ಮುಂಬೈ: ಬಾಲಿವುಡ್ನಲ್ಲಿ ದೀಪಿಕಾ ಪಡುಕೋಣೆ ಒಂದೆಡೆಯಲ್ಲಿ ಖುಷಿಯಾಗಿದ್ದರೆ ಮತ್ತೊಂದೆಡೆ ಅರ್ಜುನ್ ರಾಮ್ಪಾಲ್ ಮಂಡೆಬಿಸಿಯಲ್ಲಿದ್ದಾರೆ. ಇಬ್ಬರ ಖುಷಿ-ಮಂಡೆಬಿಸಿ ಎರಡಕ್ಕೂ ಈ ದಿನಕ್ಕೂ ಒಂದು ಲಿಂಕ್ ಇದೆ.
2007ರ ನ. 9ರಂದು ಇದೇ ದಿನ ಶಾರುಖ್ ಖಾನ್, ದೀಪಿಕಾ ಪಡುಕೋಣೆ ಹಾಗೂ ಅರ್ಜುನ್ ರಾಮ್ಪಾಲ್ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದ ‘ಓಂ ಶಾಂತಿ ಓಂ’ ಸಿನಿಮಾ ಬಿಡುಗಡೆ ಆಗಿತ್ತು. ಅದೇ ಚಿತ್ರದ ಮೂಲಕ ಬಾಲಿವುಡ್ಗೆ ಪ್ರವೇಶಿಸಿದ್ದ ದೀಪಿಕಾ ಪಡುಕೋಣೆ, ಬಾಲಿವುಡ್ನಲ್ಲಿ 13 ವರ್ಷ ಪೂರೈಸಿದ ಖುಷಿಯಲ್ಲಿದ್ದಾರೆ. ಮಾತ್ರವಲ್ಲ, ಆ ಚಿತ್ರದಲ್ಲಿ ತಾವು ಮಾಡಿದ್ದ ‘ಶಾಂತಿಪ್ರಿಯ’ ಎಂಬ ಪಾತ್ರದ ಗುಂಗಿನಲ್ಲಿ ಟ್ವಿಟರ್ ಹ್ಯಾಂಡಲ್ನಲ್ಲೂ ಹೆಸರು ಬದಲಿಸಿಕೊಂಡು ಸಂಭ್ರಮ ಹಂಚಿಕೊಂಡಿದ್ದಾರೆ.
ಮತ್ತೊಂದೆಡೆ ಅದೇ ಸಿನಿಮಾದಲ್ಲಿ ವಿಲನ್ ಆಗಿ ಗಮನ ಸೆಳೆದಿದ್ದ ಅರ್ಜುನ್ ರಾಮ್ಪಾಲ್ ಈಗ ರಿಯಲ್ ವಿಲನ್ ಎನಿಸಿಕೊಳ್ಳುವಂಥ ಪರಿಸ್ಥಿತಿಯಲ್ಲಿ ಸಿಲುಕಿಕೊಂಡು ಮಂಡೆಬಿಸಿಯಲ್ಲಿದ್ದಾರೆ. ದೀಪಿಕಾ ಪಡುಕೋಣೆಗೆ ತಗುಲಿಕೊಂಡಿರುವ ಡ್ರಗ್ಸ್ ಪ್ರಕರಣ, ಅರ್ಜುನ್ ರಾಮ್ಪಾಲ್ಗೂ ಉರುಳಾಗಿದ್ದಷ್ಟೇ ಅಲ್ಲ, ಸೋಮವಾರ ಅವರ ಮನೆ ಮೇಲೆ ಮಾದಕ ವಸ್ತು ನಿಯಂತ್ರಣ ದಳ(ಎನ್ಸಿಬಿ) ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ಮುಂಬೈನಲ್ಲಿರುವ ಅರ್ಜುನ್ ರಾಮ್ಪಾಲ್ ಮನೆ ಮೇಲೆ ದಾಳಿ ನಡೆಸಿರುವ ಅಧಿಕಾರಿಗಳು ವ್ಯಾಪಕ ಪರಿಶೀಲನೆಯಲ್ಲಿ ತೊಡಗಿದ್ದಾರೆ. (ಏಜೆನ್ಸೀಸ್)