ಕಳವು ಪ್ರಕರಣಗಳೂ ಕೆಲವೊಮ್ಮೆ ವಿಚಿತ್ರವಾಗಿರುತ್ತವೆ. ಕಳ್ಳತನದ ವಿಧಾನ, ಕಳ್ಳರ ಇತಿಹಾಸ, ಕಳವುಗೈದ ವಸ್ತುಗಳ ಕಾರಣಕ್ಕೆ ಅವುಗಳು ಹೆಚ್ಚು ಗಮನಸೆಳೆಯುತ್ತವೆ. ಅಂಥದ್ದೇ ಒಂದು ಕೇಸ್ ಇದು. ಆ ವ್ಯಕ್ತಿಗೆ ಐಷಾರಾಮಿ ಕಾರುಗಳ ಕೀ ಫೋಬ್ ಗಳ ಮೇಲೆಯೇ ಕಣ್ಣು! ಬರೋಬ್ಬರಿ 1,900ಕ್ಕೂ ಹೆಚ್ಚು ಕಾರು ಕೀ ಫೋಬ್ಗಳನ್ನು ಆತ ಕಳವು ಮಾಡಿದ್ದ. ಮಾರಾಟಕ್ಕೆ ಇ-ಬೇಯನ್ನು ನೆಚ್ಚಿಕೊಂಡಿದ್ದ!
ಅಮೆರಿಕದ ಪೋಸ್ಟಲ್ ಇನ್ಸ್ಪೆಕ್ಟರ್ ಸಲ್ಲಿಸಿದ ಅಫಿಡವಿಟ್ ಉಲ್ಲೇಖಿಸಿ ಡೆಟ್ರಾಯ್ಟ್ ಫ್ರೀ ಪ್ರೆಸ್ ಮಾಡಿರುವ ವರದಿ ಪ್ರಕಾರ, ಈ ವಿಚಿತ್ರ ಕಳ್ಳನ ಹೆಸರು ಜಸನ್ ಗಿಬ್ಸ್. ವಯಸ್ಸು 41. ಹೊಸ ಹೊಸ ಕಾರುಗಳನ್ನು ಕಂಡರೆ ಅದನ್ನು ಡ್ರೈವ್ ಮಾಡುವ ಕ್ರೇಝ್ ಗಿಬ್ಸ್ಗೆ. ಫೋರ್ಡ್, ಫಿಯೆಟ್, ಜನರಲ್ ಮೋಟಾರ್ಸ್ನ ಹೊಸ ಕಾರುಗಳು ಅಮೆರಿಕದಾದ್ಯಂತ ರೈಲುಗಳ ಮೂಲಕ ಬೇರೆ ಬೇರೆ ಕಡೆ ತಲುಪಿಸಲಾಗುತ್ತದೆ. ಅವುಗಳನ್ನು ರೈಲ್ವೆ ಯಾರ್ಡ್ಗಳಲ್ಲಿ ನಿಲ್ಲಿಸಲಾಗಿರುತ್ತದೆ. ಇವುಗಳನ್ನು ಆ ಪಾರ್ಕಿಂಗ್ ನಲ್ಲಿ ನಿಲ್ಲಿಸುವ ಕೆಲಸ ಗಿಬ್ಸ್ದಾಗಿತ್ತು.
