ್ ಮಾಡುತ್ತಿದ್ದಾರೆ. ತನ್ನದೇಯಾದ ಸ್ಟಾರ್ಟ್ಅಪ್ ಮಾಡಬೇಕೆಂಬುದು ಈಕೆ ಕನಸಾಗಿತ್ತು. ಆದರೆ, ಬಿ.ಟೆಕ್ ಮುಗಿಯುವುದಕ್ಕೆ ಇನ್ನು ನಾಲ್ಕು ವರ್ಷಗಳು ಇರುವುದರಿಂದ ಅಲ್ಲಿಯವರೆಗೂ ಕಾಯಲಾರದೇ ಬಿ.ಟೆಕ್ ಚಾಯ್ವಾಲಿ ಹೆಸರಿನಲ್ಲಿ ಟೀ ಸ್ಟಾರ್ ಆರಂಭಿಸುವ ಮೂಲಕ ತಮ್ಮ ಸ್ಟಾರ್ಟ್ಅಪ್ ಕನಸನ್ನು ವರ್ತಿಕಾ ನನಸು ಮಾಡಿಕೊಂಡಿದ್ದಾರೆ. ಹರಿಯಾಣದ ಫರೀದಾಬಾದ್ನಲ್ಲಿ ವರ್ತಿಕಾ ಟೀ ಸ್ಟಾಲ್ ಇಟ್ಟುಕೊಂಡಿದ್ದಾರೆ.
ವರ್ತಿಕಾ ಅವರ ವಿಡಿಯೋವನ್ನು ಸ್ವ್ಯಾಗ್ ಸೆ ಡಾಕ್ಟರ್ (Swag Se Doctor) ಹೆಸರಿನ ಇನ್ಸ್ಟಾಗ್ರಾಂ ಪೇಜ್ನಲ್ಲಿ ಪೋಸ್ಟ್ ಮಾಡಲಾಗಿದ್ದು, ವಿಡಿಯೋದಲ್ಲಿ ವರ್ತಿಕಾ ತನ್ನ ಟೀ ಸ್ಟಾಲ್ ಬಗ್ಗೆ ಮಾಹಿತಿ ನೀಡಿದ್ದಾರೆ. ಫರೀದಾಬಾದ್ನ ಗ್ರೀನ್ ಫೀಲ್ಡ್ ಬಳಿ ಅಳವಡಿಸಿರುವುದಾಗಿ ಮತ್ತು ಬೆಳಗ್ಗೆ 5.30ರಿಂದ ರಾತ್ರಿ 9 ಗಂಟೆಯವರೆಗೆ ತೆರೆದಿರುತ್ತದೆ ಎಂದು ವರ್ತಿಕಾ ತಿಳಿಸಿದ್ದಾರೆ.
View this post on Instagram
ಅಂದಹಾಗೆ ವರ್ತಿಕಾ ಅವರು ವಿವಿಧ ರೀತಿಯ ಚಹಾಗಳನ್ನು ಮಾರಾಟ ಮಾಡುತ್ತಾರೆ. ಮಸಾಲಾ ಮತ್ತು ನಿಂಬೆ ಹಣ್ಣಿನ ಚಹಾಗೆ ತಲಾ 20 ರೂಪಾಯಿ ಚಾರ್ಜ್ ಮಾಡಿದ್ದು, ಸಾಮಾನ್ಯ ಚಹಾಗೆ 10 ರೂ. ಶುಲ್ಖ ನಿಗದಿ ಮಾಡಿದ್ದಾರೆ. ಸಣ್ಣ ಸ್ಟೌ ಮೇಲೆ ಅಲ್ಯುಮಿನಿಯಂ ಕ್ಯಾಟಲ್ ಇಡಲಾಗಿದ್ದು, ಸಾಕಷ್ಟು ಜನರು ಟೀ ಸವಿಲು ವರ್ತಿಕಾ ಅವರ ಅಂಗಡಿ ಬಳಿ ಬರುತ್ತಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ವರ್ತಿಕಾ ಅವರ ವಿಡಿಯೋ ವೈರಲ್ ಆಗಿದ್ದು, ಇಲ್ಲಿಯವರೆಗೂ 56 ಸಾವಿರಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿದೆ. ವರ್ತಿಕಾರನ್ನು ಪ್ರಯತ್ನವನ್ನು ಅನೇಕ ನೆಟ್ಟಿಗರು ಮೆಚ್ಚಿಕೊಂಡಿದ್ದಾರೆ. ನಿಮ್ಮ ನಗು ಮತ್ತು ಆತ್ಮ ವಿಶ್ವಾಸ ನನಗೆ ಇಷ್ಟವಾಯಿತು ಎಂದು ನೆಟ್ಟಿಗನೊಬ್ಬ ಹೇಳಿದರೆ, ನಾನು ನಿಮಗೋಸ್ಕರ ಪ್ರಾರ್ಥಿಸುತ್ತೇನೆಂದು ಇನ್ನೊಬ್ಬ ನೆಟ್ಟಿಗ ಹೇಳಿದ್ದಾರೆ.
