ಕಾಬುಲ್: ಅಫ್ಘಾನಿಸ್ತಾನವನ್ನು ತಾಲಿಬಾನ್ ವಶಪಡಿಸಿಕೊಂಡಾಗಿನಿಂದ ಶಾಂತಿ ನೆಲೆಸಿದ್ದ ಆಫ್ಘಾನ್ ನೆಲದ ಚಿತ್ರಣವೇ ಬದಲಾಗಿದ್ದು, ಎಲ್ಲೆಡೆ ಮದ್ದು ಗುಂಡುಗಳ ಸದ್ದಿನೊಂದಿಗೆ ಅಕ್ಷರಶಃ ಕ್ರೌರ್ಯ ತುಂಬಿದ ಭೂಮಿಯಾಗಿ ಆಫ್ಘಾನ್ ಮಾರ್ಪಾಡಾಗಿದೆ. ತಾಲಿಬಾನಿ ಉಗ್ರರು ರಕ್ತಚರಿತ್ರೆ ಸೃಷ್ಟಿಸಿದ್ದು, ಅಲ್ಲಿನ ಜನರು ದಿನನಿತ್ಯ ಭಯದಲ್ಲಿ ದಿನದೂಡುವಂತಾಗಿದೆ. ದೈನಂದಿನ ಚಟುವಟಿಕೆಗಳೇ ಸ್ಥಬ್ಧವಾಗಿದ್ದು, ಆಫ್ಘಾನ್ನಲ್ಲಿ ಅನ್ನ-ನೀರಿಗಾಗಿ ಹಾಹಾಕಾರ ಸೃಷ್ಟಿಯಾಗಿದೆ. ಅಲ್ಲಿನ ಪರಿಸ್ಥಿತಿ ಹೀಗೆ ಮುಂದುವರಿದರೆ ಮುಂದಿನ ದಿನಗಳು ಆಫ್ಘಾನ್ನಲ್ಲಿರುವ ಜನರಿಗೆ ನರಕಕ್ಕಿಂತಲೂ ಕಡೆಯಾಗುವುದರಲ್ಲಿ ಸಂಶಯವೇ ಇಲ್ಲ.
ಆಫ್ಘಾನ್ನಲ್ಲಿ ಅರಾಜಕತೆ ಸೃಷ್ಟಿಯಾಗಿದ್ದು, ದೇಶ ತೊರೆದು ಬೇರೆ ದೇಶಗಳಲ್ಲಿ ನೆಲೆಸಲು ಸಾವಿರಾರು ಜನರು ಕಾಬುಲ್ ಏರ್ಪೋರ್ಟ್ನಲ್ಲಿ ತುಂಬಿಕೊಂಡಿದ್ದಾರೆ. ಸುಮಾರು 10 ಲಕ್ಷ ಮಂದಿ ದೇಶ ತೊರೆಯಲು ಬಯಸಿದ್ದಾರೆ. ಆದರೆ, ಇಲ್ಲಿಯವರೆಗೂ 82,300 ಮಂದಿಯನ್ನು ಮಾತ್ರ ಸ್ಥಳಾಂತರ ಮಾಡಲಾಗಿದೆ. ಅದರಲ್ಲಿ ಅನೇಕ ಮಂದಿ ವಿದೇಶಿಗರೆ ಆಗಿದ್ದಾರೆ.