ಇದನ್ನೂ ಓದಿ:ಇನ್ನು ಮುಂದೆ ಶನಿವಾರ, ಭಾನುವಾರ ಎರಡೂ ದಿನ ಲಾಕ್ಡೌನ್: ಗೋವಿಂದ ಕಾರಜೋಳ
ಸಾಮಾನ್ಯವಾಗಿ ಇಂತಹ ಕಾರುಗಳಿಗೆ ಎರಡು ಕೀ ಫೋಬ್ ಬರುತ್ತದೆ. ಗಿಬ್ಸ್ ಅವುಗಳ ಪೈಕಿ ಒಂದನ್ನು ಎತ್ತಿಟ್ಟುಕೊಳ್ಳುತ್ತಿದ್ದ. ಬಳಿಕ ಅದನ್ನು ಇ-ಬೇ ಮೂಲಕ ಮಾರಾಟ ಮಾಡುತ್ತಿದ್ದ. ಈ ರೀತಿಯಾಗಿ ಗಿಬ್ಸ್ ಇದುವರೆಗೆ 1,900ಕ್ಕೂ ಹೆಚ್ಚು ಕೀ ಫೋಬ್ಗಳನ್ನು ಮಾರಾಟ ಮಾಡಿ ಅಂದಾಜು 45 ಲಕ್ಷ ರೂಪಾಯಿ ಗಳಿಸಿದ್ದಾನೆ. ಗಿಬ್ಸ್ ಸೈಲೆಂಟಾಗಿ ನಡೆಸುತ್ತಿದ್ದ ಈ ವ್ಯವಹಾರ ಬೆಳಕಿಗೆ ಬಂದ್ದದ್ದು ಹೀಗೆ. 2018ರ ಫೆಬ್ರವರಿ ತಿಂಗಳಿಂದೀಚೆಗೆ ಕಾರು ಕಂಪನಿಗಳು ಕೀ ಫೋಬ್ ಕಾಣೆಯಾಗುತ್ತಿರುವ ಬಗ್ಗೆ ರೇಲ್ ವೆಹಿಕಲ್ ಟ್ರಾನ್ಸ್ಪೋರ್ಟರ್ ಸಿಎಸ್ಎಕ್ಸ್ಗೆ ದೂರು ನೀಡಲಾರಂಭಿಸಿದರು. ಇದಾಗಿ, ಕಾರು ಡೀಲರ್ಗಳು ಕೂಡ ಫೋಬ್ಸ್ನ ಪ್ಯಾಟರ್ನ್ ಮಿಸ್ ಆಗುತ್ತಿರುವುದನ್ನು ಗಮನಿಸಿ ದೂರು ದಾಖಲಿಸಿದರು.
ದೂರುಗಳನ್ನು ಪರಿಶೀಲಿಸಿದಾಗ ನಾಪತ್ತೆಯಾದ ಬಹುತೇಕ ಕೀ ಫೋಬ್ಸ್ ಫೋರ್ಡ್ ಕಂಪನಿಯ ಎಫ್-150 ಪಿಕ್ಅಪ್ ಗಾಡಿಗಳಿಗೆ ಸಂಬಂಧಿಸಿದ್ದಾಗಿದ್ದವು. ಅಮೆರಿಕದ ಫೆಡರಲ್ ಇನ್ವೆಸ್ಟಿಗೇಷನ್ ಏಜೆನ್ಸಿಯವರು ಎರಡು ವರ್ಷಗಳ ಸುದೀರ್ಘ ತನಿಖೆ ನಡೆಸಿ ಗಿಬ್ಸ್ನ ಅಪರಾಧವನ್ನು ಸಾಕ್ಷಿ ಸಹಿತ ಸಾಬೀತು ಮಾಡಿವೆ. ತನಿಖೆ ವೇಳೆ ಇ-ಬೇ ಪ್ಲಾಟ್ಫಾರಂನಲ್ಲಿ ಕಳ್ಳತನದ ಕಾರು ಕೀ ಫೋಬ್ಸ್ ಮಾರಾಟ ಆಗುತ್ತಿರುವುದನ್ನು ಪತ್ತೆ ಹಚ್ಚಿಸಿದರು. ಆರೋಪಿಯನ್ನು ಟ್ರ್ಯಾಪ್ನಲ್ಲಿ ಸಿಲುಕಿಸಲು ಪೊಲೀಸರು ಇ-ಬೇ, ಇನ್ಸ್ಟಾಗ್ರಾಂ, ಪೇಪಾಲ್, ಫೇಸ್ಬುಕ್ ಖಾತೆಗಳ ಮೂಲಕ ಅನುಸರಣೆ ಮಾಡಿದರು. ಅದು ಫಲಕೊಟ್ಟು ಆರೋಪಿ ಬಲೆಗೆ ಬಿದ್ದ ನಂತರದಲ್ಲಿ ಹಂತ ಹಂತದ ವಿಚಾರಣೆಯಲ್ಲಿ ಎಲ್ಲವೂ ಸಾಬೀತಾಗುತ್ತ ಹೋಯಿತು. (ಏಜೆನ್ಸೀಸ್)
ಎಸ್ಐಪಿ ಮೂಲಕ ಎನ್ಪಿಎಸ್ನಲ್ಲಿ ಹೂಡಿಕೆ ಮಾಡಲು ಶೀಘ್ರವೆ ಸಿಗಲಿದೆ ಅವಕಾಶ