ಗುವಾಹಟಿ: ಅಸ್ಸಾಂನ ಆರು ಜಿಲ್ಲೆಗಳಲ್ಲಿ ಪ್ರವಾಹ ಪರಿಸ್ಥಿತಿ ಗಂಭೀರವಾಗಿದ್ದು ಸೋಮವಾರ ಕನಿಷ್ಠ 49,000 ಸಾವಿರ ಜನ ನೆಲೆ ಕಳೆದುಕೊಂಡಿದ್ದಾರೆ. ಬ್ರಹ್ಮಪುತ್ರಾ ಮತ್ತು ಜಿಯಾ ಭರಲಿ ನದಿಗಳು ಅಪಾಯದ ಮಟ್ಟ ಮೀರಿ ಹರಿಯುತ್ತಿದ್ದು,ಆರು ಜಿಲ್ಲೆಗಳು ಸಂಕಷ್ಟಕ್ಕೆ ಒಳಗಾಗಿವೆ.
ಸೊಂತಿಪುರ, ವೆಸ್ಟ್ ಕರ್ಬಿ ಅಂಗ್ಲಾಂಗ್ನ ಹಿಲ್ ಡಿಸ್ಟ್ರಿಕ್ಟ್ ನಿಂದ ಹಿಡಿದು ಧೆಮಜಿ, ಲಖಿಂಪುರ, ಗೋಲಾಪಾರ, ಹೊಜಾಯ್, ಕಚಾರ್ ಜಿಲ್ಲೆಗಳ ವಿವಿಧ ಭಾಗಗಳು ಪ್ರವಾಹ ಪೀಡಿತವಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಅಸ್ಸಾಂ ಸ್ಟೇಟ್ ಡಿಸಾಸ್ಟರ್ ಮ್ಯಾನೇಜ್ಮೆಂಟ್ ಅಥಾರಿಟಿಯ ನಿತ್ಯದ ಪ್ರವಾಹ ಪರಿಸ್ಥಿತಿ ವರದಿ ಪ್ರಕಾರ ಇದುವರೆಗೆ 5,798 ಹೆಕ್ಟೇರ್ ಬೆಳೆಗಳು ಧೆಮಜಿ, ಗೋಲಾಪಾರ, ಹೊಜಾಯ್ ಜಿಲ್ಲೆಗಳಲ್ಲಿ ನೀರಿನಲ್ಲಿ ಮುಳುಗಿವೆ.
ಇದನ್ನು ಓದಿದ್ದೀರಾ?: ಸುದ್ದಿ ಸಮಗ್ರ: ದೆಹಲಿ ಕಂಪನ ಜನರಲ್ಲಿ ನಡುಕ
ಗೋಲಪಾರ ಜಿಲ್ಲೆ ಹೆಚ್ಚು ಸಂಕಷ್ಟಕ್ಕೆ ಒಳಗಾಗಿದ್ದು 33,000 ಜನ ತೊಂದರೆಗೆ ಒಳಗಾಗಿದ್ದಾರೆ. ಹೊಜಾಯ್ ಜಿಲ್ಲೆಯಲ್ಲಿ 13,000, ಲಖಿಂಪುರದಲ್ಲಿ 1,533, ಕಚಾರ್ನಲ್ಲಿ 450, ಧೆಮಜಿಯಲ್ಲಿ 410 ಜನ ಸಂಕಷ್ಟಕ್ಕೆ ಈಡಾಗಿದ್ದಾರೆ.ಮೊದಲ ಹಂತದ ಈ ಪ್ರವಾಹದಲ್ಲಿ ಇದುವರೆಗೆ ರಾಜ್ಯದಲ್ಲಿ 10 ಜನ ಜೀವ ಕಳೆದುಕೊಂಡಿದ್ದಾರೆ. ಎರಡು ಜಿಲ್ಲೆಗಳ ನಿರಾಶ್ರಿತರ ಶಿಬಿರದಲ್ಲಿ 48,783 ಜನ ನೆಲೆ ಕಂಡುಕೊಂಡಿದ್ದಾರೆ.
ಪ್ರವಾಹದಿಂದಾಗಿ ಕರೀಗಂಜ್, ದಿಬ್ರುಗಢ, ಬಕ್ಸಾ ಜಿಲ್ಲೆಗಳಲ್ಲಿ ರಸ್ತೆ ಮತ್ತು ಇತರೆ ಮೂಲಸೌಕರ್ಯಗಳು ಭಾರಿ ಹಾನಿಗೊಳಗಾಗಿವೆ. ನಷ್ಟದ ಪ್ರಮಾಣವನ್ನು ಇನ್ನೂ ಅಂದಾಜಿಸಲಾಗಿಲ್ಲ. (ಏಜೆನ್ಸೀಸ್)