ಮುಂಬೈ: ಇಂದಿನ ಆಧುನಿಕ ಯುಗದಲ್ಲಿ ಬಹುತೇಕರ ದಿನ ಆರಂಭವಾಗೋದೇ ಮೊಬೈಲ್ ಮತ್ತು ಟಿವಿಯಿಂದ. ಅದರಲ್ಲೂ ಮೊಬೈಲ್ ಇಲ್ಲದೇ ಹೋದರೆ, ಬಹುತೇಕರ ಜೀವನ ನಡೆಯೋದೇ ಇಲ್ಲ. ಅಷ್ಟರ ಮಟ್ಟಿಗೆ ಮೊಬೈಲ್ ಆವರಿಸಿದೆ. ಸಣ್ಣ ಮಕ್ಕಳಿಂದ ಹಿಡಿದು ವಯಸ್ಸಾದ ಅಜ್ಜ-ಅಜ್ಜಿಯವರೆಗೂ ಮೊಬೈಲ್ ಎಂಬ ಸಾಧನ ಪಕ್ಕದಲ್ಲಿ ಇರಲೇಬೇಕು. ಆದರೆ, ಅದೇ ಮೊಬೈಲ್ ಮತ್ತು ಟಿವಿ ಸಂಬಂಧಗಳ ನಡುವೆ ಅಂತರ ಸೃಷ್ಟಿ ಮಾಡಿರುವುದು ಕೂಡ ಅಷ್ಟೇ ಸತ್ಯ. ಆರೋಗ್ಯಕ್ಕೂ ಕೂಡ ಇವು ತೊಡಕಾಗಿವೆ. ಇದೀಗ ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಮಹಾರಾಷ್ಟ್ರದ ಗ್ರಾಮವೊಂದು ಮಹತ್ವದ ನಿರ್ಧಾರವೊಂದನ್ನು ತೆಗೆದುಕೊಂಡಿದೆ.
ಪ್ರತಿದಿನ ರಾತ್ರಿ 7 ಗಂಟೆಯಿಂದ 8.30ರವರೆಗೆ ಮೊಬೈಲ್ ಫೋನ್ ಹಾಗೂ ಟಿವಿ ಬಳಕೆ ಮಾಡದಂತೆ ಮಹಾರಾಷ್ಟ್ರದ ಸಾಂಗ್ಲಿ ಜಿಲ್ಲೆಯ ಕಡೆಗಾಂವ್ ಮಂಡಲದ ಮೊಹಿತ್ಯಾಂಚೆಯ ವಾಡಗಾಂವ್ ಗ್ರಾಮವು ಆದೇಶ ಹೊರಡಿಸಿದೆ. ಗ್ರಾಮದ ಹಿರಿಯ ಕುಳಿತು, ಚರ್ಚಿಸಿ ಈ ನಿರ್ಧಾರವನ್ನು ತೆಗೆದುಕೊಂಡಿದ್ದಾರೆ. ಗ್ರಾಮದ ನಿರ್ಧಾರಕ್ಕೆ ಸಾಕಷ್ಟು ಮೆಚ್ಚುಗೆ ಸಹ ವ್ಯಕ್ತವಾಗುತ್ತಿದೆ.
ಈ ಗ್ರಾಮದಲ್ಲಿ 3105 ಮಂದಿ ವಾಸಿಸುತ್ತಿದ್ದಾರೆ. ಲಾಕ್ಡೌನ್ ಸಮಯದಲ್ಲಿ ಮಕ್ಕಳ ಆನ್ಲೈನ್ ಕ್ಲಾಸ್ಗೆ ಅನುಕೂಲ ಆಗಲೆಂದು ಪಾಲಕರು ಸ್ಮಾರ್ಟ್ಫೋನ್ ಖರೀದಿಸಿದ್ದರು. ಅಂದಿನಿಂದ ಮಕ್ಕಳು ಮೊಬೈಲ್ಗೆ ದಾಸರಾಗಿದ್ದಾರೆ. ಗಂಟೆಗಟ್ಟಲೇ ಮೊಬೈಲ್ನಲ್ಲೇ ಮುಳುಗಿರುತ್ತಾರೆ. ಶಾಲೆಯಿಂದ ಬರುವ ಮಕ್ಕಳು ರಾತ್ರಿ ಸಮಯದಲ್ಲಿ ಪುಸ್ತಕ ತೆಗೆದುಕೊಂಡು ಓದುವ ಬದಲು ಮೊಬೈಲ್ ಹಿಡಿದು ಸಮಯ ವ್ಯರ್ಥ ಮಾಡುತ್ತಿದ್ದಾರೆ.
