ಚಂಡೀಗಢ : ಪಂಜಾಬ್ನ ಕಾಂಗ್ರೆಸ್ ಸರ್ಕಾರ ಕೋವಾಕ್ಸಿನ್ ಲಸಿಕೆಯ ಸುಮಾರು 35,000 ಡೋಸ್ಗಳನ್ನು 400 ರೂ. ಬೆಲೆಗೆ ಖರೀದಿಸಿ 1,060 ರೂ. ಬೆಲೆಯಲ್ಲಿ ಖಾಸಗಿ ಆಸ್ಪತ್ರೆಗಳಿಗೆ ಮರುಮಾರಾಟ ಮಾಡಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಅಕಾಲಿ ದಳದ ಮುಖ್ಯಸ್ಥ ಸುಖಬೀರ್ ಸಿಂಗ್ ಬಾದಲ್ ಈ ಆರೋಪ ಹೊರಿಸಿದ್ದು, ಭಾರೀ ಹಣ ಮಾಡುವ ಅನೈತಿಕ ಪ್ರಯತ್ನದೊಂದಿಗೆ ಕರೊನಾ ಲಸಿಕೆಯ ಕೃತಕ ಅಭಾವವನ್ನು ಪಂಜಾಬ್ ಸರ್ಕಾರ ಸೃಷ್ಟಿಸುತ್ತಿದೆ ಎಂದಿದ್ದಾರೆ.
ಕರೊನಾ ಸಿಎಂ ಕ್ಯಾಪ್ಟನ್ ಅಮರಿಂದರ್ ಸಿಂಗ್ ನೇತೃತ್ವದ ಸರ್ಕಾರದ ವಿರುದ್ಧ ಸರಣಿ ಟ್ವೀಟ್ಗಳ ಮೂಲಕ ಹರಿಹಾಯ್ದಿರುವ ಬಾದಲ್, ಈ ಆಪತ್ಕಾಲದಲ್ಲಿ ಕರೊನಾ ಲಸಿಕೆಗಳನ್ನು ಮಾರಿ ಕಾಂಗ್ರೆಸ್ ಸರ್ಕಾರ ಅನೈತಿಕವಾಗಿ ಲಾಭ ಮಾಡುತ್ತಿದೆ. ಈ ಜನವಿರೋಧಿ ನಡವಳಿಕೆಯ ಬಗ್ಗೆ ಹೈಕೋರ್ಟ್ ಮೇಲ್ವಿಚಾರಣೆಯಲ್ಲಿ ತನಿಖೆಯಾಗಬೇಕು. ರಾಜ್ಯ ಆರೋಗ್ಯ ಸಚಿವ ಬಲ್ಬೀರ್ ಸಿಂಗ್ ಸಿಧು ಮೇಲೆ ಮೊಕದ್ದಮೆ ಹೂಡಬೇಕು ಎಂದು ಬೇಡಿಕೆ ಇಟ್ಟಿದ್ದಾರೆ.
ಇದನ್ನೂ ಓದಿ: ಪ್ರಧಾನಿ ಮೋದಿಗೆ ಜೀವಬೆದರಿಕೆ ಹಾಕಿದ್ದೇಕೆ ಎಂದು ಬಾಯ್ಬಿಟ್ಟ ಡ್ರಗ್ ಎಡಿಕ್ಟ್: ಪೊಲೀಸರು ಸುಸ್ತು!
