ಲಂಡನ್: ಸಾಮಾನ್ಯವಾಗಿ ಪೊಲೀಸರದು ಬಾಗಿಲು ಮುಚ್ಚಿಸುವ ಕೆಲಸ. ಸಮಯ ಮೀರಿ ತೆರೆದಿದ್ದರೆ ಬಂದು ಬಾಗಿಲು ಮುಚ್ಚಿಸುತ್ತಾರೆ ಅಥವಾ ಯಾರಾದರೂ ಕಳ್ಳಕಾಕರು ಬಾಗಿಲು ಮುರಿದಿದ್ದರೆ ಬಂದು ತನಿಖೆ ನಡೆಸುತ್ತಾರೆ. ಆದರೆ ಇಲ್ಲಿ ಸ್ವತಃ ಪೊಲೀಸರೇ ಬಾಗಿಲು ಮುರಿಯಲೆತ್ನಿಸಿದ್ದಾರೆ.
ಹೌದು… ಜಿಮ್ ಸೆಂಟರ್ ಒಂದರ ಬಾಗಿಲು ಬಡಿದು ಬಡಿದು ಸಾಕಾದ ಪೊಲೀಸರು ಕೊನೆಗೆ ಬಾಗಿಲು ಮುರಿಯಲು ಯತ್ನಿಸಿದ್ದಾರೆ. ಪೊಲೀಸರ ಈ ನಡೆಯನ್ನು ಗಂಭೀರವಾಗಿ ತೆಗೆದುಕೊಂಡಿರುವ ಜಿಮ್ ಮಾಲೀಕ, ಇದೀಗ ಪೊಲೀಸರ ವಿರುದ್ಧವೇ ಕ್ರಮ ಜರುಗುವಂತೆ ಮಾಡಲು ನ್ಯಾಯಾಲಯದ ಮೆಟ್ಟಿಲೇರುವುದಾಗಿ ತೊಡೆತಟ್ಟಿದ್ದಾನೆ.
ಇಷ್ಟೆಲ್ಲ ನಡೆದದ್ದು ಲಂಡನ್ನಲ್ಲಿ.. ಇಲ್ಲಿನ ಹ್ಯಾಂಪ್ಸ್ಟೆಡ್ನಲ್ಲಿ ಜೇಮ್ಸ್ ಕೂಪರ್ ಎಂಬಾತ ಜಿಮ್ ಹೊಂದಿದ್ದಾನೆ. ಆದರೆ ಲಾಕ್ಡೌನ್ ಅವಧಿಯಲ್ಲೂ ಅದನ್ನು ಆತ ಬಳಸುತ್ತಿದ್ದಾನೆ ಎಂಬ ಗುಮಾನಿ ಮೇರೆಗೆ ಜಿಮ್ನತ್ತ ಬಂದಿದ್ದ ಏಳು ಪೊಲೀಸರು ತುಂಬ ಹೊತ್ತು ಬಾಗಿಲು ಬಡಿದಿದ್ದಾರೆ. ಕೊನೆಗೆ ಪೊಲೀಸರಲ್ಲಿ ಒಬ್ಬ ಗೋಡೆ ಮೇಲಿದ್ದ ಕೀ-ಬಾಕ್ಸ್ ಒಡೆದು ಬಾಗಿಲು ಮುರಿಯುವ ಪ್ರಯತ್ನ ಮಾಡಿದ್ದಾನೆ.
ಈ ಬಗ್ಗೆ ತನ್ನ ಸೆಕ್ಯುರಿಟಿ ಸಿಸ್ಟಮ್ ಮೂಲಕ ತಿಳಿದು ಸಿಟ್ಟಾಗಿರುವ ಜೇಮ್ಸ್ ಕೂಪರ್, ವಾರಂಟ್ ಇಲ್ಲದೆ ಹೀಗೆ ಒಳಗೆ ನುಗ್ಗಲು ಯತ್ನಿಸಿರುವುದು ಕಾನೂನುಬಾಹಿರ. ಜಿಮ್ ಬಾಗಿಲು ಬಡಿಯುತ್ತಲೇ ಇರುವ ಬದಲು ಅದಕ್ಕೂ ಮುಖ್ಯವಾದ ಕೆಲಸ ಲಂಡನ್ನಲ್ಲಿ ಬೇಕಾದಷ್ಟಿವೆ. ಅಷ್ಟಕ್ಕೂ ಜಿಮ್ ಒಳಗೆ ಯಾರೂ ಆಪತ್ತಿಗೆ ಸಿಕ್ಕಿರಲಿಲ್ಲ. ಅದಾಗ್ಯೂ ಬಾಗಿಲು ಮುರಿದು ಪ್ರವೇಶಿಸಲು ಯತ್ನಿಸಿದ್ದು ತಪ್ಪು. ಆ ಜಿಮ್ ಕಟ್ಟಿ ಬೆಳೆಸಲು ನಾನು ಸಾಕಷ್ಟು ಕಷ್ಟಪಟ್ಟಿದ್ದೇನೆ. ಅವರು ಎದುರು ಹಾಕಿಕೊಳ್ಳಬಾರದವನನ್ನು ಎದುರು ಹಾಕಿಕೊಂಡಿದ್ದಾರೆ. ಅವರ ವಿರುದ್ಧ ಕ್ರಮ ಜರುಗುವಂತೆ ಮಾಡುತ್ತೇನೆ ಎಂದು ಜೇಮ್ಸ್ ಕೂಪರ್ ತಿರುಗಿ ಬಿದ್ದಿದ್ದಾನೆ.
ಕೂಪರ್ ತನ್ನ ಜಿಮ್ನಲ್ಲಿ ಹಲವು ಗಣ್ಯರಿಗೆ ತರಬೇತಿ ನೀಡುತ್ತಿದ್ದು, ಹೈಪ್ರೊಫೈಲ್ ಜಿಮ್ ಟ್ರೇನರ್ ಎನಿಸಿಕೊಂಡಿದ್ದಾನೆ. ಲಂಡನ್ನಲ್ಲಿ ಲಾಕ್ಡೌನ್ ಅವಧಿಯಲ್ಲಿ ಜಿಮ್ ತೆರೆಯದಂತೆ ಅಲ್ಲಿನ ಸರ್ಕಾರ ಸೂಚನೆ ನೀಡಿದ್ದು, ಡಿಸೆಂಬರ್ 2ರ ಬಳಿಕ ನಿರ್ಬಂಧ ತೆರವುಗೊಳಿಸುವುದಾಗಿದೆ ಹೇಳಿದೆ. ಮತ್ತೊಂದೆಡೆ ನಮ್ಮದು ಮಾನಸಿಕ ಹಾಗೂ ದೈಹಿಕ ಆರೋಗ್ಯ ಹೆಚ್ಚಿಸುವ ಕೆಲಸ ಎಂದು ಕೆಲವರು ಜಿಮ್ ನಡೆಸುತ್ತಲೇ ಇದ್ದಾರೆ. ಈ ಹಿನ್ನೆಲೆಯಲ್ಲಿ ಪೊಲೀಸರು ಕ್ರಮಕ್ಕೆ ಮುಂದಾಗಿದ್ದರು. (ಏಜೆನ್ಸೀಸ್)
ಹಸೆಮಣೆ ಏರಬೇಕಿದ್ದ ವರ ದಿಬ್ಬಣ ಸಮೇತ ಬೀದಿಗಿಳಿದ; ಅದಕ್ಕೆ ಕಾರಣ ಒಬ್ಬಿಬ್ಬರಲ್ಲ..!