ಮುಂಬೈ: ಬಾಲಿವುಡ್ ನಟ ಸುಶಾಂತ್ ಸಿಂಗ್ ರಜಪೂತ್ ಆತ್ಮಹತ್ಯೆ ಬಳಿಕ ಅವರ ಕುರಿತು ಸಿನಿಮಾ ಮಾಡುವುದಾಗಿ ಸಾಕಷ್ಟು ಮಂದಿ ಹೇಳಿಕೊಂಡಿದ್ದರು. ಅದರಂತೆ ಇದೀಗ ಸಿನಿಮಾವೊಂದು ಸಿದ್ಧವಾಗಿದೆ. ಅದರ ಹೆಸರು ನ್ಯಾಯ್; ದಿ ಜಸ್ಟಿಸ್. ಈ ಚಿತ್ರದ ಟ್ರೇಲರ್ ಶುಕ್ರವಾರ ಬಿಡುಗಡೆ ಆಗಿದೆ. ಮೆಚ್ಚುಗೆಯ ಬದಲಿಗೆ ಗುಣಮಟ್ಟದ ವಿಚಾರವಾಗಿ ಕಳಪೆ ಹಣೆಪಟ್ಟಿ ಪಡೆದುಕೊಂಡಿದೆ.
ಇದನ್ನೂ ಓದಿ: ಸೀತೆ ಪಾತ್ರಕ್ಕೆ ಕರೀನಾ ಅರ್ಹರಲ್ಲ! ಸಂಭಾವನೆ ವಿಚಾರಕ್ಕೆ ಬ್ಯಾನ್ ಬಿಸಿ..
ದಿಲೀಪ್ ಗುಲಾಟಿ ನಿರ್ದೇಶನದ ‘ನ್ಯಾಯ್; ದಿ ಜಸ್ಟಿಸ್’ ಸಿನಿಮಾದಲ್ಲಿ ಸುಶಾಂತ್ ಸಿಂಗ್ ರಜಪೂತ್ ಪಾತ್ರವನ್ನು ಮಹೇಂದ್ರ ಸಿಂಗ್ ಎಂದು ಬದಲಿಸಲಾಗಿದ್ದು, ಜುಬೇರ್ ಖಾನ್ ಪಾತ್ರ ನಿಭಾಯಿಸಿದ್ದಾರೆ. ಸುಶಾಂತ್ ಜೀವನದಲ್ಲಿ ನಡೆದ ಒಂದಷ್ಟು ಘಟನೆಗಳನ್ನೇ ಆಧರಿಸಿ ಈ ಸಿನಿಮಾ ಮಾಡಿದ್ದರಾದರೂ, ಕಾಟಾಚಾರಕ್ಕೆ ಚಿತ್ರ ಮಾಡಿ ಮುಗಿಸಿದಂತೆ ಕಾಣಿಸುತ್ತದೆ.
ಅಸ್ರಾನಿ, ಶಕ್ತಿ ಕಪೂರ್, ಸುಧಾ ಚಂದ್ರನ್ ಚಿತ್ರದ ಪ್ರಮುಖ ತಾರಾಬಳಗದಲ್ಲಿ ಕಾಣಿಸಿಕೊಂಡಿದ್ದಾರೆ. ಸಾವಿನ ಹಿನ್ನೆಲೆಯ ಹಿಂದಿನ ಕಥೆಯನ್ನು ಥ್ರಿಲ್ಲರ್ ರೂಪದಲ್ಲಿ ಹೇಳುವ ಪ್ರಯತ್ನ ಮಾಡಲಾಗಿದೆಯಾದರೂ, ನೋಡುಗನಿಗೆ ಅದು ಥ್ರಿಲ್ ನೀಡುವುದಿಲ್ಲ. ಸುಶಾಂತ್ ಸಾವಿನಲ್ಲಿ ದೊಡ್ಡ ಕೈವಾಡವಿತ್ತು ಎಂದು ಹೇಳಲಾದ ನಟಿ ರಿಯಾ ಚಕ್ರವರ್ತಿಯನ್ನು ಬೋಲ್ಡ್ ರೀತಿಯಲ್ಲಿ ತೋರಿಸಿದ್ದಾರೆ. ಟ್ರೇಲರ್ಗೆ ಡಿಸ್ಲೈಕ್ ನೀಡುತ್ತಿದ್ದಾರೆ ನೆಟ್ಟಿಗರು.
ಇದನ್ನೂ ಓದಿ: ವಿಶ್ವನಾಥನ್ ಆನಂದ್ ಜತೆ ಕಿಚ್ಚನ ಚೆಸ್
ಅಂದಹಾಗೆ, ಸುಶಾಂತ್ ಕುರಿತ ಈ ಸಿನಿಮಾವನ್ನು ಪ್ರಸಾರ ಮಾಡದಂತೆ ಅವರ ತಂದೆ ಕೆಕೆ ಸಿಂಗ್ ದೆಹಲಿ ಹೈಕೋರ್ಟ್ನಲ್ಲಿ ಅರ್ಜಿ ಸಲ್ಲಿಸಿದ್ದರು. ಸುಶಾಂತ್ ಸಾವನ್ನು ಮತ್ತು ಆ ಸಂದರ್ಭವನ್ನು ಚಿತ್ರತಂಡಗಳು ಬಳಸಿಕೊಳ್ಳುತ್ತಿವೆ ಎಂದು ಆರೋಪಿಸಿದ್ದರು. ಆದರೆ, ದೆಹಲಿ ಹೈಕೋರ್ಟ್ ಅರ್ಜಿಯನ್ನು ತಿರಸ್ಕರಿಸಿತ್ತು.