ಇದೇ ವರ್ಷ ಏಪ್ರಿಲ್ ತಿಂಗಳಲ್ಲಿ ಮತ್ತೊಬ್ಬ ಚಾಯ್ವಾಲಿ ಖ್ಯಾತಿ ಗಳಿಸಿದರು. ಆ ಚಾಯ್ವಾಲಿ ಹೆಸರು ಪ್ರಿಯಾಂಕಾ ಗುಪ್ತ. 2019ರಲ್ಲಿ ಅರ್ಥಶಾಸ್ತ್ರ ವಿಭಾಗದಲ್ಲಿ ಪದವಿ ಮುಗಿಸಿದ್ದಾರೆ. ಮಧ್ಯಪ್ರದೇಶದ ಖ್ಯಾತ ಚಾಯ್ವಾಲಾ ಹಾಗೂ ಎಂಬಿಎ ಪದವೀಧರ ಪ್ರಫುಲ್ ಬಿಲ್ಲೋರ್ ಅವರಿಂದ ಸ್ಪೂರ್ತಿಗೊಂಡಿರುವ ಪ್ರಿಯಾಂಕಾ, ಹಿಂಜರಿಕೆಯನ್ನು ಬಿಟ್ಟು, ಟೀ ಅಂಗಡಿ ಸ್ಥಾಪಿಸಿ ಸ್ವಂತ ಕಾಲ ಮೇಲೆ ನಿಂತಿದ್ದಾರೆ. ಕಳೆದ ಎರಡು ವರ್ಷಗಳಿಂದ ಯಾವುದೇ ಉದ್ಯೋಗ ಸಿಗಲಿಲ್ಲ. ಪ್ರಫುಲ್ಲ್ ಬಿಲ್ಲೋರ್ ಅವರನ್ನು ಸ್ಫೂರ್ತಿಯಾಗಿ ತೆಗೆದುಕೊಂಡೆ ಎಂದು ಹೇಳಿದ್ದಾರೆ. 24 ವರ್ಷದ ಪ್ರಿಯಾಂಕಾ ಕುಲ್ಹದ್ ಚಾಯ್ನಿಂದ ಪಾನ್ ಚಾಯ್ವರೆಗೂ ವಿವಿಧ ರೀತಿಯ ಚಹಾವನ್ನು ಮಾರಾಟ ಮಾಡುತ್ತಾರೆ. ಒಂದು ಕಪ್ ಚಹಾ 15 ರಿಂದ 20 ರೂ. ಶ್ರೇಣಿಯಲ್ಲಿರುತ್ತದೆ.
