ಬೆಂಗಳೂರು: ಉದಯೋನ್ಮುಖ ಪ್ರತಿಭೆಗಳಿಗೆ ಇದೀಗ ಸೋಷಿಯಲ್ ಮೀಡಿಯಾ ಒಂದೊಳ್ಳೆಯ ಲಾಂಚ್ ಪ್ಯಾಡ್ನಂತಾಗುತ್ತಿವೆ. ಯಾವುದೋ ಮೂಲೆಯಲ್ಲಿರುವ ಪ್ರತಿಭೆಗಳು ರಾತ್ರಿ ಬೆಳಗಾಗುವುದರೊಳಗೆ ‘ವರ್ಲ್ಡ್ ಫೇಮಸ್’ ಆಗುತ್ತಿದ್ದಾರೆ. ಮಾತ್ರವಲ್ಲ ಒಂದೊಳ್ಳೆಯ ಸಂಗೀತ, ಕಲೆ, ಬರವಣಿಗೆ, ವಿಡಿಯೋ ತುಣುಕುಗಳು ಕೆಲವೇ ನಿಮಿಷಗಳಲ್ಲಿ ವಿಶ್ವಾದ್ಯಾಂತ ಹರಿದಾಡಿ ಜನಪ್ರಿಯವಾಗುತ್ತಿವೆ, ಜನಪ್ರಿಯತೆ ತಂದು ಕೊಡುತ್ತಿವೆ.
ಅಂಥ ಪ್ರತಿಭೆಗಳಲ್ಲಿ ಈ ಸೋದರಿ ಜೋಡಿಯೂ ಒಂದು. ಈಗಾಗಲೇ ಜಂಟಿಯಾಗಿ ಹಾಡುವ ಮೂಲಕ ಸಾಕಷ್ಟು ಸಲ ಸಂಗೀತಪ್ರಿಯರ ಮನ ಗೆದ್ದಿರುವ ಈ ಸೋದರಿಯರು, ಈಗ ಮತ್ತೊಮ್ಮೆ ಕೇಳುಗರಿಗೆ ಸಂಗೀತದ ಖುಷಿ ನೀಡಿದ್ದಾರೆ. ಇವರು ಮತ್ಯಾರೂ ಅಲ್ಲ, ಸಹೋದರಿಯರಾಗಿರುವ ಅಂತರ ನಂದಿ ಹಾಗೂ ಅಂಕಿತ ನಂದಿ.
ಅಂತರ ನಂದಿ ಸೋದರಿ ಅಂಕಿತ ಜತೆ ಹಾಡಿರುವ ಚಿತ್ರಗೀತೆಯೊಂದರ ತುಣುಕನ್ನು ತಮ್ಮ ಇನ್ಸ್ಟಾಗ್ರಾಮ್ ಪ್ರೊಫೈಲ್ನಲ್ಲಿ ನಾಲ್ಕು ದಿನಗಳ ಹಿಂದೆ ಹಂಚಿಕೊಂಡಿದ್ದಾರೆ. ‘ಬೇಫಿಕ್ರೆ’ ಸಿನಿಮಾದ ‘ನಶೆ ಸಿ ಛಡ್ ಗಯಿ’ ಗೀತೆಯನ್ನು ಇವರು ಒಂಚೂರೂ ಆಚೀಚೆ ಆಗದಂತೆ ಇಬ್ಬರೂ ಜತೆಯಾಗಿ ಹಾಡಿದ್ದು ಈ ವಿಡಿಯೋ ತುಣುಕಿನ ವಿಶೇಷ. ಈ ಪರ್ಫೆಕ್ಟ್ ವಾಯ್ಸ್ ಸಿಂಕ್ನ ಬಗ್ಗೆ ನೆಟ್ಟಿಗರು ಫಿದಾ ಆಗಿದ್ದು, ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ನಾಲ್ಕೇ ದಿನಗಳಲ್ಲಿ ಈ ವಿಡಿಯೋವನ್ನು 2 ಲಕ್ಷಕ್ಕೂ ಅಧಿಕ ಮಂದಿ ವೀಕ್ಷಿಸಿದ್ದು, ಹಲವರು ಮೆಚ್ಚುಗೆಯ ಕಮೆಂಟ್ ಮಾಡಿದ್ದಾರೆ. ‘ಆವೊತ್ತಿಂದಿನ ನಮಗೆ ತುಂಬ ಸಮಯವಿತ್ತು, ಸಿಕ್ಕಾಪಟ್ಟೆ ವಿಡಿಯೋ ಮಾಡಿದ್ವಿ, ಅದರಲ್ಲಿ ಇದೂ ಒಂದು..’ ಎಂಬ ಸಾಲಿನೊಂದಿಗೆ ಅಂತರ ನಂದಿ ಈ ವಿಡಿಯೋ ಪೋಸ್ಟ್ ಮಾಡಿದ್ದಾರೆ.