ಬೆಂಗಳೂರು: ಹೌದು! ಇನ್ನು ವಾಟ್ಸ್ಯಾಪ್ನಲ್ಲಿ ನಮಗೆ ನಾವೇ ಸಂದೇಶಗಳನ್ನು ಕಳಿಸಿಕೊಳ್ಳಬಹುದು. ಮೆಟಾ (ಫೇಸ್ಬುಕ್) ಮಾಲೀಕತ್ವದ ವಾಟ್ಸ್ಯಾಪ್ನಲ್ಲಿ ಈ ಹೊಸ ಫೀಚರ್ ಅನ್ನು ಪರಿಚಯಿಸಲಾಗಿದ್ದು ಇದು ಈಗ ಎಲ್ಲಾ ಬಳಕೆದಾರರಿಗೂ ಲಭ್ಯವಾಗಿದೆ.
ಈ ಹಿಂದೆ ಈ ಫೀಚರ್, ವಾಟ್ಸ್ಯಾಪ್ನ ಬೀಟಾ ಬಳಕೆದಾರರಿಗೆ ಮಾತ್ರ ಲಭ್ಯವಿತ್ತು. ಇದೀಗ ಸಾರ್ವಜನಿಕರಿಗೂ ಲಭ್ಯವಾಗಿದ್ದು ಇದು ಅನೇಕ ಜನರ ಕೆಲಸ ಸುಭ ಮಾಡಲಿದೆ ಎನ್ನಲಾಗುತ್ತಿದೆ.
ಅನೇಕರು, ಅಗತ್ಯ ಮಾಹಿತಿಯನ್ನು ಸೇವ್ ಮಾಡಿಕೊಳ್ಳಲು ತಾವೊಬ್ಬರೇ ಇರುವ ಗ್ರೂಪ್ಗಳನ್ನು ಸೃಷ್ಟಿಸಿಕೊಂಡು ಅಲ್ಲಿಗೆ ಅಗತ್ಯ ಮೆಸೇಜ್ಗಳನ್ನು ಕಳಿಸುತ್ತಿದ್ದರು. ಇದನ್ನು ತಪ್ಪಿಸಲು ಇದೀಗ ವಾಟ್ಸ್ಯಾಪ್ ಈ ಫೀಚರ್ಅನ್ನು ಪರಿಚಯಿಸಿದೆ ಎನ್ನಲಾಗುತ್ತಿದೆ.
ಹೊಸ ಫೀಚರ್ ಬಳಸುವುದು ಹೇಗೆ?
ಈ ಫೀಚರ್ ಅನ್ನು ಬಳಸಲು ಶುರು ಮಾಡುವುದು ತೀರಾ ಸರಳ. ವಾಟ್ಸ್ಯಾಪ್ ಅಪ್ಲಿಕೇಶನ್ ತೆರೆದ ಕೂಡಲೆ ಸಾಧಾರಣವಾಗಿ ಎಲ್ಲಾ ಚಾಟ್ಗಳು ನಮ್ಮ ಕಣ್ಣಿಗೆ ಬೀಳುತ್ತವೆ. ಅಲ್ಲೇ ಕೆಳಗಡೆ ಬಲ ಬದಿಗೆ ಪರದೆ ಮೇಲೆ ಮೆಸೇಜ್ನ ಐಕಾನ್ಅನ್ನು ಕಾಣಬಹುದು. ಇಲ್ಲಿ ಹೋಗಿಯೇ ಈ ಹಿಂದೆ ಹೊಸ ಗ್ರೂಪ್ಗಳನ್ನು ಸೃಷ್ಟಿಸುವುದು ಇತ್ಯಾದಿ ಮಾಡುತ್ತೇವೆ.
ಈ ಐಕಾನ್ ಮೇಲೆ ಒತ್ತಿದರೆ ‘ನ್ಯೂ ಗ್ರೂಪ್’ ‘ನ್ಯೂ ಕಾಂಟ್ಯಾಕ್ಟ್’ ‘ನ್ಯೂ ಕಮ್ಯುನಿಟಿ’ ಎಂದು ಮೊದಲ ಮೂರು ಆಯ್ಕೆಗಳು ಕಾಣಸಿಗುತ್ತವೆ. ಅವುಗಳ ಕೆಳಗೆ ನಾಲ್ಕನೇ ಆಯ್ಕೆಯಾಗಿ ನಿಮ್ಮ ಹೆಸರನ್ನು ಬರೆದು ಅದರ ಎದುರು ಆವರಣ ಚಿಹ್ನೆ ಅಥವಾ ಬ್ರಾಕೆಟ್ನಲ್ಲಿ ಯೂ ಎಂದು ಬರೆದಿರುತ್ತದೆ. ಅದನ್ನು ಒತ್ತಿ ಏನಾದರೂ ಒಂದು ಸಂದೇಶ ಕಳಿಸಿ. ಅದರಿಂದಾಗಿ ಈ ಚಾಟ್, ಚಾಟ್ಲಿಸ್ಟ್ನಲ್ಲಿ ಕಾಣಸಿಗುತ್ತದೆ. ನಂತರ ಇದನ್ನು ಬಳಸುತ್ತಾ ಇರಬಹುದು. ಇದರಿಂದಾಗಿ ಪ್ರಯಾಣ ಮಾಡುವಾಗ ಅಗತ್ಯ ದಾಖಲೆಗಳ ಫೋಟೊ, ಅಗತ್ಯ ಮಾಹಿತಿ, ಇತ್ಯಾದಿಗಳನ್ನು ಮೆಸೇಜ್ ರೂಪದಲ್ಲಿ ಸೇವ್ ಮಾಡಿಕೊಳ್ಳಬಹುದು.