ತಮ್ಮ ಸರದಿಯು ಬರುತ್ತದೆ ಎಂಬ ನಿರೀಕ್ಷೆಯಲ್ಲಿ ಆಫ್ಘಾನ್ನ ಸಾಮಾನ್ಯ ಜನರು ಕಾಬುಲ್ ಏರ್ಪೋರ್ಟ್ ಹೊರಭಾಗದಲ್ಲಿ ಆಸೆಯ ಕಣ್ಣುಗಳಿಂದ ಕಾದು ಕುಳಿತಿದ್ದಾರೆ. ಈ ಜನರಲ್ಲಿ ಹಲವರು ವಿಮಾನ ನಿಲ್ದಾಣವನ್ನು ಪ್ರವೇಶಿಸಲು ಕೊಳಕು ಚರಂಡಿಯ ಮೂಲಕ ಹಾದುಹೋಗಲು ಪ್ರಯತ್ನಿಸಿದರು. ವಿಮಾನ ನಿಲ್ದಾಣದ ಈ ಭಾಗದಲ್ಲಿ ಯಾವುದೇ ವ್ಯಕ್ತಿಯು 10 ನಿಮಿಷಗಳ ಕಾಲ ನಿಲ್ಲುವುದು ಕಷ್ಟ, ಆದರೆ ಈ ಜನರು ಕಳೆದ ಹಲವು ದಿನಗಳಿಂದ ಕೊಳಕು ಚರಂಡಿಯ ಮುಂದೆಯೇ ನಿಂತಿದ್ದು, ವಿದೇಶಕ್ಕೆ ಹಾರಿ ನೆಮ್ಮದಿಯ ಜೀವನ ನಡೆಸುವ ಇಂಗಿತ ಇಟ್ಟುಕೊಂಡಿದ್ದಾರೆ.
ಇನ್ನು ವಿಮಾನ ನಿಲ್ದಾಣದ ಬಳಿಯಿರುವ ಅನೇಕ ಜನರ ಬಳಿ ಆಹಾರ ಅಥವಾ ನೀರನ್ನು ಕೊಳ್ಳುವಷ್ಟು ಹಣವು ಇಲ್ಲ. ಕಾಬುಲ್ ಹೊರಭಾಗದಲ್ಲಿ ಒಂದು ಬಾಟಲ್ ನೀರಿನ ಬೆಲೆ ದುಬಾರಿ ಆಗಿದೆ. ಎಷ್ಟಿದೆ ಅಂದರೆ ಅದರ ಬೆಲೆ ಕೇಳಿದ್ರೆ ತೆಗೆದುಕೊಳ್ಳುವ ಯೋಚನೆಯನ್ನು ಮಾಡುವುದಿಲ್ಲ. ಒಂದು ಬಾಟಲ್ ನೀರಿನ ಬೆಲೆ 40 ಡಾಲರ್ ಇದೆ. ಅಂದರೆ ಭಾರತೀಯ ಕರೆನ್ಸಿ ಪ್ರಕಾರ ಸುಮಾರು 3000 ರೂಪಾಯಿ. ಇನ್ನು ಊಟ ಅಂತೂ ಕೇಳುವ ಹಾಗೇ ಇಲ್ಲ. ಅಷ್ಟೊಂದು ದುಬಾರಿಯಾಗಿದೆ. ಒಂದು ಪ್ಲೇಟ್ ಊಟಕ್ಕೆ 100 ಡಾಲರ್ ಬೆಲೆ ಇದೆ. ಭಾರತೀಯ ಕರೆನ್ಸಿ ಪ್ರಕಾರ ಬರೋಬ್ಬರಿ 7 ಸಾವಿರ ರೂಪಾಯಿ ಆಗಿದೆ. ಯಾರ ಹತ್ತಿರ ಡಾಲರ್ ಇದೆಯೋ ಅವರು ಮಾತ್ರ ನೀರು ಮತ್ತು ಆಹಾರವನ್ನು ಕೊಳ್ಳುತ್ತಿದ್ದು, ನಿಜಕ್ಕೂ ಪರಿಸ್ಥಿತಿ ಹೇಳತೀರದ್ದಾಗಿದೆ.
