ವೆಲ್ಲಿಂಗ್ಟನ್: ಕರೊನಾ ಲಸಿಕೆ ಪಡೆಯುವಾಗ ಜನರು ಭಯದಿಂದ, ಆತಂಕದಿಂದ ವಿಚಿತ್ರ ವರ್ತನೆಗಳನ್ನು ತೋರಿಸಿದ ಬಗ್ಗೆ ನೀವು ಓದಿರಬಹುದು. ಆದರೆ, ಇದು ಅದೆಲ್ಲಕ್ಕಿಂತಲೂ ವಿಚಿತ್ರವಾದ, ವಿಪರೀತವಾದ ಘಟನೆ. ಅದೇನೆಂದರೆ, ಒಂದೇ ದಿನದಲ್ಲಿ ಒಬ್ಬನೇ ವ್ಯಕ್ತಿ ಕರೊನಾ ಲಸಿಕೆಯ ಹತ್ತು ಡೋಸ್ಗಳನ್ನು ಪಡೆದಿರುವ ಪ್ರಸಂಗವೊಂದು ನ್ಯೂಜಿಲೆಂಡಿನಿಂದ ವರದಿಯಾಗಿದೆ.
ಹೌದು! ತನಗೆ ದುಡ್ಡು ಕೊಟ್ಟ ಕೆಲವು ಜನರ ಪರವಾಗಿ ನ್ಯೂಜಿಲೆಂಡಿನ ಒಬ್ಬ ಪುರುಷ ಕನಿಷ್ಠ ಹತ್ತು ಬಾರಿ ಲಸಿಕೆ ಪಡೆದಿರುವುದು ಪತ್ತೆಯಾಗಿದ್ದು, ಇದನ್ನು ಅಧಿಕಾರಿಗಳು ‘ಪೆದ್ದತನ ಮತ್ತು ಅಪಾಯಕಾರಿ ವರ್ತನೆ’ ಎಂದು ಕರೆದಿದ್ದಾರೆ. ಈ ಪುರುಷನ ಹೆಸರನ್ನು ಬಯಲುಮಾಡದೆ, ಸ್ಥಳೀಯ ಮಾಧ್ಯಮಗಳು ಈ ಪ್ರಸಂಗವನ್ನು ವರದಿ ಮಾಡಿವೆ. ಇವನು ಒಂದೇ ದಿನದಲ್ಲಿ ಹಲವು ಲಸಿಕಾ ಕೇಂದ್ರಗಳಿಗೆ ಹೋಗಿ ಬೇರೆ ಬೇರೆ ವ್ಯಕ್ತಿಗಳ ಹೆಸರಲ್ಲಿ ಮತ್ತೆ ಮತ್ತೆ ಲಸಿಕೆ ಪಡೆದಿದ್ದಾನೆ. ಇದಕ್ಕಾಗಿ ಆ ಜನರು ಇವನನ್ನು ಹೈರ್ ಮಾಡಿದ್ದರು ಎನ್ನಲಾಗಿದೆ. ಈ ವ್ಯಕ್ತಿಗೆ ತಕ್ಷಣ ವೈದ್ಯಕೀಯ ತಪಾಸಣೆ ಮಾಡಿಸಿಕೊಳ್ಳಲು ಸೂಚಿಸಲಾಗಿದ್ದು, ಪ್ರಾಣಕ್ಕೇನೂ ಅಪಾಯವಾಗುವುದಿಲ್ಲ ಎಂದು ವೈದ್ಯಾಧಿಕಾರಿಗಳು ನಂಬಿದ್ದಾರೆ.
ಇದನ್ನೂ ಓದಿ: ರಾವತ್ ಸಾವನ್ನು ಸಂಭ್ರಮಿಸಿ ಪೋಸ್ಟ್ ಮಾಡಿದ್ದವನ ಸೆರೆ; ಇನ್ನುಳಿದವರಿಗೂ ಬಂಧನ ಭೀತಿ..
ನ್ಯೂಜಿಲೆಂಡಿನಲ್ಲಿ ಲಸಿಕೆ ಪಡೆಯುವಾಗ ತಮ್ಮ ಗುರುತಿನ ಬಗ್ಗೆ ಯಾವುದೇ ಪ್ರಮಾಣಪತ್ರವನ್ನು ತೋರಿಸಬೇಕಾದ ಅವಶ್ಯಕತೆಯಿಲ್ಲ. ಆದರೆ, ಕರೊನಾ ಆರಂಭದಿಂದಲೂ ಅತಿಕಡಿಮೆ ಕೇಸುಗಳನ್ನು ವರದಿ ಮಾಡಿರುವ ಈ ದೇಶದಲ್ಲಿ ಸಾರ್ವಜನಿಕ ಪ್ರದೇಶಗಳಿಗೆ ಹೋಗಲು ಲಸಿಕೆ ಪಡೆದಿರುವುದು ಕಡ್ಡಾಯವಾಗಿದೆ ಎನ್ನಲಾಗಿದೆ.
ನ್ಯೂಜಿಲೆಂಡಿನ ಆರೋಗ್ಯ ಮಂತ್ರಾಲಯವು ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸುತ್ತಿದ್ದು, ಪೊಲೀಸ್ ತನಿಖೆ ಆದೇಶಿಸಿದೆ. “ಇನ್ನೊಬ್ಬರ ಸೋಗು ಹಾಕಿ ವೈದ್ಯಕೀಯ ಚಿಕಿತ್ಸೆ ಪಡೆಯುವುದು ಅಪಾಯಕಾರಿ. ಈ ರೀತಿ ಲಸಿಕೆ ಪಡೆದವನ ಆರೋಗ್ಯಕ್ಕೆ ಇದು ತೊಂದರೆ ಮಾಡಬಲ್ಲದು. ಜೊತೆಗೆ, ಲಸಿಕೆ ಪಡೆಯದೆ ತಮ್ಮ ರೆಕಾರ್ಡಿನಲ್ಲಿ ಲಸಿಕೀಕೃತರೆಂದು ತೋರಿಸಿಕೊಳ್ಳುವವರಿಗೂ ಅನಗತ್ಯ ರಿಸ್ಕ್ ತರುತ್ತದೆ” ಎಂದು ಅಲ್ಲಿನ ಲಸಿಕೀಕರಣ ನಿರ್ವಾಹಕರಾದ ಆಸ್ಟ್ರಿಡ್ ಕೂರ್ನೀಫ್ ಹೇಳಿದ್ದಾರೆ. (ಏಜೆನ್ಸೀಸ್)
ಕಾನೂನು ಬದಲಾಯಿಸಿ, ನೀವೇ ಚ್ಯಾನ್ಸಲರ್ ಆಗಿಬಿಡಿ: ಸಿಎಂಗೆ ರಾಜ್ಯಪಾಲರ ಸಲಹೆ!
22 ವರ್ಷದ ಮಗಳ ಸೋಗು ಹಾಕಿದ 48ರ ಮಹಿಳೆ! ಕಾಲೇಜು ಸೇರಿ ಯುವಕರೊಂದಿಗೆ ಸರಸ!