ಬೆಂಗಳೂರು: ‘ಸಲಗ’ ಚಿತ್ರದ ‘ಮಳೆಯೇ ಮಳೆಯೇ …’ ಲಿರಿಕಲ್ ವಿಡಿಯೋವನ್ನು ‘ಪವರ್ ಸ್ಟಾರ್’ ಪುನೀತ್ ರಾಜಕುಮಾರ್ ಅವರು ಶನಿವಾರ (ಸೆಪ್ಟೆಂಬರ್ 5) ಬೆಳಿಗ್ಗೆ 11 ಗಂಟೆಗೆ A2 ಮ್ಯೂಸಿಕ್ ಯೂಟ್ಯೂಬ್ ಚಾನೆಲ್ನಲ್ಲಿ ಬಿಡುಗಡೆ ಮಾಡುತ್ತಾರೆ ಎಂದು ಹೇಳಲಾಗಿತ್ತು. ಆದರೆ, ಒಂದು ದಿನದ ಮುಂಚೆಯೇ ಹಾಡನ್ನು ಬಿಡುಗಡೆ ಮಾಡಿದ್ದಾರೆ ಪುನೀತ್.
ಇದನ್ನೂ ಓದಿ: ‘ರಾಬರ್ಟ್’ ಸುಂದರಿಯ ಫಸ್ಟ್ ಲುಕ್ ಕಣ್ತುಂಬಿಕೊಳ್ಳಲು ನಿಗದಿಯಾಯ್ತು ದಿನಾಂಕ
ಶುಕ್ರವಾರ ಬೆಳಿಗ್ಗೆ ‘ಸಲಗ’ ಚಿತ್ರದ ನಿರ್ದೇಶಕ-ನಾಯಕ ದುನಿಯಾ ವಿಜಯ್, ನಿರ್ಮಾಪಕ ಕೆ.ಪಿ ಶ್ರೀಕಾಂತ್ , ಸಂಗೀತ ನಿರ್ದೇಶಕ ಚರಣ್ ರಾಜ್, ನಾಯಕಿ ಸಂಜನಾ ಆನಂದ್ ಸೇರಿದಂತೆ ಚಿತ್ರತಂಡದ ಕೆಲವು ಸದಸ್ಯರು ಪುನೀತ್ ರಾಜಕುಮಾರ್ ಅವರ ಆಫೀಸಿಗೆ ಹೋಗಿ, ಅವರ ಕೈಯಿಂದ ‘ಮಳೆಯೇ ಮಳೆಯೇ …’ ಹಾಡನ್ನು ಬಿಡುಗಡೆ ಮಾಡಿಸಿದ್ದಾರೆ. ಹಾಡು ಕೇಳಿರುವ ಪುನೀತ್, ಮೆಚ್ಚುಗೆ ವ್ಯಕ್ತಪಡಿಸುವುದರ ಜತೆಗೆ ಚಿತ್ರತಂಡಕ್ಕೆ ಶುಭ ಹಾರೈಸಿದ್ದಾರೆ.
‘ಸಲಗ’ ಚಿತ್ರದ ಚಿತ್ರೀಕರಣ ಲಾಕ್ಡೌನ್ಗೂ ಮುಂಚೆಯೇ ಮುಗಿದಿತ್ತು. ಚಿತ್ರವನ್ನು ಪೂರ್ತಿ ಎಡಿಟ್ ಮೇಲೆ, ಒಂದು ಹಾಡು ಬೇಕು ಎಂದು ಚಿತ್ರತಂಡಕ್ಕೆ ಅನಿಸಿದ್ದರರಿಂದ ಸಂಗೀತ ನಿರ್ದೇಶಕ ಚರಣ್ರಾಜ್ ಅವರಿಂದ ಒಂದು ರೊಮ್ಯಾಂಟಿಕ್ ಹಾಡನ್ನು ಕಂಪೋಸ್ ಮಾಡಿಸಲಾಗಿತ್ತು.
‘ಮಳೆಯೇ ಮಳೆಯೇ ಅಂಬೆಗಾಲಿಡುತ್ತಾ ಸುರಿಯೇ…’ ಎಂದು ಸಾಗುವ ಈ ಹಾಡನ್ನು ಮಲೆನಾಡಿನ ಸುಂದರ ಪರಿಸರದಲ್ಲಿ, ಮಳೆಯ ನಡುವೆಯೇ ಚಿತ್ರೀಕರಿಸಲಾಗಿದೆ. ಸಕಲೇಶಪುರ, ಚಿಕ್ಕಮಗಳೂರು ಮುಂತಾದ ಕಡೆಗಳಲ್ಲಿ ಚಿತ್ರೀಕರಣವಾಗಿರುವ ಈ ಹಾಡು ಅಧಿಕೃತವಾಗಿ ಬಿಡುಗಡೆಯಾಗಿದೆ.
ಇದನ್ನೂ ಓದಿ: ಕೆಬಿಸಿ ತಂಡದ ಸದಸ್ಯರಿಗೆ ಕರೊನಾ; ಆತಂಕದಲ್ಲಿ ಬಿಗ್ ಬಿ ಅಮಿತಾಬ್
‘ಸಲಗ’ ಚಿತ್ರದಲ್ಲಿ ವಿಜಯ್ ಮತ್ತು ಸಂಜನಾ ಜತೆಗೆ ಧನಂಜಯ್ ಸಹ ಒಂದು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರಕ್ಕೆ ಶಿವಸೇನಾ ಛಾಯಾಗ್ರಹಣ ಮಾಡಿದ್ದು, ಚರಣ್ರಾಜ್ ಸಂಗೀತ ಸಂಯೋಜನೆ ಮಾಡಿದ್ದಾರೆ.