ನವದೆಹಲಿ: ಪಾಕಿಸ್ತಾನದ ಲಾಹೋರ್ನಿಂದ ಕರಾಚಿಗೆ ಬರುತ್ತಿದ್ದ ಪಾಕಿಸ್ತಾನ್ ಇಂಟರ್ನ್ಯಾಷನಲ್ ಏರ್ಲೈನ್ಸ್ ವಿಮಾನ ದುರಂತಕ್ಕೆ ಪೈಲಟ್ನನ್ನೇ ಹೊಣೆಯಾಗಿಸಲಾಗುತ್ತಿದೆ.
ಕರಾಚಿಯ ಜಿನ್ನಾ ಅಂತಾರಾಷ್ಟ್ರಿಯ ವಿಮಾನ ನಿಲ್ದಾಣದಲ್ಲಿ ವಿಮಾನ ಇಳಿಸುವುದು ಸಾಧ್ಯವಾಗದಿದ್ದಾಗ, ಮತ್ತೊಮ್ಮೆ ಸುತ್ತು ಹಾಕಲು ಪೈಲಟ್ ತಾನೇ ನಿರ್ಧಾರ ಕೈಗೊಂಡಿದ್ದ ಎನ್ನಲಾಗಿದೆ. ಈ ವೇಳೆ ನಿಗದಿತ ಎತ್ತರಕ್ಕೆ ತಲುಪಲು ಸಾಧ್ಯವಾಗದೇ ವಿಮಾನ ಪತನಗೊಂಡಿದೆ ಎಂದು ಪಾಕಿಸ್ತಾನದ ನಾಗರಿಕ ವಿಮಾನ ಯಾನ ಪ್ರಾಧಿಕಾರ ಆರಂಭಿಕ ವರದಿಯಲ್ಲಿ ತಿಳಿಸಿದೆ. ದುರಂತಕ್ಕೆ ತಾಂತ್ರಿಕ ವೈಫಲ್ಯ ಕಾರಣವಾಗಿದೆಯೋ ಅಥವಾ ಇದು ಪೈಲಟ್ನಿಂದಾದ ತಪ್ಪೋ ಎಂಬ ಬಗ್ಗೆ ಉನ್ನತ ಮಟ್ಟದ ಸಮಿತಿ ತನಿಖೆ ಮುಂದುವರಿಸಿದೆ.
ಇದನ್ನೂ ಓದಿ; ಸೊಕ್ಕಿನ ಬೆಕ್ಕಲ್ಲ…, ಗ್ರೀಕ್ ದೇವತೆಯ ಅಪರಾವತಾರವಂತೆ…!
ಏರ್ಬಸ್ ಎ-320 ಮಾದರಿಯ ಪಿಕೆ 8303 ವಿಮಾನ ಕರಾಚಿಯಲ್ಲಿ ಇಳಿಯುವಾಗ ಮೂರು ಬಾರಿ ವಿಮಾನದ ಇಂಜಿನ್ ಘರ್ಷಣೆಗೆ ಒಳಗಾಗಿದೆ. ಈ ವೇಳೆ ಇಂಜಿನ್ ಆಯಿಲ್ ಟ್ಯಾಂಕ್ ಹಾಗೂ ಇಂಧನ ಪಂಪ್ಗೆ ಹಾನಿಯಾಗಿ ಸೋರಿಕೆ ಉಂಟಾಗಿರಬಹುದು. ಇದರಿಂದಾಗಿ ವಿಮಾನವನ್ನು ಮತ್ತೆ ನಿಗದಿತ ಎತ್ತರಕ್ಕೆ ಕೊಂಡೊಯ್ಯುವುದು ಸಾಧ್ಯವಾಗಿರಲಿಕ್ಕಿಲ್ಲ. ಹೀಗಾಗಿ ದುರಂತ ಸಂಭವಿಸಿದೆ ಎಂದು ಅಂದಾಜಿಸಲಾಗಿದೆ.
ಇದನ್ನೂ ಓದಿ; ಪ್ರಯಾಣಕ್ಕೆ ‘ಆರೋಗ್ಯ ಸೇತು’ ವೇ ಹೊಸ ಪಾಸ್ಪೋರ್ಟ್
ಅಲ್ಲದೇ, ವಿಮಾನವನ್ನು ಇಳಿಸಲು ಸಾಧ್ಯವಾಗದಿರುವ ಬಗ್ಗೆ ಪೈಲಟ್ ಆರಂಭದಲ್ಲಿಯೇ ಕಂಟ್ರೋಲ್ ರೂಮ್ಗೆ ತಿಳಿಸಿರಲಿಲ್ಲ ಎನ್ನಲಾಗಿದೆ. ಮತ್ತೊಮ್ಮೆ ವಿಮಾನ ಮೇಲೆರಲು ಯತ್ನಿಸುತ್ತಿದ್ದಾಗ ವಿಮಾನದ ಲ್ಯಾಂಡಿಂಗ್ ಗಿಯರ್ನಲ್ಲಿ ದೋಷ ಕಂಡುಬಂದಿದೆ ಎಂದು ಪೈಲಟ್ ಹೇಳಿದ್ದಾನೆ. ಆಗ ಆತನಿಗೆ 3,000 ಅಡಿ ಎತ್ತರಕ್ಕೆ ವಿಮಾನ ಕೊಂಡೊಯ್ಯಲು ತಿಳಿಸಲಾಗಿತ್ತು. ಆದರೆ, ವಿಮಾನವನ್ನು ಅಷ್ಟು ಎತ್ತರಕ್ಕೆ ಕೊಂಡೊಯ್ಯಲು ಸಾಧ್ಯವಾಗದೇ ದುರಂತ ಸಂಭವಿಸಿದೆ ಎಂದು ವಿಶ್ಲೇಷಿಸಲಾಗಿದೆ.
ಲಾಹೋರ್ನಿಂದ ಕರಾಚಿಗೆ ಬರುತ್ತಿದ್ದ ವಿಮಾನ ಕಡೇ ಕ್ಷಣದಲ್ಲಿ ನೆಲಕ್ಕೆ ಅಪ್ಪಳಿಸಿತ್ತು. ಘಟನೆಯಲ್ಲಿ 97 ಮಂದಿ ಮೃತಪಟ್ಟಿದ್ದರು.