ಮುಂಬೈ: ಬಾಲಿವುಡ್ ನಟಿ ಪರಿಣೀತಿ ಚೋಪ್ರಾ ಖುಷಿಯಾಗಿದ್ದಾರೆ. ಅದಕ್ಕೆ ಕಾರಣ, ಅವರ ಅಭಿನಯದ ಮೂರು ಚಿತ್ರಗಳು ‘ಎ ಗರ್ಲ್ ಆನ್ ದಿ ಟ್ರೈನ್’, ‘ಸೈನಾ’ ಮತ್ತು ‘ಸಂದೀಪ್ ಔರ್ ಪಿಂಕಿ ಫರಾರ್’ ಬ್ಯಾಕ್ ಟು ಬ್ಯಾಕ್ ಬಿಡುಗಡೆಯಾಗಿದ್ದಷ್ಟೇ ಅಲ್ಲ, ಈ ಮೂರೂ ಚಿತ್ರಗಳು ಒಂದಕ್ಕಿಂತ ಒಂದು ವಿಭಿನ್ನವಾಗುವುದರ ಜತೆಗೆ, ಪರಿಣೀತಿಗೆ ಹೆಸರು ತಂದುಕೊಟ್ಟಿದೆಯಂತೆ.
ಇದನ್ನೂ ಓದಿ: ಅಮೇಜಾನ್ ಪ್ರೈಮ್ ಆಯ್ತು; ಇದೀಗ ನೆಟ್ಫ್ಲಿಕ್ಸ್ನತ್ತ ಹೊರಟ ಮನೋಜ್
ಇನ್ನು, ‘ಸಂದೀಪ್ ಔರ್ ಪಿಂಕಿ ಫರಾರ್’ ಚಿತ್ರದಲ್ಲಿನ ಸಂದರ್ಭದಲ್ಲಿ ಆದ ಒಂದು ವಿಷಯವನ್ನು ಪರಿಣೀತಿ ಇದೀಗ ಹಂಚಿಕೊಂಡಿದ್ದಾರೆ. ಅದೇನೆಂದರೆ, ಚಿತ್ರದಲ್ಲಿನ ಒಂದು ಸನ್ನಿವೇಶಕ್ಕಾಗಿ ಅವರು ಎರಡು ದಿನಗಳ ಕಾಲ ಸ್ನಾನ ಮಾಡಿರಲಿಲ್ಲವಂತೆ.
ಹೌದು, ಚಿತ್ರದಲ್ಲಿನ ಒಂದು ಗುಡಿಸಲಿನ ಸನ್ನಿವೇಶವಿದೆ. ಅದರಲ್ಲಿ ದಾರಿ ಮಧ್ಯೆ ಪರಿಣೀತಿಗೆ ಗರ್ಭಪಾತವಾಗಿ, ಅವರನ್ನು ಅರ್ಜುನ್ ಕಪೂರ್ ಒಂದು ಗುಡಿಸಲಿಗೆ ಕರೆದು ತರುತ್ತಾರಂತೆ. ಅಲ್ಲಿ ಆಕೆಯನ್ನು ಶುಶ್ರೂಷೆ ಮಾಡುತ್ತಾರಂತೆ. ಈ ಸನ್ನಿವೇಶವನ್ನು ಚಿತ್ರೀಕರಿಸುವುದಕ್ಕೆ ಎರಡ್ಮೂರು ದಿನ ಬೇಕಾಯಿತಂತೆ. ಅಲ್ಲಿನ ಕೊಳೆ, ಧೂಳಿನ ಮಧ್ಯೆ ಸನ್ನಿವೇಶ ಇದ್ದ ಹಿನ್ನೆಲೆಯಲ್ಲಿ, ಕಂಟಿನ್ಯುಟಿ ಮಿಸ್ ಆಗಬಾರದು ಮತ್ತು ನೈಜವಾಗಿ ಕಾಣಿಸಿಕೊಳ್ಳಬೇಕು ಎಂಬ ಕಾರಣಕ್ಕೆ ಪರಿಣೀತಿ, ಎರಡು ದಿನಗಳ ಕಾಲ ಸ್ನಾನ ಮಾಡಲಿಲ್ಲವಂತೆ.
ಇದನ್ನೂ ಓದಿ: ‘ದಿ ಫ್ಯಾಮಿಲಿ ಮ್ಯಾನ್ 3’ ಯಾವಾಗ ಬರುತ್ತೆ? ಇಲ್ಲಿದೆ ಉತ್ತರ
ಈ ಕುರಿತು ಮಾತನಾಡಿರುವ ಅವರು, ‘ಅಲ್ಲಿಯ ಲೊಕೇಶನ್ ಬಹಳ ಗಲೀಜಾಗಿತ್ತು. ಮೊದಲ ದಿನದ ಚಿತ್ರೀಕರಣದ ಅಂತ್ಯದಲ್ಲಿ, ದೇಹವೆಲ್ಲ ಮಣ್ಣಾಗಿತ್ತು. ಧೂಳಿನಿಂದಾಗಿ ಕೂದಲು ಸಹ ಬೆಳ್ಳಗಾಗಿತ್ತು. ಅದನ್ನು ಕ್ಲೀನ್ ಮಾಡುವುದಕ್ಕೆ ಹೋಗಲಿಲ್ಲ. ನೇರವಾಗಿ ರೂಮ್ಗೆ ಹೋಗಿ ನಿದ್ದೆ ಮಾಡಿ, ಮರುದಿನ ಎದ್ದು ಬಂದೆ’ ಎಂದು ಹೇಳಿಕೊಂಡಿದ್ದಾರೆ.