ಧರಂಶಾಲಾ : ಹಿಮಾಚಲ ಪ್ರದೇಶದ ಧರಂಶಾಲಾ ಬಳಿಯ ಕರೇರಿಗೆ ಟ್ರೆಕ್ಕಿಂಗ್ ಮಾಡಲು ಹೋದ ಯುವಜನರಿಗೆ ಪಾಕಿಸ್ತಾನಿ ಮೊಬೈಲ್ ಸಿಗ್ನಲ್ಗಳು ಲಭ್ಯವಾಗಿರುವ ಪ್ರಸಂಗ ವರದಿಯಾಗಿದೆ. ಈ ಸ್ಥಳಕ್ಕೆ ಅತ್ಯಂತ ಹತ್ತಿರವಾದ ಗಡಿರೇಖೆಯು 150 ಕಿಲೋಮೀಟರ್ ದೂರದಲ್ಲಿದ್ದರೂ, ಈ ರೀತಿ ಪಾಕಿಸ್ತಾನದ ನೆಟ್ವರ್ಕ್ ಲಭ್ಯವಾಗಿರುವ ಬಗ್ಗೆ ಕಳವಳ ವ್ಯಕ್ತವಾಗಿದೆ.
ಇತ್ತೀಚೆಗೆ ಹಿಮಾಚಲದ ಕಾಂಗ್ರ ಜಿಲ್ಲೆಯ ವ್ಯಾಪ್ತಿಯಲ್ಲಿ ಬರುವ ಧರಂಶಾಲಾದಿಂದ 26 ಕಿಲೋಮೀಟರ್ ದೂರದಲ್ಲಿರುವ ಕರೇರಿ ಕೆರೆಗೆ ಕೆಲವು ಯುವಜನರು ಟ್ರೆಕ್ಕಿಂಗ್ ಪ್ರವಾಸ ಹೋಗಿದ್ದಾರೆ. ಈ ಸಂದರ್ಭದಲ್ಲಿ ಅವರಿಗೆ ಪಾಕಿಸ್ತಾನದಿಂದ ಜನಿತವಾದ ಸೆಲುಲರ್ ನೆಟ್ವರ್ಕ್ ಸಿಗ್ನಲ್ಗಳು ಸಿಕ್ಕಿದ್ದು, ಭಾರತದ ಯಾವುದೇ ಮೊಬೈಲ್ ಆಪರೇಟರ್ಗಳ ಸಿಗ್ನಲ್ ಸಿಕ್ಕಿಲ್ಲ. ಅಷ್ಟೇ ಅಲ್ಲ, ಅವರ ಮೊಬೈಲ್ ಫೋನ್ಗಳಲ್ಲಿ ಇಂಡಿಯನ್ ಸ್ಟಾಂಡರ್ಡ್ ಟೈಮ್(ಐಎಸ್ಟಿ)ನಲ್ಲಿ ಬದಲಾವಣೆ ಉಂಟಾಗಿ, ಪಾಕಿಸ್ತಾನ್ ಸ್ಟಾಡಂರ್ಡ್ ಟೈಮ್ ತೋರಿಸಿದೆ ಎನ್ನಲಾಗಿದೆ.
ಇದನ್ನೂ ಓದಿ: ಅತಿಉದ್ದನೇ ಕೂದಲಿನ ಹಿರಿಮೆಯುಳ್ಳ ಯುವತಿಗೆ 12 ವರ್ಷಗಳಲ್ಲಿ ಮೊದಲನೇ ಹೇರ್ಕಟ್!
ಈ ಬಗ್ಗೆ ಕಾಂಗ್ರಾ ಜಿಲ್ಲಾಡಳಿತವು ಟೆಲಿಕಮ್ಯುನಿಕೇಷನ್ಸ್ ಇಲಾಖೆಗೆ ಮಾಹಿತಿ ನೀಡಿದ್ದು, ಸ್ಥಳೀಯ ಪೊಲೀಸರು ಎಚ್ಚರವಾಗಿರಬೇಕೆಂದು ಹೇಳಲಾಗಿದೆ. ಕೌತುಕವೆಂದರೆ ಧರಂಶಾಲಾ ಮತ್ತು ನಿಕಟವಾದ ಭಾರತ-ಪಾಕಿಸ್ತಾನ ಗಡಿಗೆ 140 ಕಿ.ಮೀ. ಅಂತರವಿದೆ. ಮತ್ತು ಅಂತರರಾಷ್ಟ್ರೀಯ ನಿಯಮಗಳ ಪ್ರಕಾರ, ಮೊಬೈಲ್ ಫೋನ್ ಸಿಗ್ನಲ್ಗಳು ಗಡಿಯ ಆಚೆಗೆ 500 ಮೀಟರ್ಗಳನ್ನು ಮೀರಿದ ನಂತರ ಸಿಗುವ ಹಾಗಿಲ್ಲ ಎನ್ನಲಾಗಿದೆ.
ಗಡಿಭಾಗದಲ್ಲಿ ಅನ್ಯದೇಶೀಯ ನೆಟ್ವರ್ಕ್ಗಳು ಸಿಗುವುದು ಸಾಮಾನ್ಯ ವಿಷಯವಾಗಿದೆ. ಆದರೆ ಇಷ್ಟೊಂದು ದೂರದಲ್ಲಿರುವ ಪ್ರದೇಶದಲ್ಲಿ ಪಾಕಿಸ್ತಾನಿ ನೆಟ್ವರ್ಕ್ ಸಿಕ್ಕಿರುವುದು ಸಮಾಜ ವಿರೋಧಿ ಚಟುವಟಿಕೆಗಳಿಗೆ ದುರ್ಬಳಕೆಯಾಗಬಹುದೆಂಬ ಕಳವಳ ಉಂಟುಮಾಡಿದೆ. ಟಿಬೆಟ್ನ ಆಧ್ಯಾತ್ಮ ಗುರು ದಲೈ ಲಾಮಾ ಅವರು ಕೂಡ ಧರಂಶಾಲಾದಲ್ಲೇ ವಾಸಿಸುವುದರಿಂದ ಈ ಪ್ರದೇಶ ಹೆಚ್ಚು ಕಾವಲು ಹೊಂದಿದ ಪ್ರದೇಶವಾಗಿದೆ. (ಏಜೆನ್ಸೀಸ್)
ಕರೊನಾ ವಿರುದ್ಧ ದೃಢ ಸಂಕಲ್ಪ : ಚುನಾವಣೆ ಎದುರಿದ್ದರೂ ಈ ಹಳ್ಳಿ ಪೂರ್ಣ ಬಂದ್ !
‘ಮನೆಯಲ್ಲೇ ಇದ್ದರೂ ಕರೊನಾ ಸೋಂಕು ಹೇಗೆ ತಗುಲಿತು ?’ – ನಟ ರಾಹುಲ್ ರಾಯ್ ಪ್ರಶ್ನೆ!