ಮಾಧ್ಯಮ ವರದಿಗಳ ಪ್ರಕಾರ 50 ಸಾವಿರಕ್ಕೂ ಹೆಚ್ಚು ಮಂದಿ ಈಗಲೂ ಕಾಬುಲ್ ವಿಮಾನ ನಿಲ್ದಾಣ ಹೊರಭಾಗದಲ್ಲಿ ಕಾದು ಕುಳಿತಿದ್ದಾರೆ. ಇದರಿಂದ ಏರ್ಪೋರ್ಟ್ ತಲುಪುವುದು ಸಪ್ತ ಸಾಗರ ದಾಟುವುದಷ್ಟೇ ಕಷ್ಟಕರವಾಗಿದೆ. ಏಕೆಂದರೆ ಅಷ್ಟೊಂದು ಟ್ರಾಫಿಕ್ ಜಾಮ್ ಸ್ಥಳದಲ್ಲಿ ಉಂಟಾಗಿದೆ. ಇನ್ನು ಸ್ಥಳಾಂತರ ಕೆಲಸ ಹಗಲು-ರಾತ್ರಿಯೆನ್ನದೇ ನಿರಂತರವಾಗಿ ಸಾಗುತ್ತಿದೆ. ಆಫ್ಘಾನ್ನಿಂದ ಮೊದಲು ಕಾಲ್ಕಿಳಬೇಕೆಂದುಕೊಂಡಿರುವ ಮಂದಿ ಏರ್ಪೋರ್ಟ್ ರನ್ವೇ ಮೇಲೆ ತಂಡೋಪತಂಡವಾಗಿ ಸೇರಿಕೊಂಡಿದ್ದಾರೆ. ಈ ಜನರು ಕಾಬುಲ್ ವಿಮಾನ ನಿಲ್ದಾಣದ ಒಳಗಡೆ ಇರುವುದರಿಂದ ಅದೃಷ್ಟಶಾಲಿಗಳು ಎನ್ನಬಹುದಾಗಿದೆ.
ವಿಮಾನ ನಿಲ್ದಾಣದ ಹೊರಗಿನ ಪರಿಸ್ಥಿತಿ ತುಂಬಾ ಬಿಗಡಾಯಿಸಿದೆ. ಏರ್ಪೋರ್ಟ್ ಒಳಗೆ ಹೋಗಲು ಸಾವಿರಾರು ಮಂದಿ ಕಾದು ಕುಳಿತಿದ್ದಾರೆ. ಈ ಬೃಹತ್ ಗುಂಪಿನಲ್ಲಿ, ಕೊರೊನಾವೈರಸ್ ಸೋಂಕಿಗೆ ಯಾರೂ ಹೆದರುವುದಿಲ್ಲ. ಆದರೆ, ಅವರಿಗೆ ತಾಲಿಬಾನ್ ಅಂದ್ರೆ ಮಾತ್ರ ನಿದ್ರೆಯಲ್ಲೂ ಭಯ ಬೀತರಾಗುತ್ತದೆ. ಅಷ್ಟೊಂದು ಕ್ರೂರಿಗಳಾಗಿರುವ ತಾಲಿಬಾನಿಗಳ ಕಪಿಮುಷ್ಠಿಯಿಂದ ತಪ್ಪಿಸಿಕೊಂಡರೆ ಸಾಕು ಎಂಬ ಆಸೆಯಿಂದ ವಿಮಾನ ನಿಲ್ದಾಣದ ಮುಂದೆಯೇ ತಮ್ಮ ಅವಕಾಶಕ್ಕಾಗಿ ಕಾದು ಕುಳಿತಿದ್ದಾರೆ. (ಏಜೆನ್ಸೀಸ್)
ಸುಪ್ರೀಂಕೋರ್ಟ್ ಕೊಲಿಜಿಯಂ ಶಿಫಾರಸು ಮಾಡಿದ 9 ನ್ಯಾಯಮೂರ್ತಿಗಳ ಹೆಸರಿಗೆ ಕೇಂದ್ರದ ಅನುಮೋದನೆ
ಹುಬ್ಬಳ್ಳಿ ಹುಲಿ ವಿಶ್ವನಾಥ ಸಜ್ಜನರ್ ವರ್ಗಾವಣೆ: ಸೈಬರಾಬಾದ್ ಪೊಲೀಸ್ ಆಯುಕ್ತರಾಗಿ ಸ್ಟೆಫೆನ್ ರವೀಂದ್ರ ನೇಮಕ!