ನ್ಯೂಯಾರ್ಕ್: ಅಮೆರಿಕನ್ ಬಯೋಟೆಕ್ನಾಲಜಿ ಕಂಪನಿ ಮಾಡೆರ್ನಾ ಕಂಪನಿ ಸದ್ಯ ಷೇರು ಮಾರುಕಟ್ಟೆಯಲ್ಲಿ ಸಂಚಲನವನ್ನೇ ಮೂಡಿಸಿದೆ. ಇದರ ಷೇರು ಮೌಲ್ಯ ಶೇ.39ರಷ್ಟು ಹೆಚ್ಚಾಗಿ 80 ಡಾಲರ್ಗೆ ತಲುಪಿದೆ. ಅಂದರೆ 6,050 ರೂ.ಗೆ ಮುಟ್ಟಿದೆ.
ಕರೊನಾಗೆ ಲಸಿಕೆ ಕಂಡು ಹಿಡಿಯುವ ನಿಟ್ಟಿನಲ್ಲಿ ಅತ್ಯಂತ ವೇಗವಾಗಿ ಸಂಶೋಧನಾ ಕರ್ಯಗಳನ್ನು ಕೈಗೊಂಡ ಕಂಪನಿ ಎಲ್ಲರಿಗಿಂತ ಮೊದಲು ಕ್ಲಿನಿಕಲ್ ಟ್ರಯಲ್ ಹಂತಕ್ಕೆ (ಮಾನವರ ಮೇಲೆ ಲಸಿಕೆ ಪ್ರಯೋಗ) ತಲುಪಿತು. ಈಗ ಮೊದಲ ಹಂತದ ಫಲಿತಾಂಶವೂ ಪ್ರಕಟವಾಗಿ ಕರೊನಾ ವೈರಸ್ ವಿರುದ್ಧ ಪ್ರತಿಕಾಯಗಳನ್ನು ಸೃಷ್ಟಿಸುವಲ್ಲಿ ಲಸಿಕೆ ಪರಿಣಾಮಕಾರಿಯಾಗಿದೆ ಎಂದು ಕಂಪನಿ ಹೇಳಿದೆ.
ಇದನ್ನೂ ಓದಿ; ಬಾಂಗ್ಲಾದಲ್ಲಿ ಕರೊನಾ ರೋಗಿಗಳು ನಾಲ್ಕೇ ದಿನಕ್ಕೆ ಚೇತರಿಕೆ…! ಪವಾಡವನ್ನೇ ಮಾಡಿದೆ ಈ ಔಷಧ
ಇದಾಗುತ್ತಿದ್ದಂತೆ ಕಂಪನಿಯ ಷೇರು ಮೌಲ್ಯದಲ್ಲಿ ಭಾರಿ ಹೆಚ್ಚಳ ಕಂಡುಬಂದಿತು. ಈಗ ಇದನ್ನೇ ಬಂಡವಾಳ ಮಾಡಿಕೊಳ್ಳಲು ಮುಂದಾಗಿರುವ ಕಂಪನಿ 26.40 ಲಕ್ಷ ಷೇರುಗಳ ಮಾರಾಟಕ್ಕೆ ಮುಂದಾಗಿದೆ. ಪ್ರತಿ ಷೇರಿಗೆ 76 ಡಾಲರ್ (5,749 ರೂ.) ಬೆಲೆ ನಿಗದಿಪಡಿಸಿದ್ದು, 1.34 ಬಿಲಿಯನ್ ಡಾಲರ್ (10 ಸಾವಿರ ಕೋಟಿ ರೂ.ಗೂ ಹೆಚ್ಚು) ಬಂಡವಾಳ ಸಂಗ್ರಹಕ್ಕೆ ಮುಂದಾಗಿದೆ. ಬೃಹತ್ ಪ್ರಮಾಣದಲ್ಲಿ ಲಸಿಕೆ ಉತ್ಪಾದನೆ ಹಾಗೂ ವಿತರಣಾ ವ್ಯವಸ್ಥೆ ಹೊಂದಲು ಈ ಮೊತ್ತವನ್ನು ಖರ್ಚು ಮಾಡುವುದಾಗಿ ಕಂಪನಿ ಘೋಷಿಸಿದೆ.
ಕಂಪನಿಯು ಎರಡನೇ ಹಂತದ ಪರೀಕ್ಷೆ ಶೀಘ್ರವೇ ಆರಂಭಿಸಲಿದೆ. ಕರೊನಾ ವೈರಸ್ ಜಗತ್ತಿನಾದ್ಯಂತ ಇನ್ನಿಲ್ಲದಂತೆ ವ್ಯಾಪಿಸುತ್ತಿದ್ದು, ಅಗತ್ಯ ಎದುರಾದರೆ ತುರ್ತು ಲಸಿಕೆಯನ್ನು ಸಿದ್ಧವಾಗಿರಿಸಲು ಕಂಪನಿ ನಿರ್ಧರಿಸಿದೆ. ಈ ಎಲ್ಲ ಕಾರಣಗಳಿಂದಾಗಿ ಕಂಪನಿ ಷೇರುಗಳಿಗೆ ಬೇಡಿಕೆ ಹುಟ್ಟಿಕೊಂಡಿದೆ.