ಹಲವು ಫೇಸ್ಬುಕ್ ಪೇಜ್ಗಳಲ್ಲಿ ಎರಡು ಫೋಟೋಗಳು ವೈರಲ್ ಆಗಿವೆ. ಅವು ನಿರ್ಮಾಣ ಹಂತದಲ್ಲಿರುವ ಭವ್ಯ ದೇವಾಲಯವೊಂದರ ಫೋಟೋ. ಕೆಲವು ಕಾರ್ಮಿಕರು ಇನ್ನೂ ಅದನ್ನು ಕಟ್ಟಿತ್ತಿರುವುದು ಫೋಟೋದಲ್ಲಿ ಕಾಣಿಸುತ್ತದೆ.
ಇದೆರಡು ಫೋಟೋಗಳನ್ನು ಶೇರ್ ಮಾಡಿಕೊಂಡಿರುವ ಫೇಸ್ಬುಕ್ ಬಳಕೆದಾರರು, ಈ ಚಿತ್ರಗಳು ಅಯೋಧ್ಯೆಯಲ್ಲಿ ನಿರ್ಮಾಣವಾಗುತ್ತಿರುವ ರಾಮಮಂದಿರದ್ದು ಎಂದು ಬಿಂಬಿಸಿದ್ದರು. ಸಹೋದರರೇ, ಇದು ಅಯೋಧ್ಯೆಯಲ್ಲಿ ನಿರ್ಮಾಣವಾಗುತ್ತಿರುವ ರಾಮಮಂದಿರದ ಮೊದಲ ಲುಕ್. ಇದನ್ನು ನೋಡಿದರೆ ಯಾರಿಗೆ ತಾನೇ ಸಂತೋಷವಾಗುವುದಿಲ್ಲ? ಎಲ್ಲರೂ ಜೈ ಶ್ರೀರಾಮ್ ಹೇಳಿ ಎಂದು ಕ್ಯಾಪ್ಷನ್ ಬರೆದಿದ್ದವು. ಇವು ರಾಮಮಂದಿರದ್ದೇ ಫೋಟೋ ಎಂದುಕೊಂಡ ಹಲವರು ತಮ್ಮ ಫೇಸ್ಬುಕ್ನಲ್ಲೂ ಶೇರ್ ಮಾಡಿಕೊಂಡಿದ್ದರು.
ಆದರೆ ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಂ(ಎಎಫ್ಡಬ್ಲ್ಯೂಎ)ನ ಫ್ಯಾಕ್ಟ್ಚೆಕ್ನಲ್ಲೇ ಬೇರೆಯದ್ದೇ ಸತ್ಯ ಹೊರಬಿದ್ದಿದೆ. ಇದು ನಿರ್ಮಾಣಹಂತದಲ್ಲಿರುವ ರಾಮಮಂದಿರ ಫೋಟೋ ಅಲ್ಲ ಎಂಬುದು ಸಾಬೀತಾಗಿದೆ.
ಈ ಫೋಟೋಗಳು ಕಾಶಿ ವಿಶ್ವನಾಥ್ ಕಾರಿಡಾರ್ ಯೋಜನೆಯಡಿ ನಿರ್ಮಾಣವಾಗುತ್ತಿರುವ ಕಾಶಿ ವಿಶ್ವನಾಥ ದೇವಾಲಯದ ಮುಖ್ಯ ಸಂಕೀರ್ಣದ್ದು ಎಂದು ಗೊತ್ತಾಗಿದೆ.
ವೈರಲ್ ಫೋಟೋಗಳನ್ನು ರಿವರ್ಸ್ ಇಮೇಜ್ ಸರ್ಚ್ಗೆ ಕೊಟ್ಟು ಪರಿಶೀಲಿಸಿದಾಗ ಹಿಂದುಸ್ತಾನ್ ಟೈಮ್ಸ್ ತನ್ನ ಅಕ್ಟೋಬರ್ 30 ರ ಲೇಖನಕ್ಕೆ ಈ ಫೋಟೋಗಳನ್ನು ಬಳಸಿಕೊಂಡಿದ್ದು ಗೊತ್ತಾಗಿದೆ. ಕಾಶಿ ವಿಶ್ವನಾಥ ದೇವಾಲಯದ ಮುಖ್ಯ ಸಂಕೀರ್ಣದ ನಿರ್ಮಾಣದ ಬಗ್ಗೆ ಮಾಡಿದ ವರದಿಗೆ ಇದೇ ಫೋಟೋಗಳನ್ನು ಬಳಸಿಕೊಂಡಿದೆ.
1,000 ಕೋಟಿ ರೂ.ವೆಚ್ಚದ ಕಾಶಿ ವಿಶ್ವನಾಥ ಕಾರಿಡಾರ್ ಯೋಜನೆಗೆ 2019ರ ಮಾರ್ಚ್ 8ರಂದು ಪ್ರಧಾನಿ ನರೇಂದ್ರ ಮೋದಿಯವರು ಅಡಿಗಲ್ಲು ಹಾಕಿದ್ದಾರೆ. ಇದಿನ್ನೂ ನಿರ್ಮಾಣ ಹಂತದಲ್ಲಿದೆ.
ಇನ್ನು ರಾಮಮಂದಿರ ಸ್ವರೂಪ ಚರ್ಚಾ ಹಂತದಲ್ಲಿಯೇ ಇದ್ದು, ಸಂಬಂಧಪಟ್ಟಂತೆ ಉನ್ನತ ಮಟ್ಟದ ಸಭೆಗಳು ನಡೆಯುತ್ತಿವೆ. ಸದ್ಯ ವೈರಲ್ ಆಗುತ್ತಿರುವ ಫೋಟೋಗಳಿಗೂ, ರಾಮಮಂದಿರಕ್ಕೂ ಯಾವುದೇ ಸಂಬಂಧವಿಲ್ಲ.(ಏಜೆನ್ಸೀಸ್)