ಕೋವಾಕ್ಸಿನ್ ಡೋಸ್ಗಳನ್ನು ರಾಜ್ಯ ಸರ್ಕಾರದ ದರದಂತೆ ಡೋಸ್ಗೆ 400 ರೂ.ಗಳಿಗೆ ಖರೀದಿಸಿ, ಅದನ್ನು ಖಾಸಗಿ ಆಸ್ಪತ್ರೆಗಳಿಗೆ 1,060 ರೂ.ಗಳಿಗೆ ಮಾರುತ್ತಿದೆ. ಹೀಗೆ ಪಡೆದ ಲಸಿಕೆಗಳಿಗೆ ಖಾಸಗಿ ಆಸ್ಪತ್ರೆಗಳು ಪ್ರತಿ ಡೋಸ್ಗೆ 1,560 ರೂ. ಪಡೆಯುತ್ತಿದ್ದು, ಜನಸಾಮಾನ್ಯರನ್ನು ಲೂಟಿ ಮಾಡಲಾಗುತ್ತಿದೆ. ಪ್ರತಿ ಡೋಸ್ಗೆ ಸರ್ಕಾರ 660 ರೂ.ಗಳ ಲಾಭ ಪಡೆಯುತ್ತಿದ್ದು, ಈ ರೀತಿಯಾಗಿ ಮೊಹಾಲಿಯಲ್ಲಿ 35,000 ಡೋಸ್ಗಳನ್ನು ಮಾರಿ, ಸರ್ಕಾರ ಒಂದೇ ದಿನಕ್ಕೆ 2 ಕೋಟಿ ಲಾಭ ಮಾಡಿಕೊಂಡಿದೆ ಎಂದಿದ್ದಾರೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಆರೋಗ್ಯ ಸಚಿವ ಬಿ.ಎಸ್.ಸಿಧು ಅವರಿಗೆ ಲಸಿಕೆಗಳ ಮೇಲೆ ಯಾವುದೇ ನಿಯಂತ್ರಣವಿಲ್ಲ ಎಂದಿದ್ದು, ಆರೋಪದ ಬಗ್ಗೆ ತನಿಖೆಯಾಗಲಿದೆ ಎಂದಿದ್ದಾರೆ. “ನನಗೆ ಲಸಿಕೆಗಳ ಮೇಲೆ ಯಾವುದೇ ಹಿಡಿತವಿಲ್ಲ. ನಾನು ಕರೊನಾ ಚಿಕಿತ್ಸೆ, ಟೆಸ್ಟಿಂಗ್, ಸ್ಯಾಂಪ್ಲಿಂಗ್ ಮತ್ತು ಲಸಿಕಾ ಶಿಬಿರಗಳನ್ನು ಮಾತ್ರ ನೋಡಿಕೊಳ್ಳುತ್ತೇನೆ. ನಾವು ಖಂಡಿತವಾಗಿ ತನಿಖೆ ಮಾಡಿಸುತ್ತೇವೆ” ಎಂದು ಸಿಧು ಹೇಳಿದ್ದಾಗಿ ಎಎನ್ಐ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಇದನ್ನೂ ಓದಿ: ಜಿರಳೆಯನ್ನು ಪಶು ಆಸ್ಪತ್ರೆಗೆ ಕರೆದುತಂದ ಮಹಾನುಭಾವ!
ಬಿಜೆಪಿ ಕೂಡ ಪಂಜಾಬ್ ಸರ್ಕಾರದ ವಿರುದ್ಧ ಕಟುಟೀಕೆ ಆರಂಭಿಸಿದ್ದು, ಕೇಂದ್ರ ಸಚಿವ ಪ್ರಕಾಶ್ ಜಾವಡೇಕರ್ ಅವರು, “ರಾಹುಲ್ ಗಾಂಧಿ ಮೊದಲು ತಮ್ಮ ರಾಜ್ಯದ ಬಗ್ಗೆ ಗಮನ ಹರಿಸಿ ನಂತರ ಬೇರೆಯವರಿಗೆ ಭಾಷಣ ನೀಡಬೇಕು. ಪಂಜಾಬ್ಗೆ 1.40 ಲಕ್ಷ ಡೋಸ್ ಕೋವಾಕ್ಸಿನ್ಅನ್ನು ಒದಗಿಸಲಾಗಿದೆ. ಅದನ್ನು ಅವರು 1000 ರೂ. ಬೆಲೆಯಲ್ಲಿ 20 ಖಾಸಗಿ ಆಸ್ಪತ್ರೆಗಳಿಗೆ ನೀಡಿಬಿಟ್ಟಿದ್ದಾರೆ” ಎಂದು ಟ್ವೀಟ್ ಮಾಡಿದ್ದಾರೆ. (ಏಜೆನ್ಸೀಸ್)
ವುಹಾನ್ ಲ್ಯಾಬಿಂದ ವೈರಸ್ ಲೀಕಾಗಿತ್ತೆಂದು ನಾನು ಸರಿಯಾಗೇ ಹೇಳಿದ್ದೆ : ಟ್ರಂಪ್