ಇನ್ನೊಂದೆಡೆ ಗ್ರಾಮದ ಹೆಂಗಸರು ಟಿವಿ ಧಾರಾವಾಹಿಗಳನ್ನು ನೋಡುತ್ತಾ ಕುಳಿತುಕೊಳ್ಳುತ್ತಾರೆ. ಇದರಿಂದ ಮಕ್ಕಳ ವಿದ್ಯಾಭ್ಯಾಸಕ್ಕೆ ತೊಂದರೆಯಾಗುತ್ತಿರುವುದಲ್ಲದೆ, ಮಕ್ಕಳ ಕಲಿಕೆಯಲ್ಲಿ ಹಿಂದುಳಿದಿದ್ದಾರೆ. ಈ ಹಿನ್ನೆಲೆಯಲ್ಲಿ ಗ್ರಾಮದ ಮುಖ್ಯಸ್ಥ ಈ ಕಠಿಣ ನಿರ್ಧಾರವನ್ನು ತೆಗೆದುಕೊಂಡಿದ್ದಾರೆ. ಗ್ರಾಮದಲ್ಲಿ ಸಂಜೆ 7ರಿಂದ 8.30ರವರೆಗೆ ಯಾರೂ ಟಿವಿ ನೋಡಬಾರದು, ಫೋನ್ ಬಳಸಬಾರದು ಎಂದು ಆದೇಶ ಹೊರಡಿಸಿದ್ದಾರೆ. ಗ್ರಾಮದಲ್ಲಿ ರಾತ್ರಿ ಸೈರನ್ ಮೊಳಗಿದಾಗ ಒಂದೂವರೆ ಗಂಟೆ ಕಾಲ ಟಿವಿ, ಸೆಲ್ ಫೋನ್ ಮ್ಯೂಟ್ ಆಗಲಿವೆ. ಆ ಸಮಯದಲ್ಲಿ ಮಕ್ಕಳು ಪುಸ್ತಕ ಓದುತ್ತಿದ್ದರೆ, ಮಹಿಳೆಯರು ಅಡುಗೆಯತ್ತ ಗಮನ ಹರಿಸಬೇಕು. ಈ ನಿಯಮದ ಮೇಲೆ ಪಂಚಾಯಿತಿ ಸದಸ್ಯರು, ಸರಕಾರಿ ಶಿಕ್ಷಕರು ಹಾಗೂ ಅಂಗನವಾಡಿ ಕಾರ್ಯಕರ್ತೆಯರು ನಿಗಾ ವಹಿಸಿದ್ದಾರೆ. (ಏಜೆನ್ಸೀಸ್)
ರೈಲು ಡಿಕ್ಕಿಯಾಗಿ 335 ಕುರಿಗಳ ಮಾರಣ ಹೋಮ: 34 ಲಕ್ಷ ರೂ. ನಷ್ಟ, ಬದುಕಿನ ಆಧಾರವನ್ನೇ ಕಳೆದುಕೊಂಡ ರೈತರು
ರಾಜ್ಯ ಸರ್ಕಾರ ಮತ್ತು ಬಿಜೆಪಿಗೆ ಧನ್ಯವಾದ ಸಲ್ಲಿಸಿದ ಪ್ರವೀಣ್ ನೆಟ್ಟಾರು ಪತ್ನಿ
ದಿವ್ಯಾ ಶ್ರೀಧರ್ ಮೇಲೆ ಗಂಡನಿಂದ ಹಲ್ಲೆ ಪ್ರಕರಣ: ನಟಿಯ ಬೆನ್ನಿಗೆ ನಿಂತ ಕರ್ನಾಟಕ ಮಹಿಳಾ ಆಯೋಗ