ಕರೊನಾ ಲಾಕ್ಡೌನ್ ಹಿನ್ನೆಲೆಯಲ್ಲಿ ಸಿನಿಮಾ ಕೆಲಸಗಳು ಸಂಪೂರ್ಣ ಸ್ಥಗಿತಗೊಂಡಿವೆ. ಈಗಾಗಲೇ ಸಿದ್ಧವಾಗಿರುವ ಸಿನಿಮಾಗಳು ಓಟಿಟಿ ವೇದಿಕೆಯಲ್ಲಿ ಬಿಡುಗಡೆಗೆ ತಯಾರಿ ನಡೆಸಿವೆ. ಹೀಗಿರುವಾಗಲೇ ಇದೀಗ ನಿರ್ಮಾಪಕರ ಸಂಘ ಎ ಲಿಸ್ಟ್ನಲ್ಲಿರುವ ಕಲಾವಿದರಿಗೆ ಮುಂದಿನ ದಿನಗಳಲ್ಲಿ ಸಂಭಾವನೆ ಕಡಿಮೆ ಮಾಡಿಕೊಳ್ಳಲು ಮನವಿ ಮಾಡಿದೆ.
ಇದನ್ನೂ ಓದಿ: ಇನ್ನಷ್ಟು ಕೋಟಿ ಬಾಚಿಕೊಂಡ ಪ್ರಿಯಾಂಕಾ … ಅಮೇಜಾನ್ ಜತೆಗೆ ಹೊಸ ಡೀಲ್
‘ಸದ್ಯ ನಾವೆಲ್ಲ ಮೊದಲಿನಂತಿಲ್ಲ. ಈಗಿನ ಜಗತ್ತೇ ಬೇರೆಯದಾಗಿದೆ. ಹಣಕಾಸಿನ ವ್ಯವಹಾರಗಳು ತಲೆಕೆಳಗಾಗಿವೆ. ಹಾಗಾಗಿ ಎ ಲಿಸ್ಟ್ ಸಿನಿಮಾ ಕಲಾವಿದರು, ಸಂಭಾವನೆಯನ್ನು ಕಡಿಮೆ ಮಾಡಿಕೊಳ್ಳಬೇಕು. ಈ ಹಿಂದೆ ನೀಡುತ್ತಿದ್ದ ಸಂಭಾವನೆಯನ್ನು ಈಗ ನೀಡಲು ಆಗುವುದಿಲ್ಲ. ಹಾಗಾಗಿ ಸಂಭಾವನೆಯಲ್ಲಿ ಕಡಿತ ಮಾಡಿಕೊಳ್ಳಲೇಬೇಕು‘ ಎಂದು ಮನವಿ ಮಾಡಿದೆ.
ನಿರ್ಮಾಪಕರ ಈ ಮನವಿಗೆ ಈಗಾಗಲೇ ಬಿಟೌನ್ನ ಒಂದಷ್ಟು ಸ್ಟಾರ್ ಕಲಾವಿದರು ಈ ಕಾರ್ಯಕ್ಕೆ ಕೈ ಜೋಡಿಸಿದ್ದಾರೆ. ನಿರ್ಮಾಪಕರ ಉಳಿವಿಗಾಗಿ ಕೈ ಜೋಡಿಸಿದ್ದು, ಸಂಭಾವನೆ ಕಡಿತ ಮಾಡಿಕೊಳ್ಳಲು ನಿರ್ಧರಿಸಿದ್ದಾರೆ. ಇನ್ನು ಕೆಲವರು, ನಿರ್ಮಾಣದಲ್ಲಿ ಸಾಥ್ ನೀಡಿ, ಬಂದ ಆದಾಯದಲ್ಲಿ ಸರಿಸಮ ಮಾಡಿಕೊಳ್ಳುವುದಾಗಿ ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ‘777 ಚಾರ್ಲಿ’ ಬಳಗ ಸೇರಿದ ದಾನಿಶ್ ಸೇಠ್
ಒಟ್ಟಿನಲ್ಲಿ ಲಾಕ್ಡೌನ್ ಹಿನ್ನೆಲೆಯಲ್ಲಿ ಸಿನಿಮಾಕ್ಷೇತ್ರ ಅಕ್ಷರಶಃ ನೆಲಕಚ್ಚಿದೆ. ಶೂಟಿಂಗ್ ಶುರುವಾದರೂ, ಚಿತ್ರಮಂದಿರದಲ್ಲಿ ಸಿನಿಮಾ ಯಾವಾಗ ಬಿಡುಗಡೆ ಎಂಬುದು ಯಾರಿಗೂ ಗೊತ್ತಿಲ್ಲ. ಒಂದು ವೇಳೆ ಬಿಡುಗಡೆಗೆ ಅನುಮತಿ ನೀಡಿದರೂ, ಜನರನ್ನು ಚಿತ್ರಮಂದಿರಕ್ಕೆ ಕರೆತರುವುದಾದರೂ ಹೇಗೆ ಎಂದು ತಲೆಕೆಡಿಸಿಕೊಂಡು ಕುಳಿತಿದ್ದಾರೆ ಸಿನಿಮಾದವರು. (ಏಜೆನ್ಸೀಸ್)