ಮುಂಬೈ: ಪ್ರಭಾಸ್ ಅಭಿನಯದ ಚಿತ್ರಗಳೆಂದರೆ, ಅದರ ಬಜೆಟ್ ಮಿನಿಮಮ್ 200 ಕೋಟಿ ದಾಟಬೇಕು ಎಂಬ ಅಲಿಖಿತ ನಿಯಮವೊಂದು ಚಿತ್ರರಂಗದ ವಲಯದಲ್ಲಿ ಶುರುವಾಗಿರುವ ಹಾಗೆ ಕಾಣುತ್ತಿದೆ. ಏಕೆಂದರೆ, ‘ಬಾಹುಬಲಿ’ ನಂತರ ಪ್ರಭಾಸ್ ಅಭಿನಯದ ಯಾವುದೇ ಚಿತ್ರ ತೆಗೆದುಕೊಳ್ಳಿ. ಅದರ ಬಜೆಟ್ 200 ಕೋಟಿ ದಾಟುತ್ತಿದೆ. ಈಗ ಆ ಸಾಲಿಗೆ ಇನ್ನೊಂದು ಹೊಸ ಚಿತ್ರ ಸೇರಿದೆ.
ಇದನ್ನೂ ಓದಿ: ಹಿರಿಯ ಪೋಷಕ ನಟಿ ಬಿ.ಜಯಾ ಇನ್ನಿಲ್ಲ! ಕಣ್ಣೀರ ಕಡಲಲ್ಲಿ ಚಿತ್ರರಂಗ
ಈಗಾಗಲೇ ಪ್ರಭಾಸ್, ‘ರಾಧೇ ಶ್ಯಾಮ್’, ‘ಸಲಾರ್’ ಮತ್ತು ‘ಆದಿಪುರುಷ್’ ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ಈ ಎಲ್ಲ ಚಿತ್ರಗಳ ಚಿತ್ರೀಕರಣ ಪ್ರಾರಂಭವಾಗಿದ್ದು, ಯಾವುದೂ ಮುಕ್ತಾಯವಾಗಿಲ್ಲ. ಇದೆಲ್ಲದರ ಜತೆಗೆ, ಅಮಿತಾಭ್ ಬಚ್ಚನ್ ಮತ್ತು ದೀಪಿಕಾ ಪಡುಕೋಣೆ ಜತೆಗೆ ಒಂದು ಸೈನ್ಸ್ ಫಿಕ್ಷನ್ ಚಿತ್ರದಲ್ಲಿ ನಟಿಸುವುದಕ್ಕೆ ಪ್ರಭಾಸ್ ಒಪ್ಪಿಕೊಂಡಿದ್ದು, ಆ ಚಿತ್ರದ ಚಿತ್ರೀಕರಣ ಮುಂದಿನ ವರ್ಷಕ್ಕೆ ಹೋಗಿದೆ.
ಈ ಮಧ್ಯೆ, ಅವರು ಇನ್ನೊಂದು ಹೊಸ ಚಿತ್ರವನ್ನು ಒಪ್ಪಿಕೊಂಡಿರುವ ಸುದ್ದಿ ಇದೆ. ಈ ಆಕ್ಷನ್ ಚಿತ್ರವನ್ನು ‘ವಾರ್’ ಮತ್ತು ‘ಪಠಾಣ್’ ಖ್ಯಾತಿಯ ಸಿದ್ಧಾರ್ಥ್ ಆನಂದ್ ನಿರ್ದೇಶನ ಮಾಡಿದ್ದು, ಈ ಚಿತ್ರದ ಬಜೆಟ್ ಸಹ 250 ಕೋಟಿ ಎಂದು ಹೇಳಲಾಗುತ್ತಿದೆ. ಸದ್ಯ ಪ್ರಭಾಸ್ ಮತ್ತು ಸಿದ್ಧಾರ್ಥ್ ಇಬ್ಬರೂ ಬೇರೆಬೇರೆ ಚಿತ್ರಗಳಲ್ಲಿ ತೊಡಗಿಸಿಕೊಂಡಿದ್ದರಿಂದ, ಅವೆಲ್ಲ ಮುಗಿಸಿಯೇ ಈ ಚಿತ್ರಕ್ಕೆ ಕೈಹಾಕುತ್ತಾರಂತೆ. ಅಂದರೆ, ಈ ಚಿತ್ರ ಪ್ರಾರಂಭವಾಗುವದೇನಿದ್ದರೂ 2023 ಆದರೆ ಆಶ್ಚರ್ಯವಿಲ್ಲ.
ಇದನ್ನೂ ಓದಿ: ‘ಡಾರ್ಲಿಂಗ್’ ಕೃಷ್ಣ ಹುಟ್ಟುಹಬ್ಬಕ್ಕೆ ‘ಶುಗರ್ ಫ್ಯಾಕ್ಟರಿ’ಯಿಂದ ಈ ಉಡುಗೊರೆ
ಅಂದಹಾಗೆ, ಈ ಚಿತ್ರದಲ್ಲಿ ಪ್ರಭಾಸ್ ಮೊದಲ ಬಾರಿಗೆ ರಾ ಏಜೆಂಟ್ ಪಾತ್ರವನ್ನು ನಿರ್ವಹಿಸುತ್ತಿದ್ದು, ಅವರ ಕೆರಿಯರ್ನಲ್ಲೇ ಇದೊಂದು ವಿಭಿನ್ನ ಚಿತ್ರವಾಗಲಿದೆ ಎಂದು ಹೇಳಲಾಗುತ್ತಿದೆ. ಸ್ಪೈ ಚಿತ್ರಗಳನ್ನು ನಿರ್ದೇಶಿಸುವುದರಲ್ಲಿ ಸಿದ್ಧಾರ್ಥ್ ದೊಡ್ಡ ಹೆಸರು ಮಾಡಿದ್ದು, ಈ ಚಿತ್ರವನ್ನು ಸಹ ದೇಶ-ವಿದೇಶಗಳ ಅದ್ಭುತ ಲೊಕೇಶನ್ಗಳಲ್ಲಿ ಸೆರೆಹಿಡಿಯಲಾಗುತ್ತದಂತೆ.