ಇನ್ನು ಇನ್ನೂ ಪ್ರಫುಲ್ ಬಿಲ್ಲೋರ್ ಬಗ್ಗೆ ಹೇಳುವುದಾದರೆ, ಮಧ್ಯಪ್ರದೇಶದ ಪ್ರಫುಲ್ ಸದ್ಯ ಗುಜರಾತ್ನ ಅಹಮದಾಬಾದ್ನಲ್ಲಿ ನೆಲೆಸಿದ್ದು, ದೇಶಾದ್ಯಂತ ಎಂಬಿಎ ಚಾಯ್ವಾಲಾ ಎಂದೇ ಪ್ರಖ್ಯಾತಿ ಆಗಿದ್ದಾರೆ. ಬರೋಬ್ಬರಿ 3 ಕೋಟಿ ರೂ. ವಹಿವಾಟು ಮೂಲಕ ಎಲ್ಲರ ಹುಬ್ಬೇರಿಸಿದ್ದಾರೆ. ಸಿಎಟಿ ಅಲ್ಲಿ ಉತ್ತಮ ಅಂಕ ಗಳಿಸಲು ಸಾಧ್ಯವಾಗದಿದ್ದಾಗ ಅಧ್ಯಯನವನ್ನು ಅರ್ಧಕ್ಕೆ ಬಿಡಲು ನಿರ್ಧರಿಸುತ್ತಾರೆ. ಕೊನೆಗೆ ಒಂದು ನಿರ್ಧಾರಕ್ಕೆ ಬರುವ ಪ್ರಫುಲ್ ಬೀದಿ ಬದಿಯಲ್ಲಿ ಟೀ ಮಾರಾಟ ಮಾಡಲು ಆರಂಭಿಸುತ್ತಾರೆ. ಇದಕ್ಕೂ ಮುನ್ನ ಅಹಮದಾಬಾದ್ನ ರೆಸ್ಟೋರೆಂಟ್ ಒಂದರಲ್ಲಿ ಪಾರ್ಟ್ ಟೈಮ್ ಕೆಲಸ ಮಾಡುತ್ತಿರುತ್ತಾರೆ. ಇದೇ ವೇಳೆ ಟೀ ಮಾಡುವುದನ್ನು ಚೆನ್ನಾಗಿ ಕಲಿಯುವ ಪ್ರಫುಲ್ ಕೊನೆಗೆ ತನ್ನದೇ ಸ್ವಂತ ಟೀ ಶಾಪ್ ತೆರೆಯುತ್ತಾರೆ. ಆರಂಭದಲ್ಲಿ ವ್ಯಾಪಾರ ಇಲ್ಲದೇ ಸಮಸ್ಯೆ ಎದುರಾದರೂ ನಂತರದ ದಿನಗಳಲ್ಲಿ ವ್ಯವಹಾರ ಚೆನ್ನಾಗಿಯೇ ನಡೆಯಲು ಆರಂಭಿಸುತ್ತದೆ. (ಏಜೆನ್ಸೀಸ್)
ಎರಡು ವರ್ಷ ಅಲೆದ್ರೂ ಸಿಗದ ಕೆಲಸ: ಟೀ ಮಾರಾಟಕ್ಕಿಳಿದ ಅರ್ಥಶಾಸ್ತ್ರ ಪದವೀಧರೆಯ ಮನಕಲಕುವ ಕತೆಯಿದು
ಎಂಬಿಎ ಬಿಟ್ಟು ಟೀ ಮಾರಾಟಕ್ಕಿಳಿದ ಯುವಕನ ಯಶೋಗಾಥೆ ಕೇಳಿದ್ರೆ ಫಿದಾ ಆಗೋದು ಗ್ಯಾರೆಂಟಿ!
ಮದುವೆ ಎಂದರೇನು? ವಿದ್ಯಾರ್ಥಿ ಬರೆದ ಉತ್ತರ ನೋಡಿ ತಬ್ಬಿಬ್ಬಾದ ಶಿಕ್ಷಕ! ವೈರಲ್ ಆಯ್ತು ಉತ್ತರ ಪತ್ರಿಕೆ