ಇಸ್ಲಮಾಬಾದ್: ಚೀನಾದ 59 ಆ್ಯಪ್ಗಳನ್ನು ಭಾರತದಲ್ಲಿ ನಿಷೇಧ ಮಾಡಿದ ಬೆನ್ನಲ್ಲೇ ಪಾಕಿಸ್ತಾನ ಪಬ್ಜಿ ಆನ್ಲೈನ್ ಆಟವನ್ನು ತಾತ್ಕಾಲಿಕವಾಗಿ ಬ್ಯಾನ್ ಮಾಡಿತ್ತು.
ಇದೀಗ ಮತ್ತೊಂದು ಪ್ರಮುಖ ನಿರ್ಧಾರ ಕೈಗೊಂಡಿರುವ ಪಾಕ್, ಸಿಂಗಪೂರ್ ಮೂಲದ ಬಿಗೊ ಲೈವ್ ಆ್ಯಪ್ನ್ನು ನಿಷೇಧಿಸಿದೆ. ಅಷ್ಟೇ ಅಲ್ಲ ವಿಡಿಯೋ ಅಪ್ಲೋಡ್ ಆ್ಯಪ್ ಆಗಿರುವ ಟಿಕ್ಟಾಕ್ಗೆ ಖಡಕ್ ಎಚ್ಚರಿಕೆಯನ್ನು ನೀಡಿದೆ. ಬಿಗೊ ಸಿಂಗಪೂರ ಮೂಲದ ಆ್ಯಪ್ ಆಗಿದ್ದರೂ ನಂತರದಲ್ಲಿ ಇದರ ತಂತ್ರ ವನ್ನು 2019ರಲ್ಲಿ ಚೀನಾದ JOYY ಕಂಪನಿ ಸ್ವಾಧೀನಪಡಿಸಿಕೊಂಡಿದೆ.
ಪಬ್ಜಿಯಿಂದ ಯುವಕರು, ಮಕ್ಕಳು ಆತ್ಮಹತ್ಯೆ ಮಾಡಿಕೊಳ್ಳುವ ಪ್ರಮಾಣ ಹೆಚ್ಚಾಗಿದೆ ಎಂದು ಆರೋಪಿಸಿದ್ದ ಪಾಕಿಸ್ತಾನ ದೂರ ಸಂಪರ್ಕ ಪ್ರಾಧಿಕಾರ (PETA) ಆ ಆಟವನ್ನು ತಾತ್ಕಾಲಿಕವಾಗಿ ನಿಷೇಧಿಸುವುದಾಗಿ ಹೇಳಿತ್ತು. ಇದನ್ನೂ ಓದಿ: ಸೋಂಕಿತರ ಮನೆ ಬಾಗಿಲಿಗೆ ತಗಡಿನ ಶೀಟ್ ಹಾಕಿ ಸೀಲ್ ಮಾಡಿದ ಬಿಬಿಎಂಪಿ: ಮೂರೇ ಗಂಟೆಯಲ್ಲಿ ತೆರವಾಗಿದ್ದೇಕೆ?
ಇದೀಗ ಬಿಗೊ ಮತ್ತು ಟಿಕ್ಟಾಕ್ಗಳ ಬಗ್ಗೆಯೂ ಅಪಾರ ದೂರು ಬರುತ್ತಿದೆ. ಟಿಕ್ಟಾಕ್ಗೆ ಕೊನೇ ಎಚ್ಚರಿಕೆ ನೀಡಲಾಗಿದೆ. ಇನ್ನು ಮುಂದೆ ಅದರಲ್ಲಿ ಅಶ್ಲೀಲ, ಪ್ರಚೋದನಾಕಾರಿ ವಿಡಿಯೋಗಳನ್ನು ನೋಡಿದರೆ, ಅದನ್ನೂ ಕೂಡ ದೇಶದಲ್ಲಿ ಬ್ಯಾನ್ ಮಾಡುತ್ತೇವೆ ಎಂದು PETA ತಿಳಿಸಿದೆ.
ಬಿಗೊ ಹಾಗೂ ಟಿಕ್ಟಾಕ್ಗಳಲ್ಲಿ ಅಶ್ಲೀಲ, ಅನೈತಿಕವಾದ ವಿಡಿಯೋಗಳು ಬಿತ್ತರವಾಗುತ್ತವೆ. ಇದು ಕೂಡ ಯುವಜನತೆ, ಮಕ್ಕಳ ಮನಸು ಮತ್ತು ದೇಹದ ಮೇಲೆ ದುಷ್ಪರಿಣಾಮ ಬೀರುತ್ತಿದೆ ಎಂದು ಸಮಾಜದ ವಿವಿಧ ವರ್ಗಗಳ ಜನರು ಹೆಚ್ಚಿನ ಸಂಖ್ಯೆಯಲ್ಲಿ ದೂರು ನೀಡಿದ್ದಾರೆ ಎಂದು ಪಾಕ್ ದೂರ ಸಂಪರ್ಕ ಪ್ರಾಧಿಕಾರ ತಿಳಿಸಿದೆ. (ಏಜೆನ್ಸೀಸ್)