ಕೊವಿಡ್-19 ಕೇವಲ ಮಾನವರಿಗಷ್ಟೇ ಅಲ್ಲ, ಕೆಲವು ಪ್ರಬೇಧದ ಪ್ರಾಣಿಗಳಿಗೂ ಅಪಾಯವನ್ನುಂಟುಮಾಡಬಹುದು ಎಂದು ಹೊಸ ಅಧ್ಯಯನವೊಂದು ಹೇಳಿದೆ.
ಈಗಾಗಲೇ ವಿನಾಶದ ಅಂಚಿನಲ್ಲಿವೆ ಎಂದು ಹೇಳಲಾಗುತ್ತಿರುವ ಪಶ್ಚಿಮ ತಗ್ಗು ಪ್ರದೇಶಗಳ ಗೋರಿಲ್ಲಾ, ಸುಮಾತ್ರನ್ ತಳಿಯ ಒರಾಂಗುಟೂನ್ ಮತ್ತು ಬಿಳಿ ಕೆನ್ನೆಯ ಗಿಬ್ಬನ್ಗಳಿಗೆ ಕರೊನಾ ವೈರಸ್ ತಗುಲುವ ಸಾಧ್ಯತೆ ಹೆಚ್ಚಾಗಿದೆ ಎಂದು ಹೇಳಲಾಗಿದೆ. ಯುಎಸ್ನ ಕ್ಯಾಲಿಫೋರ್ನಿಯಾ ಯೂನಿರ್ಸಿಟಿಯ ವಿಜ್ಞಾನಿಗಳು ಈ ವಿಶ್ಲೇಷಣೆಯನ್ನು ಪ್ರಸ್ತುತಪಡಿಸಿದ್ದಾರೆ.
ಕರೊನಾ ವೈರಸ್ ದೇಹವನ್ನು ಪ್ರವೇಶಿಸಲು ಕಾರಣವಾಗುವ ಎಸಿಇ2 ( ಆಂಜಿಯೋಟೆನ್ಸಿನ್ ಪರಿವರ್ತಿಸುವ ಕಿಣ್ವ 2) ಗ್ರಾಹಕ ಪ್ರೋಟಿನ್ ಸುಮಾರು 410 ಪ್ರಬೇಧಗಳಲ್ಲಿ ಕಂಡು ಬಂದಿದೆ ಎಂದು ವೈದ್ಯಕೀಯ ಜರ್ನಲ್ವೊಂದು ಪ್ರಕಟಿಸಿದೆ. ಈ ಎಸಿಇ2 ಎಂಬುದು ಮೂಗು, ಬಾಯಿ, ಶ್ವಾಸಕೋಶಗಳ ಹೊರವಲಯ ಸೇರಿ ವಿವಿಧ ಬಗೆಯ ಜೀವಕೋಶ, ಅಂಗಾಂಶಗಳಲ್ಲಿ ಕಂಡುಬಂದಿದೆ.
ಮನುಷ್ಯನ ದೇಹದಲ್ಲಿರುವ 25 ಅಮಿನೋ ಆ್ಯಸಿಡ್ಗಳಿಗೆ ಹೋಲಿಕೆಯಾಗುವ ಅಷ್ಟೇ ಅಮಿನೋ ಆ್ಯಸಿಡ್ಗಳನ್ನು ಹೊಂದಿರುವ ಎಲ್ಲ ಪ್ರಾಣಿ ಪ್ರಬೇಧಗಳಿಗೆ ಕರೊನಾ ವೈರಸ್ ತಗುಲುವ ಸಾಧ್ಯತೆ ಹೆಚ್ಚಾಗಿದೆ ಎಂದು ಹೇಳಲಾಗಿದೆ.
ಸಮುದ್ರ ಸಸ್ತನಿಗಳಾದ ಬೂದು ತಿಮಿಂಗಲಗಳು, ಬಾಟಲ್ನೋಸ್ ಡಾಲ್ಫಿನ್ಗಳು, ಚೈನೀಸ್ ಹ್ಯಾಮ್ಸ್ಟರ್ಗಳಿಗೂ ಕರೊನಾ ಸೊಂಕು ತಗುಲುವ ಸಾಧ್ಯತೆಗಳು ಹೆಚ್ಚಾಗಿವೆ ಎಂದು ಅಧ್ಯಯನ ವರದಿ ತಿಳಿಸಿದೆ.
ಹಾಗೇ ಸಾಕು ಪ್ರಾಣಿಗಳಾದ ಬೆಕ್ಕು, ಹಸುಕರುಗಳು, ಕುರಿಗಳಿಗೆ ಕರೊನಾದಿಂದ ಮಧ್ಯಮ ಮಟ್ಟದ ಅಪಾಯವಿದೆ. ನಾಯಿಗಳು, ಕುದುರೆ, ಹಂದಿಗಳಿಗೆ ಈ ವೈರಸ್ ಅಷ್ಟೊಂದು ಬಾಧಿಸುವುದಿಲ್ಲ ಎಂದು ತಿಳಿಸಲಾಗಿದೆ. (ಏಜೆನ್ಸೀಸ್)