ಲಂಡನ್: ಕರೊನಾ ವೈರಸ್ನ ಮೂಲ ಇನ್ನೂ ಸ್ಪಷ್ಟವಾಗಿಲ್ಲ. ಅದರ ಬಗ್ಗೆ ಇನ್ನೂ ಹೆಚ್ಚಿನ ತನಿಖೆ ನಡೆಯಬೇಕು. ಮಾಹಿತಿ-ಆಧಾರಿತ ತನಿಖೆಯು ವ್ಯತಿರಿಕ್ತವಾದ ತೀರ್ಮಾನ ನೀಡದ ಹೊರತು, ಅದು ಪ್ರಯೋಗಾಲಯದಿಂದ ಸೋರಿಕೆಯಾಯಿತು ಎಂಬ ಸಿದ್ಧಾಂತವನ್ನು ಗಂಭೀರವಾಗಿ ಪರಿಗಣಿಸುವ ಅಗತ್ಯವಿದೆ ಎಂದು ಪ್ರಮುಖ ವಿಜ್ಞಾನಿಗಳ ಗುಂಪು ಹೇಳಿದೆ.
2019 ರ ಕೊನೆಯಲ್ಲಿ ಚೀನಾದಲ್ಲಿ ಕಾಣಿಸಿಕೊಂಡ ಕೋವಿಡ್-19 ವೈರಸ್ ಇದುವರೆಗೆ ಜಗತ್ತಿನಾದ್ಯಂತ 3.34 ಮಿಲಿಯನ್ ಜನರ ಸಾವಿಗೆ ಕಾರಣವಾಗಿದೆ. ಟ್ರಿಲಿಯನ್ಗಟ್ಟಲೆ ಡಾಲರ್ಗಳ ಆದಾಯವನ್ನು ನಷ್ಟಗೊಳಿಸಿದೆ ಮತ್ತು ಬಿಲಿಯನ್ಗಟ್ಟಲೆ ಜನರ ಜೀವನವನ್ನು ಏರುಪೇರಾಗಿಸಿದೆ.
ಇದನ್ನೂ ಓದಿ: ಅರಬ್ಬಿ ಸಮುದ್ರದಲ್ಲಿ ಅಪಾಯಕ್ಕೆ ಸಿಲುಕಿದ್ದ ಮೂವರು ಮೀನುಗಾರರ ರಕ್ಷಿಸಿದ ಕೋಸ್ಟ್ಗಾರ್ಡ್
“ಕರೊನಾ ಸಾಂಕ್ರಾಮಿಕದ ಹುಟ್ಟು ಹೇಗಾಯಿತು ಎಂದು ತಿಳಿಯಲು ಇನ್ನೂ ಹೆಚ್ಚಿನ ತನಿಖೆಯಾಗಬೇಕಿದೆ” ಎನ್ನುತ್ತಾರೆ ಯೂನಿವರ್ಸಿಟಿ ಆಫ್ ಕೇಂಬ್ರಿಜ್ನ ಕ್ಲಿನಿಕಲ್ ಮೈಕ್ರೊಬಯಲಾಜಿಸ್ಟ್ ರವೀಂದ್ರ ಗುಪ್ತ ಮತ್ತು ಫ್ರೆಡ್ ಹಚ್ಚಿನ್ಸನ್ ಕ್ಯಾನ್ಸರ್ ರಿಸರ್ಚ್ ಸೆಂಟರ್ನಲ್ಲಿ ವೈರಸ್ಗಳ ವಿಕಾಸವನ್ನು ಅಧ್ಯಯನ ಮಾಡುವ ಜೆಸ್ಸಿ ಬ್ಲೂಮ್ . ಪ್ರತಿಷ್ಠಿತ ಜರ್ನಲ್ ಸೈನ್ಸ್ಗೆ ಪತ್ರ ಬರೆದಿರುವ 18 ವಿಜ್ಞಾನಿಗಳಲ್ಲಿ ಇವರೂ ಸೇರಿದ್ದಾರೆ.
ಮತ್ತೊಬ್ಬ ವಿಜ್ಞಾನಿ, ಸ್ಟಾನ್ಫರ್ಡ್ ಯೂನಿವರ್ಸಿಟಿಯ ಮೈಕ್ರೊಬಯಾಲಜಿ ಪ್ರೊಫೆಸರ್ ಡೇವಿಡ್ ರೆಲ್ಮನ್ ಅವರು, “ಲ್ಯಾಬ್ನಿಂದ ಆಕಸ್ಮಿಕವಾಗಿ ಬಿಡುಗಡೆಯಾದ ಸಿದ್ಧಾಂತ ಮತ್ತು ಜೂನೋಟಿಕ್ ಸ್ಪಿಲ್ಓವರ್ ಸಿದ್ಧಾಂತ – ಎರಡೂ ಸಾಧ್ಯವಾಗಿಯೇ ಉಳಿದಿವೆ” ಎನ್ನುತ್ತಾರೆ. ಈ ವಿಜ್ಞಾನಿಗಳ ಪತ್ರ ಇಲ್ಲಿದೆ : https://science.sciencemag.org/content/372/6543/694.1
ಪ್ರಯೋಗಾಲಯದಿಂದ ಸೋರಿಕೆಯಾಗಿ ವೈರಸ್ ಹರಡಿದೆ ಎಂಬ ಆರೋಪವನ್ನು ಸಮತೋಲನಯುತವಾಗಿ ಅಧ್ಯಯನ ಮಾಡುವಲ್ಲಿ ವಿಶ್ವ ಆರೋಗ್ಯ ಸಂಸ್ಥೆ ವಿಫಲವಾಗಿದೆ ಎಂದೂ ಈ ವಿಜ್ಞಾನಿಗಳು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ವೈರಸ್ ಉಗಮದ ನಿಜವಾದ ಕಾರಣಗಳನ್ನು ಅರ್ಥಮಾಡಿಕೊಳ್ಳುವುದು ಭವಿಷ್ಯದಲ್ಲಿ ಈ ತೆರನ ಸಾಂಕ್ರಾಮಿಕಗಳು ಹರಡುವುದನ್ನು ತಪ್ಪಿಸಲು ಅತ್ಯಂತ ಅವಶ್ಯಕ ಎಂದಿದ್ದಾರೆ. (ಏಜೆನ್ಸೀಸ್)
ಯುವ ಕಾಂಗ್ರೆಸ್ ರಾಷ್ಟ್ರಾಧ್ಯಕ್ಷ ಶ್ರೀನಿವಾಸ್ ವಿಚಾರಣೆ ನಡೆಸಿದ ದೆಹಲಿ ಪೊಲೀಸ್